Lapurdiko Arraun Taldea: emakume kirolarientzat erreferente berria

Atalak: Arrauna

Bi urte besterik ez dira pasa 2016an gizonezkoen Lapurdiko Arraun Taldea (LAT) sortu zenetik, Donibane Lohizuneko Ur Joko eta Angeluko Ibaialde taldeetako kideez osatua. KAE 2 ligan hamabi estropada irabazita, KAE 1 ligara igotzea lortu zuten. Ezustekoa izan zen hura, eta honakoa ere ez da gutxiagorako: emakumezkoek trainerua (Ipar Haizea) osatu dute aurreneko aldiz.

Ipar Haizea traineruko emakumeak, entrenamendu saio batean / LAT

Aitor Manterola kazetariak Ur Joko klubeko presidente eta LATeko buruetako bat den Bixente Etxegarai elkarrizketatu du Iparraldeko Hitza egunkarian: “Hemen, Lapurdin, nesken kirola sustatu nahian ari gara, eta guk gure kirolarekin ekarpena egin nahi izan dugu lan horretan. Emaitza handirik ezingo dugu lortu, lehen urtea izanik. Ahalik eta txukunen ibiltzea da gure asmoa”. Etxegaraik azaldu du “denon kontua” izan dela: “Lapurdi osatzen dugun bi klubetan zegoen gogoa nesken taldea ateratzeko, eta, neskek ere bazutenez asmoa, hemen gara, traineruarekin. Esaten da errazena abiatzea izaten dela, eta gure nahia da egitasmoak segida izatea datozen urteetan, iraun dezan luze. Gure asmoa hori da, eta denborak esango du lortzen dugun ala ez”.

Oriako jaitsieran egin zuen debuta Ipar Haizea traineruak, pasa den hilean:

Guruzne Azpiroz da entrenatzailea, eta arraunlarietako bat Izarne Molina Dupain ziburutarra: “Hamazazpi gara denera. Justu antzean gabiltza kopuruz, baina ezin gara kexatu, taldea osatzeko gai izan gara eta”. Molinak dio arraunlari guztiak iparraldekoak izateak “zerbait berezia” ematen diola taldeari. “Maila pixka bat lortu nahiko genuke lehen urte honetan. Mutilen taldeak ilusioa sortu du, eta ea guk ere gure ekarpentxoa egiten dugun”.

Informazio gehiago

Arraun taldeko emakumeei elkarrizketa France Bleu irratian (euskaraz):