Futbola ez da zirkoa, gerra baizik

Atalak: Uncategorized

Maiz aipatu dugu futbola (gizonezkoen goi-mailakoa zehazki) zirko hutsa dela, diru-gosea oinarri, masa entretenitzea xede duen zirkoa. Bilbon bereziki baina baita beste zenbait futbol zelaitan ikusitakoak ikusita, ordea, esango nuke futbola deskribatzeko termino egokiena ez dela hori, baizik eta “gerra”, konfrontazio-esparru normalizatua.

Nola uler daiteke, bestela, adiskide batek Whatsappeko foroan idatzi duen moduan, zer pasa zitekeen jakinda, erakundeen gomendioa izatea umeak inguruko eskoletara ez eramateko eta jendea etxeetan gera zedin eskatzea, alegia, gerra-egoera bere horretan onartzea?

Zeren eta noski, partida bertan behera uztea astakeria litzateke, ezta? Futbola maite duten zaleei traizioa egitea, kolore zuri-gorriek ordezkatzen dutenari sakrilegioa…

Gainera, horrelako ekitaldiek hainbesteko dirutza uzten dute hirian… Kapitala baloreen (bizitzaren) gainetik.

Bilbokoen osteko erreakzio gehienak bide beretik doaz: ultra biolento guztiak, diren klubetakoak direla, futbol-zelaietatik bota behar dira. Futbol taldeek esku hartu behar dute, baita UEFA bezalako enteek ere. Bale, eta? Futbol taldeak, futbol zelaiak eta futbol ekitaldiak diruz laguntzen dituzten instituzioek (“futbolak, ematen dioguna baino gehiago itzultzen baitio herriari”) zer edo zer pentsatu beharko dute, ala? Eta, gure ofizioari helduta, kazetariok futbolari hainbesteko tartea/garrantzia ematen jarraitu behar al dugu? Blog honetan goi-mailako futbolari kasurik ez egiteak ez luke deus aldatuko, baina eta hedabide handiagoek gauza bera egingo balute? Eta euren boikotari babesleek jarraituko baliete? Ez duela ez hanka ez bururik? Ez dakit ba…

Portzierto, zein gizontasun ereduren barruan dabiltza Bilbokoen gisako istiluetan parte hartzen dutenak?

Galderak gehiago baititut erantzunak baino: Fiskaltzako norbaitek ofizioz aktuatuko al du Falangearen kontra, Spartakeko naziei informazioa pasa dietela publiko egin dutela aintzat hartuta? Bide batez, hedabide batzuek zergatik ez dute aipatu ultra errusiarrak naziak direla? Bide batez ere, batzuek ez diote “errudun” nor izan den seinalatzeko aukerari muzin egin > Alerta digital.

Bestetik, talde errusiarrak Europako txapelketetatik bota beharko liratekeela esan dute zenbaitzuk. Iruzkin zorrotza egin du horren harira @ciclositurgaiz-ek:

Hay que echar a los equipos rusos de las competiciones de la misma manera que hacen con los clubs españoles cada vez que los aficionados del Atlético de Madrid dejan cadáveres por el medio.

Por generalizar, que no falte amigos.

— Ciclos Iturgaiz (@ciclositurgaiz) 22 de febrero de 2018

Dio, duela pare bat aste futbolaren aldeko manifestu moduko bat idatzi nuen eta orain hau. Banekien maitasun-harremanak ez zuela asko iraungo, baina…