FARC eta bere futbol talde profesionala: Gerrillariek ere “gol!” egin nahi dute oihu

Atalak: Futbola, Kolonbia

FARCeko gerrillariak futbolean, artxiboko irudian. Nork daki, agian, hemendik urte batzuetara lehen mailan arituko dira, arrosa paparrean / El Espectador

Alderdi politiko bilakatu den FARCek futbolari gazteak hezi eta profesional bihurtzea du helburu, erakundeko Kirol Zuzendaritzako kide Edgar Cortések adierazi duenez. Blu Radio irratian egin dioten elkarrizketan, azaldu du vereda-guneetan futbola eta oro har kirola oinarri duten ekimenak burutuko dituztela, gizarteratzea xede.

Asmoa da gazteak trebatu, erregional mailan jokatuko duten taldeak osatu eta denborarekin hiru talde profesional izatea La Paz F.C. izenpean, B mailakoa eta 20 urtez azpikoa gizonezkoetan, eta emakumezkoen bat. Talde horiek osatuko dituzte gerrillari ohiek, gatazkaren biktimak eta gerra sufritu duten komunitateetako kideak, El Espectador egunkariaren erreportajean irakurri daitekeenez.

Ez da erraza izango, baldintza zorrotzak bete behar dituelako. Besteak beste, nazioarteko legediari egokitutako estadioa beharko luke klubak eta, gaur gaurkoz, Alberto Buitrago Hoyos futbol zelaia soilik baliatu ahal izango lukete, inbertsio handia egin ostean gainera. Konplikatua izanik ere, bide horretan lan egiteko prest agertu dira FARCeko kideak. Halaber, Kolonbian futbol profesionala kudeatzen duen Dimayor elkarteko presidente Jorge Perdomok adierazi duenez, litekeena da La Paz klubeko hiru taldeei ateak irekitzea, baldintza guztiak betetzen badituzte bederen.

Bartzelonaren “La Masia” eredu

“Kontua ez da fusila utzi eta baloia hartuko dudala esatea, erraza balitz bezala; badakigu futbolean aritzea gauza bat dela eta futbol profesionala beste bat”, dio Edgar Cortés berak, El Mundo egunkariak plazaratutako kronikan. Helburu hori dute, ordea, eta ba omen daukate nori begiratu: Bartzelona taldearen harrobiari, La Masia ezagunari. “Bartzelonan izan nintzen nola funtzionatzen duen bertatik bertara ikusteko”, mintzo da Cortés, bere garaian Santa Fe klubeko zuzendaritzako kide izan zenak. “Eredu hori jarraitu nahi dugu, herrialde bakoitzaren berezitasunak aintzat hartuta”.

Informazio gehiago: FARC eta futbola

FARCek René Higuita futbolari ohiari gonbita luzatu dio senatuko zerrendan sartzeko (Futbolrebelde)

Maradona futbolari ohia Bogotako zeremoniara gonbidatu du FARCek (La Vanguardia)