Offside Fest: futbola tresna politiko gisa [Trailerrak]

Atalak: Futbola, Uncategorized, Zinema

“Futbola erabat loturik dago politikarekin, kulturarekin eta gizartearekin”, dio Joan Maria Pou kazetari eta Offside Fest futbolari buruzko zinema dokumentalaren jaialdiko epaimahaikideak. Bartzelonan egingo da Pouren hitzak berretsiko dituen festibala, martxoaren 12tik 15era bitartean.

Ikusgai izango diren dokumentalen trailerrak ekarri ditugu hona:

SAIL OFIZIALA

Democracia em preto e braco (Pedro Asbeg, Brasil)

Herrialdearen patua musika, futbola eta demokraziarekin aldatzea erabaki zuten brasildarren historia, Sócrates jokalari mitikoaren Corinthians taldea ardatz.

Eighteam (Juan Rodríguez Briso, Espainiako Estatua-Zambia)

Zanbiako futbol selekzioari buruzko dokumentala, 1993ko hegazkin istripu tragikoa –selekzioko kide guztiak hil ziren– abiapuntu.

https://www.youtube.com/watch?v=PTx_Ucf5IFk

Mundial. The highest stakes (Michal Bielawski, Polonia)

Poloniak garai ilunak bizi zituen 1982an. Futbol selekzioak, ordea, herritarren egunerokoa goxatu zuen.

 Sons of Ben (Jeffrey C. Bell, AEB)

1996. urtean, Philadelphiako futbol zaleek borroka egin zuten haien hiriak MLS ligan talde bat izan zezan.

Vi är bäst ändå (Andreas Bjúner, Suedia)

Stockholmeko Hammarby taldeak krisi larria bizi du. Egoerari aurre egiteko, sorreratik izan duen futbol zelaia utzi eta Djurgårdens taldearen estadioan jokatu beharko du… bere arerio nagusiaren etxean.

We must go (Dave LaMattina eta Chad N. Waker, AEB)

Bob Bradley estatubatuarrak gidatutako Egiptoko selekzioak azken urteotan emandako urratsak, kalean protestak nagusi direnean.

“JOKOZ KANPO” SAILA

Coach Zoran and his African Tigers (Sam Benstead, Erresuma Batua)

Hego Sudanek independentzia lortu zuenean, 2011ko uztailean, Zoran Djorjevic serbiarrak hartu zuen futbol selekzioa egituratzeko ardura.

El otro Maradona (Ezequiel Luka eta Gabriel Amiel, Argentina)

Diego Armando Maradonaren txikitako lagun onena zen Goyo Carrizo. Villa Fioriton elkarrekin jokatzen zuten. Mito bilakatu zen bata. Lesio batek bigarrenaren futbolari karrera zapuztu zuen.

Istanbul United (Farid Eslam eta Oliver Waldhauer, Turkia)

Istanbuleko hiru taldeetako (Galatasaray, Fenerbahçe eta Besiktas) zaleek bat egin zuten, hiriburuko Gezi parkearen eraispena geratzeko protestetan.

L’Últim partit (Jordi Marcos, Herrialde Katalanak)

Bartzelona taldeko jokalari eta entrenatzaile ohi Johan Cruyffi buruzko filma.

Les Rebelles du foot 1 & 2 (Gilles Perez eta Gilles Rof, Frantzia)

Hainbat futbolarik euren fama eta influentzia erabili dute injustizien aurka egiteko. Eric Cantona jokalari ohia da narratzailea.

https://www.youtube.com/watch?v=mbZ05J-Pzq8

Next goal wins (Mike Brett eta Steve Jamison, Erresuma Batua)

Samoa Amerikarreko selekzioak 31-0 galdu zuen Australiaren aurka 2001ean. Errenkadan galdu zituen ondoren jokatutako partida guztiak, taldearen gidaritza  Thomas Rongen entrenatzaileak hartu zuen arte…

Uno. La historia de un gol (Carlos Moreno eta Gerardo Muyshondt, El Salvador)

El Salvadorrek gerra zibila sufritzen zuen 198oko hamarkada hasieran. 1982ko Munduko Kopan, futbol selekzioak ilusioa eraman zuen jendartera.

Zero a zero (Paolo Geremei, Italia)

Danielek, Marcok eta Andrea italiarrak 1977an jaio ziren. Romako jubeniletan jokatzen zuten, Totti edota Buffonekin batera. Gazteen selekzioan ere aritu ziren, baina ondoren… Futbolaren alde ezkutua agertzen du filmak.

Iturria: La cultura futbolística xuta amb l’esquerra (Manel Ros, Directa.cat)