Zergatik da hain konplikatua Londresen bizikletaz mugitzea?

Atalak: Mugikortasuna

Jay Foreman umoristak Why Isn’t Cycling Normal in London? bideoa 300.000 lagunek ikusi dute jada, duela lau egun Youtubera igo zuenetik. Zerrendatzen dituen oztopoek berdin balio dute beste hiri batzuetako panorama islatzeko ere.

Aipatzen ditu autoekiko erakarpen-indarra, motordun ibilgailuentzat eraikitako errepide sarea, alokagai dauden bizikletak, mugikortasun politikak… eta bizikletentzako bide berezituak (“autoak eta bizikletak ezin baitira nahastu”, hirigintza-arduradunek pentsatu izan dutenez). Gurean bidegorriak liratekeenak, urdinez margotzen dituzte sarri, Barclays bankua dutelako babesle nagusi.

Unfinished London sailaren barruan egin du bideoa, eta halaxe dago Londongo bidegorri-sarea (Cycle superhighway), zati ugariren artean loturarik gabe. Gainera, zenbaitetan, autoak doazen errepidetik bereizteko koxkatxoak dituzte alboetan, bideak estuak dira oso, ez daude behar bezala margotuak, autoek berton aparkatzen dute… Badira kaleak, mapa ofizialetan bidegorria markatuta izan arren, halakorik ez dutenak. Alde ederra Amsterdamekin, Foremanek dioen bezala.

Gauzak behar bezala pentsatuta egin diren errepide-tarteak hizpide hartuta, honako mezua helarazi du Foremanek: “If you build it they will come”; alegia, gauzak txukun eginez gero etorriko direla ziklistak.

Iturria: Cyclingweekly