“Ereserkiari txistu egin diot, hala nahi nuelako”

Atalak: Futbola

https://www.youtube.com/watch?v=hhXRL_yLr-Y

Espainiako ‘Kirol eremuko indarkeria, arrazakeria, xenofobia eta intolerantziaren aurkako batzordeak’ ikertu egingo ditu Errege Kopako finalean espainiar ereserkiari jotako txistuak, inor zigortu behar ote den erabakitzeko.

Euskal Herriko kazetari, analista eta ordezkari politiko zintzoenek esango dizute Espainiako Gobernuaren jarrera lotsagarri eta neurriz kanpokoa dela, eta balizko zigorrek ziurrenik bere kontra egingo dutela aurrerago. Dena den, gehituko dute espainiar ereserkiari txistu egiteak espainiar sentitzen direnekiko “errespetu eza” erakusten duela, adierazpen askatasuna gauza bat dela, eta jendea iraintzea beste bat. Eta gehituko dute ere Athletic-eko zaletuek erakutsi zuten ‘Jo ta ke, irabazi arte’ zioen pankartak kutsu politiko oso markatua duela, “ETAren leloa” dela zuzenean ez esateagatik, El País-ek nabarmendu duen bezala.

Espainiako Gobernuaren jarrerari dagokionez, ez dugu deus gehituko. Bat gatoz jende gehienak pentsatzen duenarekin.

Bestetik, kontuan hartzeko moduko datu bat: Auzitegi Nazionalak 2009an ebatzi zuen adierazpen askatasunak babestu egiten duela Espainiako Erregeari edota ereserkiari txistu egitea, eta ezin daitekeela kalumnia edo irain bezala hartu, eta are gutxiago nazio-gorrotoa sustatzen duela esan. Ez txistu egitea, ezta Good bye Spain bezalako leloak dituzten pankartak erakustea ere, La Vanguardia edota La Razón egunkarietan irakurri daitekeen moduan.

Beste datu bat: Espainiako Gobernuak plazaratutako agiriaren –txistuak ikurren eta demokraziaren aurkako erasotzat jotzen dituen testuaren– ustezko egileetako bat Arriba egunkari falangistako kazetari ohi bat da, Manuel Roca Basanta, egun Presidentetza Ministerioan kargua duena, Vilaweb agerkariak gogorarazi duenez.

Beste bat: Athletic eta Bartzelonako zaletuek giro onean eman zuten eguna, hedabide guztiek nabarmendu duten moduan. Apenas egon zen arazorik haien artean. Aitzitik, esteladak zeramatzaten Bartzelonako zaletu batzuek salatu dutenez, eraso faxista jasan zuten partida atarian.

Eta beste bat: 1925ean, duela 90 urte, Primo de Rivera diktadoreak Bartzelonaren futbol zelaia itxi zuen 30.000 ikuslek txistu egin ziotelako espainiar ereserkiari. Kontua ez da berria, beraz. Zentzu horretan, txistu egin dieten hamaika ereserki gehiagoren adibideak ere ekar genitzake, espainiar zaletuek 2009an Turkiakoari zuzendutakoak, kasu.

“Ez da edukazio kontua”

Herritar zintzoak “errespetuz jokatzeko” eskatzen ari zaizkigu: “Ez ezazu egin zuri egitea gustatuko ez litzaizukeen ezer”. Koherentea. Koherentea den bezala Errege Kopako final batean espainiar ereserkia entzutean barrenak txistu egiteko eskatzea, eta barrenak eskatutakoari men egitea. Zergatik? Hainbat arrazoi eman genitzake, Vicent Partal Vilaweb agerkariko zuzendariak final bezperan zerrendatu zituenak adibidez: “Protesta politikorako tresna bat delako; ez delako edukazio kontua, edo errespetuari dagokion zerbait, baizik eta milaka ikusleri bizi dugun egoera gustuko ez dugula azaltzeko modua; ez dugulako mehatxurik onartzen (…) Baina, batez ere, txistu egingo dut hala nahi dudalako. Herritar askea naiz eta une bakoitzean egokien iruditzen zaidana egingo dut. Uste dut 2015eko Katalunian erabat justifikaturik dagoela ereserkiari eta monarka espainiarrei txistu egitea”. Ba hori.

Informazio gehiago:

Zigorrik ez, oraingoz (Imanol Magro Eizmendi, Berria)