Diego Armando Maradona, Kolonbiako bake prozesuaren aldeko partiduan

Atalak: Futbola, Kolonbia

Diego Armando Maradona argentinarra Bogotan da jada. Piedad Córdoba senatari ohiarekin ageri da argazkian.

Kolonbiako bake prozesuari bultzada ematea helburu, futbol partidua jokatuko dute bihar Bogota hiriburuan, Gatazkaren Biktimen Eguna dela-eta prestatutako egitarau oparoaren baitan.

Ikusmin handia sortu du partiduak, Diego Armando Maradona futbolari ohi argentinarrak jokatuko duelako, Kolonbiako eta Hego Ameriketako beste zenbait izarrekin batera, IDRD erakundeak jakinarazi duenez.

Gaur, bestalde, FARC erakunde armatuaren eta Kolonbiako Gobernuaren arteko negoziazioek aurrera egin dezaten eskatuko dute herritarrek, Bogotan eta beste hiri batzuetan ezkerreko alderdiek deitu dituzten manifestazioetan.

[Eguneraketa: Ehunka mila lagun atera dira kalera bakearen alde]

2012an hasi zituzten elkarrizketak

Bake prozesuari lotutako negoziazioak 2012ko urriaren 18an hasi ziren ofizialki eta, egun, FARC eta Kolonbiako Gobernua Habanan biltzen ari dira, gatazka gainditu ahal izateko puntuak banan-banan eztabaidatzeko.

50 urteko gatazkaren ondorioz 600.000 lagun hil dira, eta ia 5 milioi desplazatu daude, 2012ko datuen arabera.

Informazio gehiago:

FARC-EP euskaraz, Kolonbiako bake-prozesua bultzatzeko (Axier Lopez, Begizta.net)

FARC: “Beste parteari eskatzen diogu bakearen bidea mando hilaren moduan zeharkatu duten sastraka juridiko denak trabatik kentzeko” (El Espectador)

Estela de Carlotto (Maiatza Plazako Amak): “Inork esaten badu gertatutakoa ahaztu behar dela, pertsona gaiztoa da” (C. Hernandez eta A. Marin, El Espectador)