Bideo-jokoak: Egia al da pirateria bi urteren buruan desagertuko dela?

Atalak: Bideo-jokoak

3DM foro txinatarraren fundatzaileak egin du iragarpena: “Litekeena da hemendik bi urtera bideo-jokoak pirateatzerik ez izatea”. Kontua da foroko kideak saiakerak egin ohi dituztela bideo-jokoak kopiatzeko, eta geroz eta nekezagoa zaiela helburua lortzea, kopien aurkako sistemen konplexutasuna dela-eta. Alarma piztu duena Just Cause 3 jokoa izan da. Hura kopiatzen saiatu diren guztiek porrot egin omen dute, bigarren enkriptaketa hausterik ez dutelako izan.

‘Just Cause 3’ jokoa kopiatzeko zailtasunek etsipena areagotu dute pirata informatikoen artean.

David Valerok ADLSZone webgunean idatzitako analisian dioenez, hurbileko historiak erakutsi du goiz ala beranduago oztopo guztiak gainditzen direla, eta sektoreak lanean jarraitu beharko duela pirateria akabatzeko. Aldiz, gaineratu du badirela motiboak 3DMko foroko kideen iragarpena erabat okerra ez dela pentsatzeko:

Batetik, erabiltzaile geroz eta gehiagok erabakitzen du mahai gaineko kontsola ez pirateatzea, aparatua izorratuz gero bermea galtzeko beldurragatik.

Bestetik, sektoreak egin dituen mugimenduek pirateria “hoztea” lortu dute.

Eta hirugarrenik, formatu fisikodun produktuak pixkanaka desagertzen eta deskarga digitalak –denda ofizialek hauspotuta– indarra hartzen ari dira. Horri gehitu behar zaizkio prezio lehiakorragoak eta online jokoen bultzada, kontsoletan aldaketak egiten dituzten erabiltzaileek –harrapatuak direnek behintzat– jasaten dituzten “baneo beldurgarriekin”.