Zorroztasun historikoaren izenean: dragoiak bai, bikingo beltzaranak ez

Atalak: Zinema

Nico Parker aktoreak beteko du Astrid-en papera, Zure dragoia nola entrenatu filmean.

Antzekoak hainbatetan entzunagatik ere, oraindik ere bitxia gertatzen zait ikustea jende bat nola mintzen den fikziozko film bateko pertsonaien ezaugarriak gustuko ez dituelako. Orokorrean, haserreak lotura du pertsonaiaren azal kolorearekin, “ilunegia” izan ohi delako normalean, eta hezur-haragizko aktoreak izango dituen How to Train Your Dragon (Zure dragoia nola entrenatu) filma ez da salbuespena. Animaziozko bertsioa estreinatu eta hamabost urtera dator –datorren ekainean helduko da zinema aretoetara– eta jada ematen ari da zeresanik, Astrid izeneko pertsonaiaren papera Nico Parker aktoreak beteko duelako. Jendea haserretu da, batetik, bikingo guztiak zuriak baino zuriagoak eta ilehoriak zirelako; eta bestetik, marrazki bizidunetako pertsonaiari traizioa egitea delako –Astrid gaixoa, sufritzen egongo da–.

Euren haserrea “zorroztasun historikoarekin” justifikatzen dutenentzat, Laia San José historialari eta eskandinaviar munduan adituak zera idatzi du X sarean:

Drama guztia dator Astrid-en papera beteko duen aktorea ez delako “zuri garbia, antzinako eskandinaviar munduko pertsona guztiak bezala”. “Thor hori lodia dago”-ren sortzaileek orain zera diote: “bikingoek ez zuketen pertsona hori onartuko”. Enbarazu egiten die Astrid ilehoria ez izateak, film batean non dragoiak dauden, adardun kaskoak eta zorroztasun historikorik bat ere ez (izan ere, errepikatu nirekin, FIKZIOA da). Traba egiten dizuen horrek, egiaz, izena du.

Eta jarraitu du:

Bikingoak ez ziren kultura genetikoki homogeneoa zeren eta a) Zer esan nahi du genetikoki homogeneoa horrek b) Ikerketa genetikoek ez dute babesten c) Ez ziren ez “kultura” bat, ez “etnia” bat ezta “arraza” bat ere. Gauzatxo batzuekin filiak badituzue, aztertzeko modukoa da.

Bestalde, bada haserre edo deserosotasuna justifikatzen duenik ere pertsonaiaren ezaugarriak ez datozelako bat jatorrizkoarekin. San Josék horri buruz:

Hori beste gauza erabat legitimoa da: live action baterako hautatu duten aktorea gustuko ez izatea edo zure usteekin bat ez etortzea, ez duelako jatorrizkoaren antzik edo zuk beste modu batera irudikatu zenuelako (liburu batzuen egokitzapenarekin gertatzen den moduan). Baina nik azpimarratzen dudana da hain argumentu faltsuak baliatzea, gustuko zergatik  ez duzun azaltzeko aitzakia gisa.

Film berriaren zuzendari Dean DeBlois ere mintzatu da gaiaz:

Aktore askorekin egin genituen audizioak, animaziozko pertsonaien antza zeukatenekin tartean. Baina pertsonaien izpiritu eta izaera hobekien gorpuzten zutenak aukeratu genituen. Izan ere, bertsio honetako tribua, bikingoak heldu ziren leku guztietako dragoi-borrokalari onenen ondorengoek osatzen dute”

Dragoiak. Haien presentziak ematen du pistarik, historiarekin oso fidela ez den istorioa kontatuko digutela pentsatzeko. Hortik aurrerakoak, izena du.