FIFA eta UEFAren epelkeria, futbol zelaietako beroa

Atalak: Sailkatu gabea

Pasa den astean albistea plazaratu genuen ARGIAn, litekeena zela UEFAk, Europako futbol organo gorenak, bozketa egitea, hark antolatzen dituen txapelketetatik Israelgo klubak eta selekzioa kanporatu ala ez erabakitzeko, palestinarren aurkako genozidioa dela-eta. Espero zena gertatu da, ordea: UEFAk eta FIFAk adierazi dute ezetz, ez dela momentua bozketa egiteko, AEBetako presidente Donald Trumpek aurkeztutako “bake planaren” inguruan negoziaketak hasi behar dituztelako bi aldeek. Bien bitartean, asteburu honetan ere genozidioa salatzeko ekintzak egin dira futbol estadio ugaritan, Euskal Herrikoetan barne. Palestinar herriarekiko elkartasun mezuak ozen entzun dira, nahiz eta Espainiako Liga eta Movistar telebista katea horiek isilarazten saiatu diren.

San Mamesen, Mallorcaren aurkako partida hasi baino lehen, Athletic-ek ekitaldia egin zuen, Athletic Palestinaren alde, Stop genozidioa lelopean.  Euskal Herrian bizi diren 11 errefuxiatu palestinar zelai erdira atera ziren, UNRWAko ordezkariekin eta Honey Thaljieh jokalari ohiarekin batera –Palestinako emakumezkoen futbol selekzioaren sortzaileetako bat da Thajieh, eta zuri-gorrien enbaxadorea–. Harmailetan ziren milaka ikusleen babesa jaso zuten, Iñaki Williams kapitaina ere hurbildu zitzaien… baina Movistar kateak ez zuen irudirik eskaini. Kontrara, ekitaldia hastean estadioaren kanpoaldeko irudiak eman zituen, eta amaitzean ez zuten haren berri eman.

🎥 INSIDE I Lehoiek berriro irabaztea lortu dute San Mamesen.

Garaipenaren atarian Palestinari egindako omenaldi sentitua bizi izan zen, bai soropilean bai harmailetan ere.#StopGenozidioa 🇵🇸#AthleticMallorca #AthleticClub 🦁 pic.twitter.com/iebw9jU2jM

— Athletic Club (@athletic_eus) October 5, 2025

Sadarren, bestalde, Osasuna eta Getaferen aurkako partida jokatzen ari zenean, zaleek dozenaka tenis pilota jaurti dituzte zelaira, eta pankarta zabaldu dute: Israel suntsitu.

Mendizorrotzan, Alaveseko zaleek elkarretaratzea egin dute Elxen aurkako partida hasi baino lehen, eta Iraultzako kideek tifoa zabaldu dute, Gernika koadroaren bertsioa, 20.000 haur baino gehiago erailak eta Genozidioa stop. Palestina askatu mezuekin batera.

Eta, Anoetan, Bultzadako zaleek Rayoren partida hasi eta bost minutura bete dute Hego Harmaila, Palestinarekin elkartasunez. Rayoko Bukaneros taldeko zaleek bat egin dute protestarekin.

“FIFAk ezin ditu arazo geopolitikoak konpondu”

Esan dugu jada, UEFAk eta FIFAk entzungor egin diote Israelgo klub eta selekzioa txapelketatik kanporatzeko hamaikagarren eskaerari, “futbola eta politika ez dira nahastu behar” mantraren bertsio sofistikatuagoa aurkeztuta arrazoitzat: “FIFAn, zatitua den mundu bateko pertsonak futbolaren bitartez batzeko konpromisoari eusten diogu”, adierazi du erakundeko buru Gianni Infantinok: “Gure pentsamenduak, munduan dauden gatazka ugarietan sufritzen ari diren pertsonengan daude. Futbolak uneotan transmititu dezakeen mezurik garrantzitsuena bakearena eta batasunarena da. FIFAk ezin ditu arazo geopolitikoak konpondu, baina futbola mundu osoan sustatu behar du, bere hezkuntza, kultura, gizatasun eta batasun balioak baliatuz”.

Infantino, geopolitika albo batera uzten ageri den argazkietako batean.