Eliteko kirolarentzat diru gutxiago, baina milaka euro jasotzen ditu oraindik

Atalak: Ekonomia, Kirola

Baskonia eta Bilbao Basketentzako diru-laguntzek joera desberdina erakusten dute.

Krisiak bultzatuta, kirol profesionalari emandako diru-laguntzak murriztu dituzte Araba, Bizkaia eta Gipuzkoako udal eta diputazioek zein Eusko Jaurlaritzak. Dena den, elite mailako taldeentzako partidak badira oraindik aurrekontu publikoetan.

Gasteizko Udalak, esaterako, 2014ko aurrekontu proiektuan 267.410 euroko partida jasotzen du Baskoniarentzat, eta 187.000 eurokoa Alavesentzat, Inés P. Chávarri El País-eko kazetariak azaldu duenez. Halaber, 155.000 eta 119.000 euroko laguntza jasoko dute 5+11 Fundazioko saskibaloi eta futbol sekzioek. Baskoniak eta Alavesek, alegia. Diputazioak, gainera, 1,3 milioi emango dizkie herrialdea promozionatu, oinarrizko kirola sustatu edo arreta berezia behar duten kolektiboak laguntzeko.

Bilbao Basket taldeari dagokionez, 198.000 euroko partida aurreikusten du Udalak. Diputazioak, gogora dezagun, ez dio saskibaloi taldeari laguntzarik emango.

Eta Gipuzkoan, Diputazioak milioi bat euro ematen dio Real Sociedad Fundazioari, oinarrizko kirola sustatzeko betiere. Realarekin hitzarmena sinaturik duten taldeek jaso ohi dute laguntza. Ez dakit hori ote den eskola edo oinarrizko kirolak beharko lituzkeen baloreak sustatzeko modurik eraginkorrena, baina tira…

Bestalde, 2012-13 denboraldian Diputazioak 1,2 milioi eurotik 500.000 eurora murriztu zituen Gipuzkoa Basket taldearentzako diru-laguntzak; eta 2013-14an erabat kendu ditu. Erabakiak bere garaian “polemika” eragin zuela dio Chávarrik, taldeak uko egin behar izan ziolako Europan jokatzeari. “Instituzioak, Bildu boterera heldu zenetik, soilik eskola eta oinarrizko kirola sustatzera bideratu du bere politika.

Bitxia da El País-eko kazetariak “polemika” terminoa eta sigla politikoak (“Bildu”) soilik Gipuzkoako kasuan erabiltzea, baina tira…

Kirol amateurra: Elitea imitatzen duen eredua aldatzeko lanean

Oinarrizko kirola aipatu dudala aprobetxatuz, hilabete honetako Larrun aldizkariari erreferentzia egitea gustatuko litzaidake. Zergatik eta nola egiten dugu kirola herritar arruntok? Galdera hori abiapuntu hartuta mahaiaren bueltan jarri ditu Mikal Garcia kazetariak Jose Manuel Gonzalez Aramendi, Dorleta Ugalde eta Luis Mari Zulaika kirol adituak. Biztanleriaren gehiengoa sedentarioa dela esan digute, baina baita kirolzaleen artean osagarriak eta substantzia dopanteak ugaldu egin direla, marka egitea dela hainbatentzat inportanteena, modalitate batzuetan lehia bizia dagoela… Atzean, estetika dago zenbaitetan, edo errekonozimendu publikoaren beharra, errendimenduan oinarritutako ikuspegia, espektatiba okerrak, profesionalenganako miresmena, osasuna kaltetzeko arriskuaren aurrean axolagabekeria…

Txikitatik haurrak eskola-kirolaren filosofian heztea zeinen garrantzitsua den azpimarratu dute mahaikideek, baita administrazioak, federazioek, kirol elkarteek, proba herrikoien antolatzaileek nahiz guraso eta entrenatzaileek honetan guztian duten ardura ere. Maila amateurrean, sarriegi goi mailako kirolean jarrita dugu begirada eta errotik aldatu beharra dago norabidea, denak –tartean, baztertuenak izan ohi diren emakumeak– aintzat hartuko dituen eredua bultzatzeko eta berez osasuntsua den ariketa fisikoa muturrera eramanez burua gal ez dezagun.