Beasain eta Bergara arteko bidesariak, noren mesedetan?

Atalak: Sailkatu gabea

“Eskuratu ezazu ‘Abiatu’, beherapen handiak lortuko dituzu, eta oso erosoa da!”. Aurpegia behar da gero…

Goizean jarri dut Abiatu sistemaren tramankulua autoaren aurrealdeko kristalean, konpainia egingo diena IAT pegatinari eta herriko zonalde batzuetan aparkatu ahal izateko “bertakoa” dioen berriago bati. Ordainpekoa bilakatu baita Beasain eta Bergara arteko A-636 errepidea. Arkuak pasatzeko makurtu egin behar, Goiberri aldizkarian irakurri dugun moduan. Bizitza neurririk gabe ari da garestitzen, eta hala ere denon ongizatea dutela helburu esaten digute agintariek. “Langileak eta ikasleak dira errepide hori gehien erabiltzen dutenak, eta bidesaria bezalako gastu bat gehiago izateak edo hori saihesteko hartu ditzaketen alternatibek, ez dut uste haien bizitzetan positiboki eragingo duenik”, dio Ezkio-Itsasoko alkate Joseba Telleriak.

Asier Zaldua kazetariak, bestalde, bidesarien aurka aritu den plataformako kideen hitzak jaso ditu Noticias de Gipuzkoa egunkarian: “Beasain-Bergara autobidea erabiltzen duten ibilgailu arinek 420 euro ordaindu beharko dute urtean. Hurrengo urteetan gehiago ordaindu beharko dute, gainera, igoera dagoeneko onartua baitago. Neurri honek inguruko alkateen oniritzia du: Urretxu, Legazpi, Beasain, Zumarraga… Baita EAJ eta PSE-EE alderdiek udaletan eta batzar nagusietan dituzten ordezkarien oniritzia ere. EH Bilduk eta Elkarrekin Gipuzkoak abstentzioa eman dute bidesaria tramitatzeko garaian, baina azken botazioan aurka bozkatu zuten. PP zen aurkako botoa ematen zuen bakarra, baina azken botazioan alde bozkatu zuen”.

Aintzane Oiarbide Bide Azpiegituretako diputatuari gezurra esatea leporatu diote: “Bere argudio nagusia Europak bidesariak ezartzea agindu duela da. Hori ez da hala. Ekologia ere aipatu du: bidesariekin errepide zaharra auto gehiagok erabiliko dute eta, hala, CO2 isurtzeak handiagoak izango dira eta herriek kontaminazio akustiko handiagoa jasango dute. Aldundiaren azken argudioa kostuarena da. Gainontzeko azpiegitura guztiek bezala, kostu bat izan du, noski. Baina zenbat zerga ordaindu ditugu azken urte hauetan? Gainera, errepidea egunero 9.000 ibilgailuk erabiliko dutela kalkulatzen da. Argi dago urte gutxiren buruan amortizatuta egongo dela. Bidesaria kobratzeari utziko al diote orduan? Ez dirudi hala izango denik. AP-8a duela asko amortizatu zen eta ez diote bidesariak kobratzeari utzi, besteak beste kudeaketa txar batzuk estali ahal izateko”. Halaber, ibilgailu pribatuaren alternatiba izan zitekeen garraio publikoaren gabeziak azaleratu ditu Oiarbidek, tren batzuk kendu izana adibidez.

Pentsatzen dut jende askok sentipen bera izango duela. Argiaren prezioaren igoera basatia, gasa, erregaia, errepideak… eta hori guztia pandemia zerriaren erdian. Jendea geroz eta itoago dago, eta hala ere ongizateaz hitz egiten diguzue…