“Ez da Munduko Txapelketarik izango!” egiten dute oihu matxinoek Brasilen

Atalak: Futbola, Nazioartea

Socrates jokalariaren begiradapean jokatu da futbolaren elitizazioaren aurkako txapelketa.

Brasileko gizarte mugimenduek antolatuta, Copa Rebelde futbol txapelketa jokatu zen abenduan Sao Paulo erdian, zonaldea sufritzen ari den gentrifikazio prozesua agerian uzteko.

Munduko Txapelketa hasteko sei hilabete besterik ez dira falta. Telebistaz jarraituko dugun sasi-zaletuok pentsatzen dugu pagotxa dela horrelako gertakizun ponposoen anfitrioi izatea, diru iturri oparoa delakoan, baina Brasildik datozkigun aurkako ahotsek bestelakoa islatzen dute.

“Duela 100 urte, futbola Brasilera heldu zenean, hiri handietako eliteek soilik jokatzen zuten”, diote gizarte mugimenduek. “Berehala hedatu zen, ordea, haren izaera demokratikoa medio, herrialdeko gune txiroetara. Futbola eurena egin zuten esklabo izandakoek, caipira eta mestizoek, langile analfabetoak gehienak, Mane Garrincha eredu duen eskolaren sortzaileak. Eta publikoa festaren parte zen”.

“Gaur egun, futbolaren negozioak jasan duen transformazio basatiaren ispilurik argiena da 2014ko Munduko Txapelketa. Langile, herritar, zaletu pobreenak eszenatokitik sistematikoki eta bortizki baztertuak izan dira. Herriaren futbola ordea ez da hil. Kalean bizi da, nahiz eta jokatzeko geroz eta leku gutxiago dagoen, espekulazioagatik eta herritar txiroekiko Gobernuaren erabateko mespretxuagatik”.

“Hala, futbolaren elitizazioari eta Sao Pauloko auzune txiroen gentrifikazioari aurre egiteko, SPko Koparen Herri Batzordeak gizarte mugimenduen kopa errebeldea antolatu du”.

Futbol txapelketa alternatiboa jaso duen eremua. (Argazkia: Sergio Silva)

Passe Livre, Assembleia do Largo, Frente de Luta pela Moradía eta beste hainbat mugimenduren topagune izan zen Sao Pauloko futbol txapelketa alternatiboa. Zerbitzu publikoen, indigenen eskubideen, herritar txiroen eta oro har, “zapalduak diren kolektiboen alde” egiten dute lan. Ekimen, manifestazio eta protesta ugari antolatzen dituzte, jendetsuak asko, baina apenas dute oihartzunik Brasilgo hedabide handienetan, Bernardo Gutierrezek ElDiario.es-en plazaratutako erreportajean dioen moduan. Sarea bilakatu da haien bozgorailu: blogak, Twitter, Facebook…

2013 protestek Brasilgo panorama mediatikoari nola eragin dioten aztertu du Gutierrezek. Bere hitzetan, hedabide handiek zuten monopolio informatiboa desegin dute. “Sare sozialetan eta komunikabide independenteetan sartzea besterik ez dago Brasil paralelo baten berri izateko”. Baina amaitzeko, hel diezaiogun berriro futbolaren hariari…

Urtarrilaren 25ean, munduko futbol txapelketaren kontra manifestazioak egingo dira 30 hiri baino gehiagotan, Ez da Koparik izango! lelopean. Bestalde, partidak hasten direnean ere egingo dira mobilizazioak. Ekainaren 23an, esaterako, Brasil-Kamerun partidaren egunean, deituak daude jada manifestazioak.

Uste dut, arreta apur bat jarrita, txapelketari boikota egiteko motibo anitz entzungo dugula datozen hilabeteetan. Askoz ere esfortzu txikiagoa eskatuko du, noski, tamainako ikuskizunaren aldeko mezuak irensteak. Entzungor egiteari laga eta oka egitera helduko ote gara?