Kataluniako areto futboleko selekzioa Munduko Kopatik bota dute

Atalak: Futbola, Herrialde Katalanak

Espainiako Gobernuaren eskua ikusi du erabakiaren atzean Kataluniako Federazioak. Argazkian, iazko Europako Txapelketan aritu ziren jokalariak.  (L’Sportiu)

Kataluniako areto futboleko gizonezkoen selekzioak ez du Bielorrusian jokatuko den Munduko Kopan lehiatzerik izango, sailkaturik egon beharko litzatekeen arren, Europako Txapelketan lortutako emaitza medio. L’Esportiu egunkariak jakinarazi duenez, Bielorrusiako areto futboleko federazioak Nazioarteko Federazioari (AMF) eskatu dio Katalunia eta Taiwango selekzioak Munduko Kopatik at uzteko, “Espainiako Estatuaren eta Txinaren errepresalien beldur”.

Lluis Simon L’Sportiu egunkariko kazetariak dioenez, Kataluniako areto futboleko federazioko presidente Jordi Eduardok “filosofiaz” hartu du erabakia. “Espainiako Gobernuaren eskua” sumatzen du, lehendabiziko aldia delako selekzioari nazioartean jokatzea ukatu diotela. “Taiwanekin alderatzea ohorea da”, esan du.

2004an aitortua izan zenetik, nazioarteko hainbat txapelketatan parte hartu dute Kataluniako gizonezkoen eta emakumezkoen selekzioek, Espainiaren aurka ere bai tartean. Duela hiru urte, esaterako, gizonezkoen absolutua inongo arazorik gabe aritu zen Bielorrusian bertan jokatutako Europako Txapelketan. Oraingoan, aldiz, Nazioarteko Federazioak ez du txapelketa arriskuan jarri nahi izan eta Bielorrusiaren eskaerari men egitea erabaki du, Kataluniako federaziotik gaineratu dutenez.

Kataluniako selekzioaren lekua Norvegiakoak hartu du; Taiwangoarena Kirgizistangoak.