“Caverna mediàtica espanyolista”

Atalak: Hedabideak, Politika

“Manipulazioaren profesionalek izorratu egin nahi gaituzte. Izorratu nahi gaituzte gure historiako unerik gozoenean gaudelako. Tira, ez naiz ezer berria deskubritzen ari, kobazulo mediatiko espainolistatik datorren prentsa delako”. Joan Laporta Bartzelona futbol taldeko presidentearen hitzak dira.

Laportak hitzaldia eskaini zuen hilaren 30ean Ramon Llull Unibertsitatean. Madrilgo hedabideak haserre dauzka aspalditik, eta duela lau egunekoa bezalako interbentzioek bere aurkako informazio (iritzi) zaparrada handia sortu dute azken egunotan. Presidenteak maiz agertu du Katalunia independentearen aldeko jarrera. Diadan, adibidez, manifestazioaren aurrealdean ikusi genuen.

Madril eta Bartzelonaren arteko desberdintasunen inguruko ikasgai praktikoak ere eman ditu kazetarien aurrean. Horrek, noski, erreakzioak sortu ditu etxe zurian. Jorge Valdano Real Madrileko zuzendariaren hitzak izan dira bereziki haragi gosez dauden komunikabideen bazka.

Ez gara gu izango Laportaren kirol-eredua defendatuko dutenak, haren proiektu handinahiak ere dirua baitu ardatz, telebistak, publizitatea… baina futbolaren munduan halakoak entzuteak poz pixkat ematen du, esaten diren txolinkeriek aspertuta gauzkatelako jada. Futbola eta politika ez direla nahastu behar diote batzuek, Laportaren hitzak artifiziozko suak besterik ez direla beste batzuek, Arenys de Munt-eko erreferenduma bezala. Haitzuloetako paretak astintzeko balio dute behintzat.