Neguko hiri olinpikoetako asko, aurki beroegiak izan litezke Jokoak antolatzeko

Atalak: Kirola

Eskiatzaileak Sochin, 2014an / Richard Heathcote. Getty Images

Gaur hasi eta hilaren 25era bitartean egingo dira Neguko Joko Olinpikoak, Hego Koreako Pyeongchang hirian. Kontuan hartzen badugu 2022ko egoitza (Beijing, Txina) ere bai, 21 izango dira 1924az geroztik Jokoak jaso dituzten hiriak, haietako batzuek bi bider. Bada, klima aldaketa dela-eta, kokagune horietako asko beroegiak izan litezke epe laburrean (2050ean), izotz eta elur gaineko kirolak praktikatzeko, Waterlooko (Kanada) Unibertsitateko aditu talde batek ohartarazi duenez.

Daniel Scott geografia irakaslea buru duen lan-taldeak 2014an publikatu zuen aurrenekoz Neguko Jokoen eta klima aldaketaren arteko loturari buruzko ikerlana, eta datuak eguneratu egin ditu orain. Aintzat hartuta gas emisioek etenik ez dutela eta 2050erako gure planetaren tenperatura bizpahiru gradu igo daitekeela batez-beste, 21 hiri horietako bederatzitan beroegi egingo duela ondorioztatu dute adituek, bigarren grafikoan ikus daitekeenez (laranja argi-ilunez agertzen dira bederatzi hiriok):

Otsailean, eguneko gutxieneko tenperatura izozte-mailara heltzeko aukera (%), 1981-2010 eta 2041-2070 artean.

Elur artifizialak gabezia batzuk estali ditzakeela nabarmendu dute ikerlariek, baina horrek ere muga batzuk dituela argi utzita, aireak hotz behar duelako makinek ponpatzen duten ura elur bihurtzeko.

Horrekin loturik, aipa daitezke 2010eko eta 2014ko Jokoak, Vancouver (Kanada) eta Sochikoak (Errusia). Lehenbizikoan, hamarkadetako negurik beroenean, lasto-fardoak elur natural eta artifizialez estali eta eski pista “biluzietan” jarri behar izan zituzten. Sochin, bestalde, antolatzaileek aurreko neguko elurra biltegi berezietan pilatu zuten, Jokoetan erabili ahal izateko. Ahaleginak ahalegin, kirolari ugari kexatu zen azpiegituren egoeraz.

Lasto fardoak elurrez estali eta eski pistetan jarri zituzten Vancouverren / Getty Images

Lehiari soilik ez, entrenamenduei ere eragingo die klima aldaketak. Esaterako, aurreikuspen batzuen arabera, AEBetako eski-pistak %50 laburragoak izango dira 2050ean, eta %80 2090ean. Ondorioak agian ez dira hain larriak izango eliteko kirolarientzat, elurra dagoen lekuetara bidaiatzeko ahalmen handiagoa duten heinean, baina bai eliteko bilakatu nahi dutenentzat, kirol-ibilbidearen oinarria arriskuan legokeelako tokiko eski pistak desagertu edo umeak hockeyan aritzen diren lakuak izoztuko ez balira.

Iturria: The New York Times