Maroko, Afrikako Kopatik at, ebola dela-eta hura atzeratu nahi izateagatik

Atalak: Futbola, Maroko, Osasuna

Afrikako Futbol Konfederazioak (CAF) iragarri du Marokok ez duela Afrikako Nazioen Kopa jasoko, ebolaren birusa zabaltzeko beldurrak eraginda Rabatek txapelketa 2016ra arte atzeratzeko eskatu ostean. Halaber, Kopatik at utzi du herrialde afrikarra.

Boli Kostako futbol selekzioaren jarraitzailea, Afrikako koparako sailkapen faseko Sierra Leonaren aurkako partidan. (Argazkia: Getty Images)

Erabaki bezala, txapelketa urtarrilaren 17tik otsailaren 8ra bitartean egingo dela berretsi du, baina ez du jakinarazi zein herrialdek jasoko duen. Hainbat hedabidek  Hegoafrika –2010eko Munduko Koparen antolatzailea– jo du hautagai nagusitzat, nahiz eta bere burua lehiatik kanpo laga duen, BBCk gogorarazi duen moduan. Arrazoi diferenteak medio, ez dirudi Egiptok, Sierra Leonak, Gineak, Angolak edota Aljeriak ere Afrikako Kopa hartzeko borondate edo aukerarik dutenik.

Aldiz, Marokok eutsi egin dio abendu erdialdean egingo den Kluben arteko Munduko Koparen antolaketari, ez duelako ebolak gogorren jotako herrialdeetako jende uholderik erakarriko. Txapelketa horretan ariko diren bi talde afrikarrak Maroko eta Aljeriakoak dira.

Azaroaren 4ra bitarteko datuen arabera, ebolak 4.960 lagun hil ditu jada, gehienak Afrika Mendebaldeko Sierra Leonan, Liberian eta Ginean.

Ebolak zein eragin izan du afrikar futbolean?

• Sierra Leonak bertan behera utzi ditu futbol partidak.
• CAFek debekatu egin du Ginean, Liberian eta Sierra Leonan nazioarteko futbol partidak jokatzea.
• Seychelleek uko egin diote Kopako sailkapen fasea jokatzeari, Sierra Leonaren aurka jokatu behar zuelako.
• Maroko, Afrikako Kopatik at.

Nigeriako zaleen hozberoa neurtzen, Kongoren aurkako partidaren atarian. (Argazkia: AFP)