Lupus: Zientzia fikzio lurtarra. Ederra.

Atalak: Komiki kritikak

Zientzia fikziozko komikia da, baina ez da zientzia fikziozkoa. Lupus-ek baditu zientzia fikzioaren ohiko osagaiak: espazio-ontziak, robotak, planeta bitxi ezezagunak… Oskol futurista horren azpian, ordea, denboraz kanpoko istorioa ezkutatzen da, road moviea bailitzan abiatzen den lehenengo atalaren hondarrean azaleratzen hasten dena.

Lau komikik osatzen dute ‘Lupus’ obra. Guztiak batean bildu zituen Astiberri argitaletxeak 2011n.

Harremanei buruzko zuri-beltzezko istorioa baita azken finean, maitasun istorioa nahiago baduzue. Inkomunikazioa, bakardadea, adiskidetasuna, zalantza eta beldurrak, poztasun uneak… sentimenduek bor-bor egiten dute, abentura kutsuari amaieraraino eusten dion kontakizunean.

Esana dut ez naizela zientzia fikziozale amorratua. Frederik Peeters suitzarraren komikiak bete-betean harrapatu nau, ordea. Ez dakit generoko beste obra batzuetakoa baino istorio “lurtarragoa” delako edo zergatik, baina honek bai, jarriak nituen espektatibak aise gainditu ditu, Jodorowski eta Moebiusen Incal-ek lortu ez zuena, adibidez.

Lupusen eta bere lagun Tony-ren helburu bakarra topera disfrutatzea da, leku diferenteak ezagutu, ahalik eta droga legal eta ilegal gehien kontsumitu eta arrantza egitea. Bidean, haien patua aldatuko duen Sanaa emakume misteriotsua ezagutuko dute.

“Mundu guztia bezalakoa ez izateko biderik errazena” da drogak kontsumitzea, Lupusek dioenez. “Gainerako guztiak bezalakoa ez izateak” beldurtzen du Sanaa. Antagonismo horretan, narrazioak erritmo bizkor eta zaratatsua hartzen du batzuetan, geldo eta isilagoa besteetan, protagonista gaztarora daramaten flasback-en eta plano zuri mutuen eskutik, modu zoragarrian amaitzeko.

Lupusek “arerio” ugari gainditu beharko ditu…

Tamainak axola al du?

Astiberrik 2005 eta 2007 artean argitaratu zituen Lupus obra osatzen duten lau komikien lehenengo edizioak (Sillón orejero bilduman), jatorrizko tamainan guztiak: 22 x 29 zentimetro. Lau liburuetako bakoitzak 15 euro inguru balio du. Orotara 60 euro baino apurtxo bat gehiago.

Lauak batean bildu dituen liburua, ordea, bost zentimetro txikiagoa da zabal-luzean: 17 x 24. Eta 25 euro balio du. 400 orrialde ditu orotara.

Irakurle batzuen iritziz neurria txikitzeak kalte egiten dio obrari, Peetersen marrazkiek indarra galtzen dutelakoan. Jatorrizko komikiak ez ditut sekula esku artean izan, ez daukat bi bertsioak alderatzerik, baina tamaina txikiagoak haren trazu argiari ez diola kalte handiegirik egiten esango nuke, egon daitezkeen arren espazio zabalagoak aberastuko lituzkeen sekuentzia edota planoak. Ertz potoloko binetak, gainera, handi xamarrak dira.

60 euro xahutzeko asmorik ez baduzue, edo lau aleak liburu bakarrean izan nahi badituzue, zalantzarik ez izan, bertsio “txikitua” eskura ezazue, ez zarete gosez geratuko. Talibanek (ironic mode on) apur bat gehiago aurreztu beharko duzue. Bi bertsioak eskuratzeko aukera izatea pozgarria da.
Portzierto, lau komikiak batean bildu dituen liburu honetako azala espresuki egin du Peetersek Bilboko argitaletxearentzat.

Pilules bleus (Píldoras azules)

Frederik Peeters autore suitzarra 1974an jaio zen Genevan. 2001ean, hiri horretako Töpffer Saria irabazi zuen Pilules bleus zuri-beltzezko komiki autobiografikoarekin. Cati izeneko emakumearen, haren hiru urteko semearen –seropositiboak dira biak– eta hiruen arteko harremana kontatu zuen Peetersek komikian.

Astiberrik bere katalogoan du erreferentziatzat hartzen den obra hori (Píldoras azules). 200 orrialde ditu eta zazpigarren edizioa du jada. Ea aurki mesanotxean lekutxo bat egiten diodan.

‘Píldoras azules’ irakurtzeko apetitoa piztu dit ‘Lupus’-ek.