Genero ikuspegia kirol prentsan: gizarte androzentrikoaren ajeak

Atalak: Feminismoa, Hedabideak, Kirola

Susana Guerrero: “Berdintasunerantz egiteko, beharrezkoa da gizon eta emakume kazetariak genero kontuetan trebatzea”.

Susana Guerrero UMA Malagako Unibertsitateko irakasleak hainbat lan argitaratu du gaztelaniazko hedabideek erabiltzen duten diskurtso sexistaz. Zehazki kirol prentsaren lengoaiaz aritu da solasean José Luis Rojas kazetariarekin, Periodismo deportivo de calidad webgunean. Elkarrizketako pasarte batzuk euskaratu eta hona ekarri ditugu, aintzat hartzekoak direlakoan, nahiz eta, zorionez, euskarazko hedabideetan ez den sumatzen espainiar kirol prentsari sarri darion naftalina usainik.

“Ezinbestekoa da hedabideek ulertzea emakume kirolariez hitz egitean haien alde profesionala nabarmendu behar dela, eta ez direla emakume-objektu gisa tratatu behar. Haien bizitza intimoa, janzkera, orrazkera, amatasunari uko egiten dioten ala ez… kontu horiek guztiek, irentsi egiten dituzte kirol arloan lortutako emaitzak”.

“Hala da [kirol prentsan gehiago azaltzen dira gizonezkoen bikotekideak edo modeloak, kirolariak eurak baino]. Eta hala jarraituko du egunkarien kontrazaletan emakume horien argazkiak plazaratu eta sexienak nortzuk diren erabakitzeko bozketak egiten dituzten bitartean. Kirol prentsan, prentsa arrosa geroz eta gehiago ari da hazten, eta horrek emakumeei egiten die bereziki kalte, euren lorpen profesionalak zokoratu egiten dituztelako”.

“Arazoa da gizarte androzentriko batean bizi garela, unibertsaltasunaren erreferente gisa maskulinoa hartzen duena. Hala, gaur egun ‘kirolaz’ hitz egiten badugu, ‘gizonezkoen kirola’ bezala ulertzen dugu. Lotura hori ekiditeko, ‘emakumezkoen kirola’ dela zehaztu beharrean gara. Iragankorra izatea espero dut”.

“Emakumeez mintzatzean, ‘neskak’ terminoa erabiltzea [jatorrizkoan “las chicas”, agian aldea nabarmenago geratzen da euskaraz aritzean baino] beste diskurtso batzuetan ere errepikatzen den joera sexista da; gu ikusteko modu paternal batekin du zerikusia, txikiak bagina eta gizonen babesa behar izango bagenu bezala”.

“Emakumezkoen kirolaren hazkundea ez dator bat medioetan duen presentziarekin. Hedabideetan gizonezkoen kirola da nagusi; edo, zuzenago esanda, gizonezkoen kirol batzuk. Euren argudioa da soilik kirol honek pizten duela jendearen interesa, eta dirua eman. Isatsari hozka egiten dion arraina bezalakoa da: emakumezkoen kirolaz informatzen ez bada ez da ezagutuko, ez zaio garrantzirik emango… eta ez du dirurik sortuko”.