Gerra(k) eta kirola: Ukraina ez dadila aitzakia izan demagogia egiteko

Atalak: Sailkatu gabea

Kirola eta politika ez nahasteko esaten digute behin eta berriro. Baina…

Bartzelona eta Napoliren arteko partida / Getty Images

Astezkenean, Espainiako Estatuko –eta pentsatzen dut beste herrialde batzuetako– hainbat telebista katetako kirol-albistegiek, Chelsea futbol taldeko entrenatzale Thomas Tuchel alemaniarrak emandako prentsaurrekoaren irudiak emititu zituzten. Chelsea klub ingelesaren jabea Roman Abramovich da –nahiz eta kluba salgai jarri duen–, Vladimir Putinen hurbilekoa, eta horregatik eskatu zioten kazetariek entrenatzaileari Ukrainakoaz bere iritzia emateko. Haserre erantzun zuen Tuchelek: “Ni ez naiz politikaria. Berriro errepikatuko dut, eta berriro errepikatzen gaizki sentitzen naiz nik ez dudalako gerrarik sekula bizi: Gaiari buruz hitz egite hutsak gaizki sentiarazten nau, pribilegiatua naizelako. Hemen nago eserita, bakean. ahal dudan ondoen egiten dut, baina utzi egin behar diozu gisa honetako galderak egiteari, ez baitaukat erantzunik zuentzat”.

Albistegi batzuetan, Cuatro katekoan esaterako, prentsaurrekoaren berri eman zuten Tuchelen jarrera “bihozgabea” eta “mespretxuzkoa” balitz bezala, Mónica Planas kazetariak nabarmendu bezala El Mundo Deportivo egunkarian. “Kirolak mundua astintzen duten gertaerekiko sentsibilitatea azaldu behar du (…) baina ezin ditugu mikrofonoaren aurrean jartzen diren guztiak geopolitikan aditu edo ‘Putinologo’ bilakatu”, idatzi du Planasek. “Galderak nori egin eta nori ez, zer eta nola galdetu, gatazkarekiko errespetuaren eta zorroztasun profesionalaren parte da. Gainerakoa demagogia da, eta gerra garaian tamalgarria da hura erabiltzea”.

Errusiar bonbardaketak hasi zirenean, telebistaz emandako partiden markagailuaren alboan, “Gerrari ez” dioen mezua paratu zuen Futbol Liga Profesionalak. Aste honetan, baina, “Inbasioari ez” irakurri zitekeen. Planasen hitzetan, mezuak dioena “gezurra ez den arren, prosozionamendu horrek aurrekari eta egoera delikatuak ekar ditzake etorkizuneko gatazketan”.

Etorkizunari baino, izan badiren beste gatazka batzuei heldu diete batzuek, Ukrainako gatazkaren gainean kirol erakundeek hartu duten bidea hizpide. Mohamed Aboutrika futbolari ohi egipziarrak, esaterako, FIFAren alde biko aurpegia kritikatu du, errusiar klubak txapelketetatik kanporatu dituen bitartean, Israeli jokatzen uzten diolako, Palestinaren aurkako “krimenak” aintzat hartu gabe.

“Stop the war”. Mezu bera erakutsi zuten, hain justu, Israelgo Macabbi Tel Aviv eta Baskonia saskibaloi taldeetako jokalariek, Euroligako partida hasi baino lehen. Gasteizen bezala beste pabilioi batzuetan Palestinari elkartasuna adierazteko ekimenak bultzatu izan direnean, isilarazi egin dituzte sarri.

“Stop War” pankarta erakutsi zuten Bartzelona eta Athletic taldeek pasa den asteko partidaren atarian. Sare sozialetan-eta txaloak jaso ditu keinuak, baina ez dira gutxi izan gogorarazi dutenak bi taldeok Espainiako Superkopa jokatu dutela non eta Saudi Arabian, aipatuz besteak beste herrialde horren esku-hartze militarrak Yemengo lurretan.

FIFAk Errusia kanporatu du 2022ko Munduko Txapelketatik, zeina jokatuko den Qatarren, giza eskubideen errespetuari dagokionez zeresana ematen ari dena, irakurri daitekeen moduan Iñaut Gonzalez de Mataukok ARGIAn idatzitako Has dadila diktaduraren ikuskizuna erreportajean.

Gerrari ez, baina ez soilik gerra honi.