Korner: Futbola eta kultura batuko ditu Donostiako jaialdiak

Atalak: Futbola, Kulturgintza

Hilaren 19tik 24ra bitartean egingo da Korner jaialdiaren lehenbiziko edizioa, Donostiako bi aretotan banaturik: Ernest Lluch kultur etxean eta Antzoki Zaharrean. Donostia Kulturak eta Reala Fundazioak antolatu dute, “itxuraz bereizitako bideetatik doazen bi munduren –futbola eta kulturaren– arteko elkargunea izateko helburuarekin”, sustatzaileek nabarmendu dutenez.

Xabi Alonso jokalari ohiak irekiko du egitaraua, datorren astelehenean (19) 18:30ean, Ernest Lluch kultur etxean. Manuel Jabois kazetariak egindako galderak erantzungo ditu tolosarrak (gaztelaniaz).

Asteartean (20) zinema izango da protagonista. 19:00etan mahai-ingurua egingo da (gaztelaniaz) Ray Loriga eta Aitor Arregi zinema zuzendariekin eta Carlos Marañón Cinemanía-ko buruarekin. Amaitzean Elias Querejeta eta Antxon Eceizaren A traves del fútbol (1962) film laburrra proiektatuko dute. Halaber, Kirola eta baloreak haurrentzako tailerra egingo da (euskaraz).

Asteazkenean (21) Zergatik futbola? mahai-ingurua egingo da (euskaraz). Bernardo Atxaga idazleak, Anari musikariak eta Andoni Egaña bertsolariak hartuko dute parte.

Ostegunean (22) monologo bana eskainiko dute Andoni Agirregomezkortak, Miriam Cabezak eta Mikel Bermejok (euskara-gaztelania); ondoren John Benjamin Toshack entrenatzaile ohia elkarrizketatuko du Ander Izagirrek (gaztelaniaz), asteartean Amona eta beste hamar liburua aurkeztu zuenak Kaxilda liburu-dendan.

Ostiralean (23) Jorge Valdano entrenatzailearen eta Carlos Zañon idazle eta BCNegra-ko komisarioaren arteko solasaldia (gaztelaniaz) jarraitu ahal izango da streaming bidez; eta Tinglao Producciones konpainiak El jugador antzezlana eskainiko du (gaztelaniaz).

Amaitzeko, larunbatean (24) Korner FIFA Playstation txapelketa egingo da.

Aipatutako guztiaz gain, martxoaren 10era bitartean bi erakusketa izango dira ikusgai Ernest Lluch kultur etxean: Amets errealistak, Realak Europako txapelketetan egindako ibilbidea laburbiltzen duena; eta Liga ia-ia irabazi genuen urtea, Reala 2002-2003 denboraldian 2. sailkatu izana “ospatzen” duena.

Bilbon, letrak eta zinema

Athletic Fundazioak antolatuta, seigarrenez egingo da Bilbon futbola eta zinema lotzen dituen Thinking Football jaialdia, martxoaren 5etik 20ra bitartean. Literatura eta futbola uztartzen ditu, bestalde, azaroan egin ohi den Letrak eta futbola ekimena.

Lehiak sormena elikatzen duenean

LARRUN aldizkariaren pasa den uztaileko zenbakian, kulturaren eta kirolaren arteko loturaz mintzatu ginen. Futbolaz aritu zitzaizkigun solasean Anartz Zuazua antzerki zuzendaria eta Rayco Sanchez rap musikaria, Jokoz kanpo obraren eta Opio errebeldea liburuaren harira. Bestetik, Julen Gabiria idazlearekin luze aritu ginen Han goitik itsasoa ikusten da eleberria aitzakia gisa hartuta, eta Jone Uria bertsolariak txirrindularitzak zergatik liluratzen duen azaldu zigun. Hemen duzue elkarrizketa-sorta osoa: Lehiak sormena elikatzen duenean.