Entrenatzailea mahai-tenis partidatik kanporatua, jokalariak katalanez animatzeagatik

Atalak: Herrialde Katalanak, Kirola

“Vinga, va, som-hi Andreu!” (“Benga Andres, goazen!”) egin zion oihu 11 urteko jokalariari Carles Fontek, Tenis Taula Cassá mahai-tenis klubeko entrenatzaileak, asteburuan Blanesen (Herrialde Katalanak) jokatutako Espainiako txapelketako partida batean. Hitzok entzutean epaileak partida geratu eta entrenatzaileari eskatu zion gaztelaniaz egiteko, berak ez duelako katalana ulertzen. Kontua da entrenatzaileak ezin dezakeela agindu teknikorik eman eta, bereak animo oihuak soilik baziren ere, jarrera aldatzen ez zuela ikusita epaileak kanporatu egin zuen. Alferrikakoak izan ziren beste taldeko kideen azalpenak; haiei ere entzungor egin zien arbitroak.

“Arazoa da katalanak garela eta ez dutela nahi gure hizkuntzan mintzatzerik. Entrenatzaile txinatar, ingeles edo errusiar bati inork ez dio deus esaten, eta beste herrialdeetako txapelketetan desio duen hizkuntzan hitz egin dezake mundu guztiak”, dio Fontek, Kataluniako Selekzioen Aldeko Plataformak plazaratutako elkarrizketan. Entrenatzaileak dioen moduan, okerrena da 11 urteko jokalariak kontzentrazioa galdu eta “partidatik atera” zela.

Iturria: La Vanguardia