Zikloturistak, ziklo asko, turismo gutxi

Atalak: Kirola

Milaka lagunek hartzen du parte Quebrantahuesos martxa ezagunean. Denak ez doaz lehiatzera, baina...

Ekainean Quebrantahuesos bizikleta martxa ezaguna egingo da Jaca (Espainia) inguruan. Ahal den moduan bukatzeko helburuarekin aterako dira batzuk, ahalik eta denbora onena egiteko asmoz besteak. Irabaztea izango dute batzuek xede. Quebrantahuesos martxa bat baita, baina (profesional frustratu batzuentzat) lasterketa izaera hartu duena, denbora eta sailkapen ofizialekin.
“Zikloturistaren eredua zaharkiturik dago”, diote Araba, Bizkaia eta Gipuzkoako txirrindularitza federazioetatik: “Eredua berplanteatu behar da, Europa ispilu gisa hartuta. Ez daude irteera bateratuak –tropelak banatuta abiatzen dira–, ez denborarik, ez sailkapenik”. Gurean, zikloturista asko lehiatzera ateratzen dira horrelako probetan, markak apurtzera. Entrenamenduetan 3.000 kilometro ez dira paisaiaz gozatzeko egiten.

Sarri entzun dugu martxa zikloturistak konpetizio bihurtu direla, baina harritu egin gara etiketa hori Jaurlaritzaren Barne Sailak bere egin duela irakurtzean. “Araudi berriak proba zikloturistak lasterketatzat joko ditu”, dio Deiak. Horrek esan nahi du litekeena dela martxa ugari bertan behera uztea, Gipuzkoako guztiak, adibidez, ez dagoelako nahikoa ertzain ohiko lasterketen eta hala izendatu berri dituzten proben beharrizanak kubritzeko. Barne Sailak ez du ziklistengatik ertzain gehiago mobilizatu nahi: astebururo lau lasterketa egin ahal izango dira herrialde bakoitzean. Egutegia bete-betea dagoenez, martxak izango dira kaltetuak, federazioek hala erabakita: “Guretzat izugarria da halako erabakia hartzea. Guraso batzuei euren seme-alabetako bat aukeratzeko eskatzea bezala da”.

Barne Sailaren –eta federazioen– erabakia neurriz kanpokoa da, zentzugabea eta mingarria, baina gure burua zikloturista gisa hartzen dugun askorentzat ikasgai ona izan daiteke. Agian, irteera lerroan ordulariari beste begi batzuekin begiratuko diogu. Edo etxean lagako dugu, nork daki.