Monarkiari bai

Atalak: Hedabideak

Monakoko Carolina eta konpainia, Aquariumeko arrairik ederrenari begira

Espainiako Erregeak Donostian izan ziren asteazkenean. Goizean Aquariuma ber-inauguratu zuten. Arratsaldean, berriz, Diario Vasco-ren egoitzan izan ziren. Aquariumerako txangoa konpainia ederrean egin zuten, besteren artean, Monakoko Carolinak lagundu baitzien. Hannover-eko printzesa Diario Vascoren errotatibara ez zen joan, baina haren hutsuneak apenas kendu zion glamourrik espedizioari.

Zenbaitzuk pentsatuko duzue artikulua hiruzpalau txiste errazekin osatuko dudala, Caiga Quien Caiga-ren estilora, baina askoz ere kutreago. Bada, bete-betean asmatu duzue.

Espedizioaren parte ziren, Errege-Erreginez eta Monakoko Carolinaz gain: Patxi Lopez lehendakaria, Arantza Quiroga Eusko Legebiltzarreko presidentea, Markel Olano Gipuzkoako ahaldun nagusia; Odon Elorza Donostiako alkatea; Blanca Urgell eta Bernabe Unda sailburuak; Polizia Nazionalaren eta Guardia Zibilaren ordezkariak; Petronor, Confebask, Adegi, Kutxa, Innobasque, CAF eta Mondragon korporazioko presidenteak; Javier Rojo Senatuko presidentearen suhia (ongietorri aurreskua dantzatu zuen) eta abar.

Hona lehenengo txiste erraza. Vicente Zaragüeta Aquariumeko presidenteak iragarri zuen helburuetako bat 2012an tunidoen ikerketarako zentroa irekitzea dela. Atunak eta, badakizue. Argazkietan Erregeak dituen bixigu begiak ikusita… Tira, txistea egina dagoela.

Bigarrena, galdera moduan, El País egunkariko titularrari tiraka. Zer esan nahi du Los Reyes se sumergen en Euskadi iradokitzaile horrek? Iradokitzailea baino apokaliptikoa al da? Utopikoa?

Hirugarrena, Sofia Erreginari Gabriel Arestiren Nire aitaren etxea poema oparitu ziotela-eta, pergamino eder batean idatzia… Jo, konturatu naiz txiste erraz eta merkeak egitea ere zaila dela, eginda iristen zaizkidala jada.

DV 75 – ARGIA 90

75 urte bete ditu Diario Vascok, 90 ARGIAk. Urteurrena dela-eta bisitatu zuten Borboiek Diario Vascoren errotatiba. Horregatik eta egunkariaren lerro editorialarekin bat egiten dutelako, suposatzen dugu. Eta alderantziz. Alegia, Diario Vascok monarkiaren arrasssstoei jarraitzen dielako. Ezer arrarorik ez beraz. Banan-banan agurtu omen zituzten langile guztiak, baita han bildutako artista karismatikoak ere, “modu oso sinpatiko eta adeitsuan” gainera. Nire galdera da: zer arraiotan dabiltza ARGIAko marketin saileko lankideak? Nolatan utzi dute pasatzen gure proiektua munduari ezagutarazteko aukera eder hau?. “Donostiako kontzertua antolatzen ari gara. Harpidedunak-eta ahalik eta ongien egotea nahi dugu…” Aitzakia ederrak! Badakizue zertaz ari diren, ostegunean Euskadiko Orkestra Sinfonikoak Victoria Eugenia antzokian eskainiko duen emanaldiaz. Zer, ikusi duzue nola profitatu dudan abagunea kontzertuaren publizitatea egiteko? Bada, horixe, zuek zaretela gure Moncloa (to!), eta ostegunean errege-erreginen pare tratatuko zaituztegula, guk eta, bereziki, Euskadiko Orkestra Sinfonikoak.