Konfinamenduan, denok aire zabalera so, baina ezin gorputza astindu… denok ez behintzat

Atalak: Uncategorized

Koronabirusa. Konfinamendua. Aire fresko, eguzki izpi edota euri tantarik ez. Gorputza (ia) kieto eta kirioak dantzan. Etxeko txikienak lau pareten artean gatibu. Txakurrak pasioan. Telelana. Lantoki batzuetan normal antzean beharrean. 500 whatsapp eta telegram mezu egunean. Kalera irten eta isuna jasotzeko beldurra. Birusak hurbileko bat edo zu zeu kolpatzeko beldurra. Bost minutuz ogia erosteko ateratzea, liberazioa. Bizilagun hori nora ostia doa?. Poliziak denok.

Egoera bere onera bueltatzeko beharrezkoa baldin bada, ze erremedio! Osasun langileak, supermerkatuetakoak, gasolindegikoak, garbitzaileak… gogoan. Eta hildakoak. Txaloak iluntzero. Etxean sartuta egon behar badugu, egongo gara, baina…

Zein gustora aterako ginatekeen lasai-lasai ibili edo korrika saio txiki bat egitera. Espainiarrok ezin dugu ordea.

Frantziarrek, aldiz, hein batean bai. Baita belgikarrek ere.

Frantzia: Salbuespenezko desplazamenduak

Frantzian, bada salbuespenezko joan-etorriak egitea baimentzen duen ziurtagiri bat, norberak bete behar duena eta, hau da deigarria, herritarren “asmo on eta ohorea” duena oinarri. Izen-abizenak, jaiotze-data eta helbidea idaztearekin batera, etxetik ateratzea baimentzen duten bost arrazoietako bat markatu behar da.

Azken puntuan irakurri daitekeenez, ariketa fisikoa (oinez edo korrika) egitera joateko atera ahal da kalera, bakarka, hori bai. Eta txakurrarekin osteratxo bat ematera ere joan ahal da. Dena den, ariketa horiek bizitokitik hurbil egin behar dira derrigor. Gehienera ere 2 kilometro urrundu daiteke, eta tarte baterako bakarrik –erosketak egin edota osasunagatik, “norberaren orekagatik”–, eta ez 10 kilometro egiteko, agintariek azaldu dutenez. Bizikletan ez. Bizikletan ibiltzea debekaturik dago. Ziurtagiria egunero sinatu behar da, eta data jarri.

Halaber, lanera joan ahal da, betiere ezinbestekoa baldin bada eta telematikoki egiterik ez baldin badago.

Oinarrizko produktuak (elikagaiak, sendagaiak, garbitasun produktuak) erostera joan ahal da, baita banketxeetara, posta bulegoetara, prentsa erostera edo gasolindegira.

Medikuarengana edo ospitalera ere joan ahal da.

Etxetik atera ahal da familia-arrazoi sendoengatik edo pertsona zaurgarriak zein umeak zaintzeko.

Belgikan eta Italian ere bai

Belgikako Gobernuaren hitzetan, “aire zabalean egiten den jarduera fisikoa baimendurik dago; are gehiago, gomendagarria ere bada, izan bakarrik ala senide/lagun batekin, baldin eta elkarren artean gutxieneko tartea mantentzen bada”. Bestalde, Europako herrialderik gaztigatuenean, Italian, aire zabaleko jarduera oro debekatzea aztertzen ari dira.

Kontua da: koronabirusari aurre egiteko zein da neurririk efektiboena? Bihotzak behin eta berriro esaten digu, mesedez, ito nahi ez badugu kalera ateratzeko. Buruak ordea… Segurua lizateke, banan-banan eta mailakaturik bada ere, ariketa fisikoa egiteko ateratzea?

Hirian bizikletaz

Mugikortasun kontuekin lotua, hirietan bizikletak maileguan hartzeko zerbitzuei dagokionez, erabaki desberdinak hartu dira. Esaterako, Donostian, “bizikleta partikularra zein Dbizi sistema erabili daiteke, beti ere baimenduta dauden jarduerak gauzatzeko bada”, Eneko Goia alkateak gogorarazi duen moduan. Bilbon, aldiz, BilbaoBizi zerbitzua bertan behera geratu zela irakurri genuen hilaren 15ean.

Bizikleta partikularra zein Dbizi sistema erabili daiteke, beti ere baimenduta dauden jarduerak gauzatzeko bada /Nos podemos desplazar tanto en bicicleta particular como en Dbizi. Siempre y que sea para realizar los desplazamientos autorizados.

— Eneko Goia (@EnekoGoia) March 19, 2020

Bizikleta hizpidera ekarri dugunez, kontuan hartzekoak dira Espainiako Txirrindularitza Federazioaren hitzak: “Aseguru etxeek jakinarazi duten moduan, kirola egin bitartean sufritutako edozein istripu zabarkeria gisa hartuko da”.

Portzierto, umeen inguruan zer edo zer pentsatu behar da, hau guztia ez baita batere sanoa eurentzat. Animoan eragiten diela sumatzen duzu, kalera atera nahi dute bai ala bai. Abesti, ipuin, errezeta, eskulan, YouTube eta gainerakoek muga bat dute. Helduok, berrogeialdia etxean sartuta pasa behar badugu, nola edo hala egokituko gara, baina eurak…