Gabiria Kopa, txirrindularitza zaleen topagune izateko asmoz jaioa

Atalak: Txirrindularitza

[Eguneraketa: Gabiria Koparen lehen edizioaren inguruan Goierriko Hitzak plazaratutako kronika, bideo eta argazkiak]

Larunbatean, hilak 14, Gabiria Kopa sariketaren lehendabiziko edizioa egingo da Gabiriako (Gipuzkoako Goierrin) Osinalde elkartean, ziklismoa gustuko duen edonork izena eman dezakeen bazkari baten bueltan. Hainbat txirrindulari izango da bertan, omenaldia jasoko duen Txomin Perurena buru.

kartela….

Zer da , baina, Gabiria Kopa?

Euskal Herriko errepideetan jokatzen diren lasterketa profesional guztien artean, urteko txirrindularirik onena nor izan den erakusten duen sailkapena da. Julen Gabiria idazle bizkaitarra da harrikada eder honen sustatzaile nagusia, erronkari eutsi dioten dozena erdi bizikleta-zale lagun dituela. Halaxe aurkeztu zuen egitasmoa Tropelan idatzi zuen post batean:

“Duela urte asko, ezertarako balio ez zuen zerrenda bat egitea bururatu zitzaidan: Euskal Herriko errepideetan jokatzen ziren lasterketa guztien artean, urteko txirrindularirik onena nor zen frogatuko zidan zerrenda, alegia. Puntuazio-sistema bat asmatu, eta halaxe ekin nion lasterketa, etapa, sailkapen nagusi eta mendiko sari guztiak puntuatzen, Lizarrako Sari Nagusian hasi hasi eta Donostiako Klasikoraino, tartean pasatuz, besteak beste, Euskal Herriko Itzulitik, Zornotza eta Ordiziako klasikoetatik eta gaur egun desagertuta dauden Urkiola, Laudio edota Euskal Bizikletatik ere”.

Emakumezkoen egutegiari ere heldu dio Julen Gabiriak: Euskaldun Txapelketako lasterketa guztiak, Gipuzkoako Itzulia, Durango-Durango, Emakumeen Bira…

“Urteak eman nituen txorakeria horretan jo eta fuego, harik eta, duela urte pare bat, lagun batek esan zidan arte zerbait egin behar zela sailkapen horrekin, ofizialago bihurtu behar zela, nolabait. Eta gauza jakina da, Euskal Herrian, gauzak ofizial bihurtzeko, bazkari edo afari bat antolatu behar dela. Beraz, horixe pentsatu genuen: sailkapena egiten jarraitu eta denboraldi amaieran oturuntza eder bat prestatuko dugu. Irabazleei deituko diegu sari-banaketarako eta, baldin badatoz, itzel. Eta ez badatoz, berdin dio, guk sariak banatuko ditugu mahai eder baten inguruan, txirrindularitza-giroan”.

Eta hala, apurka-apurka, egitasmoa forma hartzen joan da, larunbateko bazkaria (tarteko) helmuga . Gabiriak esan bezala, lehen edizioko irabazleekin (azpian dituzue) harremanetan jarri dira egitasmoaren sustatzaileak, baina, arrazoi diferenteak medio, ziklista horiek ez dute bazkarira etortzerik izango. Han izango dira, ordea, Txomin Perurena, Joane Somarriba, Ramon Gonzalez Arrieta, Gorka Izagirre eta beste hainbat.

1. edizioko irabazleak:

Txomin Perurenari omenaldia

Sari banaketarekin batera, Txomin Perurena txirrindulari eta prestatzaile ohiari omenaldia egingo zaio. “Zenbat garaipen ez ote dauden Peruren hanketan! 12 etapa Vueltan, 2 etapa Giroan, 9 etapa Euskal Herriko Itzulian, 5. postua Munduko Txapelketan… Baina ez soilik etapak eta egun bakarreko lasterketak: Espainiako Vueltan bigarren geratu zen 1975ean, Tourreko mendiko sailkapena irabazi zuen 1974an… galantak egin ditu oiartzuarrak. Talde-zuzendari gisa ere, ez da makala izan; eta orain, Euskadi Irratian, esatari-lanetan goza dezakegu bere jakinduriaz eta graziaz”.

Bestalde, Tropela.net webguneak, Libros de Ruta argitaletxeak eta Urtekariak stand bana jarriko dute euren produktuekin.

Bazkarirako izen ematea

Telefono zenbakia: 688 635 532

E-posta: gabiriakopa@gmail.com

Prezioa: 15 euro

Informazio gehiago:

Twitter

Facebook