Coca-colaren iragarkia? Neska biluztu egin da eta!

Atalak: Zinema

“Wilbur Wright-en hegaldia, tranbian osteratxoa 1908ko Bartzelonan, eta Coca-colaren iragarkia, horiexek dira Europa Film Treasures filmoteka birtualean Internautek gehien ikusi dituzten hiru filmak”, dio Ciberpaís-eko albisteak. Grabazio laburrak dira, bitxiak oso, eta merezi du ordu laurden pantailaren aurrean emateak. Begientzat gozagarri, sorpresa atseginak eskaintzen dituzte hiru film horiek. Kolperik handiena Coca-colaren “iragarkiko” modeloak eman digu, soinekoa erantzi eta bular biluziak sagar batekin ferekatzen hasi denean. Apur bat geroago Coca-cola botila bat atera du poltsatik. Irudi freskagarriak direnik ezin uka baina…  “egitan Coca-colaren anuntzioa dela?”

Pelikulari buruzko azalpentxoan topatu dugu erantzuna. 1948ko grabazioa da, mutua, eta ageri den “playmateak” Arlene Hunter du izena. Filma nork zuzendu duen ez dakigu, soilik estatubatuarra dela, eta bere asmoa ez zela Coca-colarentzat iragarki bat egitea. “Pelikula erotiko txiki honek minimalismoaren aldeko apustua egiten du. Neskaren jarduerak Coca-colaren iragarki bat dela pentsatzera eraman gintzakeen, kontrako eztarrira joango ez balitzaio!”, irakurri dugu. Alegia, film erotikoa dela. Bale, orain bai.

Europa Film Treasures filmotekaren helburua zinemaren historiako lehendabiziko lanak berreskuratu eta zabaltzea da. Europako hainbat herrialdetako filmotekek utzitako grabazioak biltzen ditu. Espainiakoak bat egin du proiektuarekin eta haren artxiboaren parte da Bartzelona tranbian pelikula. Irudiak Ricardo de Banosek hartu zituen 1908an, Graciako pasealekuan zehar doan tranbiatik. Kuriosoa da kalean dabilen jendeak nola erreakzionatzen duen ikustea, baita txirrinduen zigi-zaga eroak jarraitzea ere.

Wilbur Wright eta bere makina hegalaria da ikusienen artean dagoen beste filma. 1909an grabatu zuen frantziar batek. Irudi historikoak dira, kamera batek hegazkin batetik hartutako lehenengoak direlako. Wilbur eta Orville Wright anaia estatubatuarrak aitzindari izan ziren abiazioaren munduan.

Aipatu hiru filmak mutuak dira. Izenburuak salbu, hitzik ez da agertzen. Dena den, aukera dago bost hizkuntzatan azpititulaturik ikusteko: gaztelaniaz, frantsesez, alemanez, ingelesez edo italieraz. Filmak ezin dira deskargatu.