Asterix eta Obelix, gentrifikazio prozesuaren biktima?

Atalak: Gizartea, Komikiak

‘Jainkoen egoitza’ komikiaren euskarazko edizioaren azala; eta gaztelaniazkoan, urbanizazio erromatarraren abantailak nabarmentzen dituen afixa.

Asterix eta Obelix komiki bildumaren baitan bada Jainkoen egoitza izeneko istorio bat: Galiarrak erromatarren bizitza ereduarekin bat egin eta haien borrokarako grina apaltzea helburu, Julio Zesarrek bere tropei agindu die galiarren herrixkaren alboan luxuzko urbanizazioa eraikitzeko. Hasiera batean galiarrek men egingo dutela dirudien arren, auzoan paratuko diren klase ertaineko erromatarrak kanporatuak izango dira. Galiarrek ez dute onartuko erromatarrek inbaditzea, are gutxiago modu hain pasiboan baldin bada.

“Komiki horretan, gentrifikazio prozesuen fikziozko irudikapen nahikoa fidela aurkituko dugu, zeinak erakusten dituen burgesiaren etorrera eta lekuko bizilagunen erresistentzia”, irakurri dugu Left Hand Rotation webgunean. Eta hain juxtu horregatik, fenomeno horri buruzko materiala biltzen duen Desplazatuen Museoko dokumentazioaren parte da komikia.

Material interesgarria

Mundu osoko gentrifikazio prozesuen gaineko informazio mordoa aurki dezakegu Desplazatuen Museoan –gaztelaniaz gehiena–, Gentrificación no es un nombre de señora (Gentrifikazioa ez da emakume izena) tailerrei buruzkoa tartean. Hirietako zonalde batzuetako lurzoruaren balioa artifizialki haziz ematen diren prozesu espekulatiboen aurkako erresistentzia-estrategiak jorratu dituzte tailer horietan.

Hainbat hiritan egin ziren ikastaroak, Bilbon esaterako, 2010eko abenduan, “Guggenheim efektua” abiapuntu. Hala irakurri dugu tailerraren aurkezpen orrian: “Guggenheim efektua hondatuen zegoen hiri erdiguneko zonaldeetako batera heldu da: Bilbo Zaharra edo San Frantzisko auzora. Gentrifikazio prozesua argia da: Errenta baxuko eta immigrazio handiko auzoa da jatorrian, botere publikoak utzi samar duena. Hirigintza politika berriak medio, auzoa gozoki bilakatzen da higiezinen merkatuarentzat, eta Udalak espekulazioa suspertuko du kultur ekintzen bitartez. Ekonomikoki ahulenak diren klaseek arriskuan ikusten dute auzoan jarraitu ahal izatea, alokairuak garestitu egingo direlako. Izan ere, gorantz egingo du auzoan bizi nahi duen sortzaile klasearen eskaerak, zonalde eraberrituak bizimodu bohemioa eta kultura-aniztasuna etiketatzat dituen heinean”.

Gentrifikazio prozesuetan interesa duzuenok, eman patxadaz osteratxoa Desplazatuen Museoan. Material interesgarri ugari aurkituko duzue.