Force with control, teknologiaren indarra

Atalak: Kirola

Bradley Wiggns, Sky taldeko txirrindularia.

Duela gutxira arte talde herbeherear, alemaniar, frantziar eta bereziki italiar eta espainiarrak ziren nagusi goi mailako txirrindularitzan. Orain, ordea, estatubatuar eta britainiarrak dira indartsuenak. Tropela ingelesez mintzo da. Aurrerapen teknologikoek pisu handia dute Lance Armstrong-en Radio Shack bezalako taldeetan. Psikologoek, biomekanikariek, nutrizionistek… lagun ugarik parte hartzen dute perfekzioa xede duten proiektu anbiziotsuetan.

Aurten, AEBetako hiru talde –Radio Shack, Garmin-Transitions eta Columbia– lehiatuko dira Protour mailan, Kontinental mailako BMC indartsua ahaztu barik. Haiekin izango da Sky sortu berria, puntako txirrindulariak erakarri dituen proiektu britainiarra. Aurrekontu handien jabe dira guztiak.

Gaur arte pentsaezina zirudien. Espainiako Estatuak hiru talde izango ditu: Euskaltel, Footon Servetto gaztea eta Caisse d’Epargne, azken horren babeslea frantziarra bada ere. Hain justu, Frantziak bi talde bakarrik izango ditu, AG2R eta Française des Jeux, Italiak bezalaxe. Liquigasek eta Lamprek ordezkatuko dute duela gutxira arte bospasei scuadra potente zituen herrialdea. Cunego eta Petacchiren taldeak, gainera, behin behineko lizentzia batekin korrituko du, oraindik ez baititu aurkeztu UCIk eskatutako dokumentu guztiak. Herbehereek Quick Step, Rabobank eta Omega Pharma-Lotto taldeekin jarraituko dute, eta Alemaniak iazko denboraldian ezer gutxi egin zuen Milram-ekin. Danimarkako Saxo Bankek, Kazakhstango Astanak eta errusiar diziplinaren ordezkari den Katushak osatzen dute zerrenda. Tropeleko panorama irauli egin da. Helmuga beste begi batzuekin ikusten da. Ride the line, gainditu ezazu marra. Haize ufada berriek ez dituzte denak kontentu uzten.

Bizikletak, maillotak, entrenamenduak, dieta, pinganilloak… ziklista perfektua lortzeko gauza ugari kontrolatu eta hobetu behar dira. Kontrola. Eta etengabeko hobekuntza. Gakoetako bat hori da. Zein punturaino egiten diote mesede aurrerapen teknologikoek txirrindularitzari? Ikuskizuna kaltetzen al dute? Neurri batean, baietz uste dut, guztia kalkulatuago dagoela. Orain, hori konpontzeko zer egin daitekeen, arrastorik ere ez. Txirrindulari bakoitzak gauza bat esango dizu. Hanka sartzeko ausardia sumatzen dut faltan, eraso kamikazeak, anarkia apur bat, zaletuak “engantxatzen” dituzten txirrindulari oldarkorrak. Sofan eserita gaudela hori esatea erraza da, jakina, baina… nola uztartu zientzia eta ikuskizuna, makina eta bihotza? Ea abian den denboraldian txirrindulariek halakorik lor daitekeela erakusten diguten!

Amaitu baino lehen gauzatxo bat. Sarri aipatu dudan Tropela.net-ek porra-egutegia zabaldu du. Bihar hasiko den Paris-Niza lasterketak irekiko du aurtengo edizioa, txirrindularitza denboraldian murgiltzen hasteko aitzakia bikaina.

Informazio gehiago:

Sky, un equipo ciclista con tecnología F-1 de McLaren (As.com)

Bradley Wiggins dismisses claim that pro cycling hates Team Sky (Guardian)