Super heroi homosexualek badute botererik?

Atalak: Literatura

Rawhide Kid

Brokeback Mountain. Askorentzat ezaguna izango da film hori, entzutez bada ere. Gizonezko bi bakeroren arteko maitasun istorioa kontatzen du. Nik ez dut ikusi, baina badirudi bi protagonistek elkarri musu ematen diotela momenturen batean, eta laztanak ere badirela tartean, noski. Ezer asaldagarririk ez, bi gizonen arteko harremanaz hitz egiten ari ez bagina. Baina bi gizonen arteko harremanaz ari gara. Eta hori mundu guztiak ez du begi onez ikusten. Italiako RAI Due telebista kateak adibidez film horretako eszena batzuk zentsuratu ditu. Bien bitartean, hirugarren cowboy batek, Marvel-ek 1950eko hamarkadan sortutako Rawhide Kid-ek, Ibiltari bakartia maite duela aitortu du komiki batean.

Horrela esanda barregarria gerta dakioke norbaiti, baina Marvel-en “estrategiak” politika arlora ere egin du salto. Tira, agian zuzenagoa litzateke politika arlotik salto egin duela esatea. Barack Obamak irabazi zituen hauteskundeetan, presidentea aukeratzeaz gain, herritarrek gai konkretuei buruzko galderak erantzun behar izan zituzten. Kaliforniarrek, esaterako, ezkontza homosexuala onartzen al duten –Obama alde dago– erabaki behar zuten. Ezezkoak irabazi zuen. Eta Obamak ere bai. Alegia, Kaliforniako estatuan Obamak lortu zuen boto gehien, baina homosexualitateari buruzko galdera zehatzari ezetz erantzun zioten herritarrek. Ordura arte, Kalifornian ezkontza homosexuala legezkoa zen (duela gutxi onartu zuten), baita Massachusetts eta Connecticut estatuetan ere.

Kontua da hauteskundeen aurretik Hollywood-eko izarrek Arnold Schwarzenegger Kaliforniako gobernadore gihartsua presionatu zutela, homosexualen ezkontzak ez debekatzeko, eta presio horrek Marvel eta DC bezalako argitaletxeak arrastoaren gainean jarri zituen: Komikiko super heroi bat homosexuala izan al daiteke? Arrakastarik izango al du?

Dena den, galdera hori ez da berria. Eta argitaletxe indartsu horiek erantzuna topatzen saiatu dira aurrez ere: Iparraldeko Izarra izeneko mutante kanadarra da horietako bat –badaezpada, hobe saiakerak heroi atzerritar batekin egitea…–, baina Midnighter eta Apollo pertsonaien kasuak izan zuen oihartzunik handiena. Harreman gay batzuez hitz egiten ari garela ez dugu ahaztu behar, super heroi lesbianen adibideak gehiago –eta zaharragoak– direlako. Sebas Martin komikigileak badu azalpen bat: “Agian, emakumezkoen homosexualitateak gizonezkoen sexu fantasiak elikatzeak izango du zerikusirik. Komertzialki arrakasta izan dezake, gizonezkoen  homosexualitatea publiko gay bati zuzendurik dagoen bitartean”.

Kontuak kontu, badirudi super heroi ezagunen komiki argitaratzaileek bide berria topatu dutela. Oraingoz ez dute saiakera gehiegi egin, baina nork daki,  agian Batman eta Robin-ek elkarri maitasuna adieraziko diote aurki (Barkatu hain adibide “matxakatua” txiste erraz baten pare erabiltzea, baina bikote hori gay kulturaren ikono bilakatu da jada).

Ez dakigu Brokeback Mountain ere ikono bihurtu den ala ez, baina Italiako telebista publikoak behintzat ahaleginak egin ditu hala ez gertatzeko. RAI Due kateak film hori eskaini zuen pasa den astelehenean, baina bi gizonen arteko maitasun keinu guztiak ezabatu egin zituen. Telebistako arduradunek akats baten ondorio izan zela adierazi zuten, eta osorik emango dutela agindu dute. Auskalo. Dena den, “akats” arraroa da, 2005eko Veneciako Mostran film horrek sari ugari lortu baitzituen.