Hungariar umoristek alderdi politikoa eratu dute, neurri xenofoboen kontra egiteko

Atalak: Errefuxiatuen krisi globala, Hungaria, Umorea

Adur Larrearen txio batek jarri gaitu arrastoan: Hungariako kazetari satiriko batzuek, Viktor Orbán lehen ministroaren anti-immigrazio politikaren aurkako alderdia eratu dute: Bi Buztaneko Zakurraren Alderdia (Magyar Kétfark Kutya Part).

Bi Buztaneko Zakurra Alderdiko kidea, politikari “handien” baloreak zeintzuk diren azaltzen.

Serbia eta Kroaziako mugetan arantzadun hesiak jartzea erabaki zuenean hasi zituzten lehen ministroaren aurkako protestak, Georgely Kovacs ilustratzailea buru. “Orbánek beldurra saltzen duen bitartean, barrea saltzen dugu guk”, dio Kovacsek.

Hasiera batean, txiste eta satirak argitaratzera mugatu zen kolektiboa. Denborarekin, ordea, errefuxiatuen krisi globalak bultzatuta, urrats berriak eman zituen. Besteren artean, kanpaina bat jarri zuen abian, helburu zuena 10.000 euro lortzea 50 iragarki-panel alokatu eta bertan kartel handiak paratzeko. 100.000 euro lortu zituzten, 900 kartel jartzeko adina diru. “Barkaiguzue daukagun lehen ministroagatik” edota “Zatoz lasai Hungariara. Gu jada ari gara lan egiten Ingalaterran” bezalako mezuak irakurri zitezkeen afixa horietan. Halaber, diruaren parte bat Magyar Hírlap agerkariaren –Orbánen hurbilekoa da– milaka imitazio argitaratzeko baliatu dute. Hil honetan, bestalde, Központi Ujsag aldizkari satirikoaren lehendabiziko zenbakia plazaratuko dutela iragarri du Kovacsek, “atzerritarrek ordaindutako traidore” izendatu duten ilustratzaileak.

Jatorrizko artikulua: Courrier International.