Estelada erakutsi zuten zaletuen isuna ordaintzeko crowdfunding kanpaina

Atalak: Herrialde Katalanak, Saskibaloia

La Cantonada zaletu taldeko kidea da Molina; argazkian, hari babesa azaltzeko ekintza, Badalonako pabilioian.

2014 urriaren 4an, Zaragozako CAI saskibaloi taldearen pabilioian, Badalonako Joventut-eko zaletu bati –Alex Molinari– erresistentzia delitua leporatu zioten, poliziei aurre egin eta identifikatzeari uko egiteagatik, bertsio ofizialaren arabera betiere.

Molinak eta beste zaletu batzuek estelada bat erakutsi zuten partidan zehar, eta independentziaren alde oihu egin. Salatu duenez, poliziek identifikatzeko eskatu zioten, eta NANaren bila hasi zenean lurrera bota zuten. Bertsio ofizialaren arabera, ordea, identifikatzeari uko egin eta agenteei oihu egin zien. Poliziek diotenez, Molinarengana zuzendu ziren Espainiaren aurkako leloak jaurti eta atzean zituen zaletuei partida behar bezala ikusten uzten ez zielako. Badalonako zaletuak akusazioak ukatu ditu.

Zaragozan ustez gertatutakoengatik 4.000 euroko isuna ezarri diote Molinari, eta 3.000 eurokoa Biel Noguerari, “testigantza faltsua emateagatik” zigortu duten zaletuari. 7.000 euro horiei gehitu behar zaizkie prozesuak eragin dituen gastuak (abokatuak-eta): 1.100 euro.

8.100 euro orotara. Auzipetuei babesa azaldu eta isunari aurre egiteko, Katalunia Fundazioak mikromezenasgo kanpaina abiatu du. Maiatzaren 26ra bitartean, 10 eurotik 500 eurora arteko ekarpenak egin ahal izango dituzte herritarrek.

Iturria: Ara.cat

Twitterren: #TotsSomMolina