Futbol modernoa jo-puntuan, Urretxuko Euskal Jaietan

Atalak: Futbola

Hilak 21. Euskal Jai eguna Urretxun. Karrozen desfilea. Gazte koadrilek aldarrikapenerako baliatzen duten erakusleihoa. Gai lokalak izan ohi dira asko: Urretxu eta Zumarragako kontuak, Euskal Herria, lurraldetasuna, errepresioa, kultura, euskara eta abar. Gurera ekarritako auzi globalagoak dira besteak: injustizia sozialak, gerrak, kutsadura, matxismoa, manipulazio informatiboa…

Aurten, dena den, baziren ohiko eskematik ateratzen ziren bi karroza, nire arrain-memoriak oroitzen duenez, behintzat. Futbol modernoa zuten jo-puntuan biek, bai ‘Zoro’ koadrilarenak, baita ‘Atzebe’-renak ere. Harritu nau herriko bi gazte taldek gai hori aukeratzea. Seinale futbolak –negozioa ardatz duen futbol ereduak– geroz eta aurkako gehiago dituela, baita belaunaldi berrietan ere. Poztekoa da.

Antolatzaileek banatutako esku-orrietatik hartutako testuak [Argazkiak: @asier_isasi]:

Ez gaitzala futbolak itsutu! – ‘Zoro’ koadrila

“Lau urtean behin egiten den Munduko Futbol Kopa Brasilen izango zela erabaki zenean izugarrizko festa izango zelako susmoa zebilen denon ahotan, horren atzean suminduta bizi diren herritar andanari erreparatu ere egin gabe. Milioika euro inbertitu dira gutxi batzuen gozamenerako izango zen ekitaldi batean eta mundu erdia oinarrizko osasun eta hezkuntza apenas jasotzen ari den bitartean; beraz, egoera hau salatzeko parada egokia iruditu zaigu modu honetan egitea. Jarri al zarete pentsatzen guk ikusten dugunaren atzean zer nolako pobrezia dagoen?”.

Jokoa ala negozio hutsa? – ‘Atzebe’ koadrila

“Gaur egun nonahi entzun dezakegu futbol hitza; telebistan, irratian, kalean… Baina zer da futbola? Jokoa, kirola ala negozio hutsa? Askotan, pertsona batzuen bizitza joko honen inguruan biraka ari dela dirudi. Horregatik, futbolak garai batean izan zena izaten jarraitu beharko luke, izan ere… Futbolak ez gaitu elikatzen”.