Animaliak kirolean: “Dopin gupidagabeena”

Atalak: Dopina, Herri kirolak

2014ko abuztuan bi idi hil ziren Erandioko plazan. Gertatutakoak idi-proben mundua astindu zuen.

Dopina, dopin ekonomikoa, dopin teknologikoa… “Baloia ere drogatu egiten da”, kantatzen dute The Kagas-ekoek. “Kirola bera bezain zaharra da ia”, irakurri dugu Fosbury aldizkari katalanak plazaratutako El dòping més despietat (Dopin gupidagebeena) erreportajean. Hainbat kiroletan protagonista diren animaliek jasaten duten tratuaz ari da artikulua.

Hizpide ditu, besteren artean, lasterketa zakur eta zaldiak –morfina administratu zioten Ingalaterrako Erreginaren zaldia, esaterako–, baita euskal idiak ere. 2104an Erandion gertatutakoa du abiapuntu: harriari tiraka ari zirela (*) ziplo erori ziren lurrera bi idi; hantxe hil ziren biak. Egindako azterketek substantzia estimulatzaileen erabilera azaleratu zuten; animaliei speed-a injektatu zieten.

“Dopinaren itzala hain da luzea, idi-dematako apustuek behera egin dutela nabarmen”, dio Fosbury-ko erreportajeak. “Idi-proben ingurua txikia da. Guztiek ezagutzen dute elkar: sustatzaile, entrenatzaile, albaitari eta ordezkari politikoek. Plaza guztietan egiten dute topo. Animaliak ezagutzen dituzte, haien potentziala. Ez da diruagatik jokatzen. Indar gehiago du afizioak, harrotasunak, inbidiak. Sariek –1.200 eta 1.500 euro artekoek– ez dute bizitzeko adina ematen. Orduan, zergatik erortzen dira dopinaren tranpan?”. Hainbatetan egin dugu galdera bera…

(*) Iturri batzuen arabera, plazara atera aurretik hil ziren bi idiak. Kasu honetan, dena den, ez du garrantzia handirik non hil ziren, zergatik baizik. Informazio gehiago jasotzeko La Vanguardia eta El Correo egunkariak kontsulta ditzakezue, baita El Mundo ere, izenburuak argi uzten duen arren zein tonotan idatzia dagoen.