Atletismoa, futbolaren erritmopean

Atalak: Atletismoa, Futbola

Sinadura-bilketa abiatu dute hainbat atletismo klubek Katalunian, bi hilabetez Cambrils hiriko atletismo-pista erabiltzerik ez baitute izango, haurren mailako (6-12 urte) futbol txapelketa bateko partidak jokatuko direlako bertan. Korrika egiteko eremuan harmailak jarriko dituzte, eta pista barruko belardian futbol 7-ko hiru zelai. Erabakia atzera bota dezatela eskatu diete sinatzaileek arduradun politikoei, 500 atleta entrenatzeko eta lehiatzeko lekurik gabe geratuko direlako, hain justu kilometro gutxira dagoen Tarragonako atletismo-estadioa obratan dagoenean, 2018ko Mediterraneoko Jokoei begira.

Cambrilsen gertatutakoak agerian jarri du –beste behin– gure gizartean futbolak duen indarra eta, bide batez, beste kirol batzuen ahultasunak azaleratu. Eta ez, ez zaitezte gaiztoak izan, albistea ez dut blogera ekarri Anoeta berriaren auziarekin nolabaiteko paralelismoa egiteko 😉

Atleten haserrea testuinguruan kokatu aldera, Fosbury.cat webguneak hainbat datu jaso ditu: Katalunian futbol 11-ko 944 zelai eta futbol 7-ko 44 daude; eta 91 atletismo pista.

Hego Euskal Herriko datuak

2015ean egin zen EAEko kirol instalazioen errolda berria. Zerbitzuaren webgunean bilaketa azkarra eginda, datuok jaso ditugu: “Futbol zelaiak” kategoriaren barruan 260 instalazio daude (“kirol-gune” eta “ohiko-guneak” albo batera utzita), eta “Atletismoa” kategoriaren barruan 51 instalazio.

Nafarroaren kasuan, 2005eko Espainiako Kirol Instalazioen Erroldaren arabera, 26 atletismo-instalazio zeuden duela hamabi urte, eta 621 futbol zelai.

Mediterraneoko Jokoak eta Joko Olinpikoak, puntu beltz bi

2018ko Mediterraneoko Jokoak aipatu ditugu. Bada, berez, 2017an ziren egitekoak, baina urtebete atzeratu dira baliabide ekonomiko faltagatik. Tarragonako Udaleko oposizioak “irrigarritzat” jo zuen erabakiaz erreportajea plazaratu du El Confidencial agerkariak.

Bestetik, 2024ko udako Olinpiar Jokoak hartzeko bi hautagai daude bakarrik: Paris eta Los Angeles (AEB). “Bi hautagai baino ez, azken galbahea pasatu zuten beste hiru hiriek atzera bota dituztelako hautagaitzak hiritarren presioarengatik”, Berriako kazetari Imanol Magrok nabarmendu duen moduan: “Munduko kirol ekitaldi handiena hartzeak distira galdu du, eta hautagai diren hirietako biztanleek ez dute horrelako kosturik nahi euren gain”.