Apustu etxeak: zure idoloak kamisetan darama auzoa kolonizatu duen enpresaren logoa

2018-07-12  //  Gizartea, Kirola  //  Iruzkinik ez

Alavesek fitxatu berri duen Jonathan Rodríguez, eta Bilbao Basketeko Alex Mumbrú. Apustu etxeen izenak ageri dira bi kamisetetan.

Italiatik heldu da gaiari heltzeko aitzakia eman digun berria: Gobernuak debekatu egingo ditu apustu etxeen iragarkiak, baita enpresa horiek futbol taldeak babestea ere.

Dekretua, ezusterik ezean, 2019ko urtarrilaren 1ean sartuko da indarrean, ludopatia borrokatzeko helburuarekin. Apustu etxeen iragarkirik ez dute emango hedabideek, ezta gainerako plataformek ere; halaber, kirol taldeen babesle izateari utziko diote. Duela astebete izan genuen debekuaren berri. Egun berean, Alaves futbol taldeak iragarri zuen BetWay apustu etxe ingelesa izango dela klubaren babesle nagusia. Eta gaur, artikulua publikatzear genuela, beste albiste hau irakurri dugu Uztarrian: Azpeitian irekitzekoak diren apustu etxearen aurkako elkarretaratzea deitu du Elkar-ekinek uztailaren 26rako.

“Duintasunaren dekretua” deitu dio Italiako Gobernuak. “[Jokoaren industria] handiegia bilakatu da, herritarren osasunaren eta duintasunaren lepotik”, adierazi du Luigi di Maio diputatuen ganberako presidenteordeak. Apustuak “familiak hondoratzen” ari direla dio, eta horrek eragina duela osasun publikoaren aurrekontuetan. Azken datuen arabera, 2017an 400.000 italiarrek izan zituzten “arazoak” apustuekin, duela hamar urte baino lau bider gehiagok.

Dekretuarekin kritikoen agertu direnetakoak futbol taldeak dira. Ez da harritzekoa, kontuan hartzen badugu lehen mailako –A Ligako– taldeen erdia baino gehiago babesten dituztela apustu etxeek. A Ligak oharra plazaratu du, dekretuak “izugarri kezkatzen” duela azalduz, italiar taldeak desabantaila-egoeran jarriko dituelako, apustu etxeekin babesletza akordioak sinatzen jarraituko duten  Europako gainerako klubekin alderatuta. Ligak 700 milioi euro galduko dituela aurreikusi du.

BetWay eta Alaves, Kirolbet eta Baskonia, RETAbet eta Bilbao Basket…

Italiako Gobernuak norabide berean egiteko eskatu dio Europar Batasunari. Oker gabiltza agian, baina gaur egungo panorama ikusita, nekez helduko diote zenbaitzuk enbidoari. Ez daukagu adibide bila urrutira joan beharrik…

Esan dugu Alavesek akordioa sinatu duela BetWay ingelesarekin, zeinak basten dituen Espainiako lehen mailan ari diren Leganes eta Levante taldeak ere, besteren artean. Ez dira bakarrak, ezta gutxiago ere. 2017-18 denboraldian, Santander Ligan jokatu zuten 20 taldeetatik, 15ek apustu etxeak zituzten babesleen artean. Lautik hiruk. Tartean Alaves berak, Athleticek, Realak eta Eibarrek, KirolBet euskal enpresaren eskutik, zeinak babesten dituen baita Osasuna eta Baskonia saskibaloi taldea ere.

[Eguneraketa/zuzenketa, 2018-08-01: Haserrea sarean Athleticek eta Eibarrek babesle ofizial apustu etxe bat –Bet365– izendatu ostean]

RETAbet Bilbao Basket ere behar da aipatu, saskibaloia orohar, Euroligaren babesle nagusia izan den Betfair erreferentzia nagusitzat hartuta. Gurean hamaika adibide gehiago ditugu: Codere eta pilota, Kirolbet eta estropadak, Kirolbet eta ziklismoa…

Apustuak egiteko Kirolbet enpresaren karpak, Kontxako estropadetan / Kirolbet

Londres, Madril, Gasteiz, Azpeitia…

Horregatik diogu Italiako Gobernuak emango duen urratsa nekez imajina dezakegula, oraingoz bederen, Europako gainerako herrialdeetan, ez behintzat Espainiako Estatuan. Litekeena da, halere, eztabaida piztea apustu etxeen inguruko araudiaz, adikzioaren hariari tiraka; edota orohar joko-areto fisikoek (ez soilik kirol apustuek) auzo batzuetan izan duten hazkundearen inguruan, Gasteizen, Judimendiko gazteek Auzoan jokoz kanpo. Joko aretoen hainbat argipen liburuxkan bildu dituzten ondorioen ildotik.

Azpeitian ere herritar talde batek kezka azaldu du irekiko duten apustu-areto baten inguruan. “Dirua azkar eta asko irabaztearen ameskeria saltzen dute, jakitun herritar asko behar larrian aurkitzen direla; baina apustu etxeetan irabazleak eta galtzaileak berdinak izaten dira azkenean”, dio Elkar-ekin ekimenak plazaratutako oharrak. “Etxe horien atzean dauden enpresariak sekulako dirutzak egiten ari dira auzo langileetan, jendeak bere behar ekonomikoei erantzuteko apustuaren aukera egiten duelako, askotan. Apustu etxe horien ondorioz, hainbat familia are egoera larriagoan gelditzen dira, aurrez zaila zuten egoera ekonomikoak itota (…) Bestalde, era horretako jardueren ondorio diren mendekotasun psikologiko eta ludopatia kasuetan ere egin nahi genuke azpimarra. Ludopatia kasuak gorantz doaz, bereziki gazteen artean. Jakitun gara apustuaren ohitura aurrez ere errotua dagoela gure herrian, baina horrelako lokal bat publikoari horrela irekitzea alarma guztiak pizteko modukoa iruditzen zaigu”. Hori dela-eta, apustu etxeen aurkako jarrera erakusteko, elkarretaratzea egingo dute uztailaren 26an Balentina Agirre plazan, 19:00etan. [Eguneraketa: Elkarretaratzearen kronika]

Madrilen ere sortu dute ezinegona, Alfredo Pascual kazetariak kontatu duen moduan El Confidencial agerkarian: Las salas de juego exprimen los barrios pobres de Madrid: crecen un 140% desde 2014 (Joko aretoek Madrilgo auzo pobreak zukutzen dituzte: 2014tik %140 egin dute gora). Edo Sara Plazak El Salto-n: Madrid, territorio de apuestas (Madril, apustuen lurraldea).

Fenomenoa ez da berria: El juego es el único negocio que prospera en los barrios pobres de Madrid y Londres (Jokoa da Madrilgo eta Londreseko auzo txiroetan gorantz egin duen negozio bakarra. La Vanguardia, 2012)

Joko-aretoen inguruko argitalpen bat prestatu dute Judimendiko gazteek. (Argazkia: M. Buruaga)

Bien bitartean, kirol emankizunetan irrati eta telebista kateek normaltasunez tartekatuko dituzte apustu etxeen iragarkiak. Eta normaltasunez txertatuko dira euren logoak kirol taldeen kamisetetan edota futbol zelaietako paneletan. Normaltasunez ageri diren bezala, menpekotasuna sor dezakeen substantzia bat aipatzearren, alkoholdun edarien gaineko afixak, garagardo-enpresenak bereziki.  Gogora ekarri behar da, halaber, tabako-enpresek auto eta moto lasterketekin izan duten lotura… Haien iragarkiak debekatu zituzten arte.

Arreta-fokoa, gazteengan

Duela 10-15 urte, moto gidari batzuek uko egin zioten zigarro markak iragartzeari, adinez txikikoak erretzera bultzatzen ari zirelakoan. Zentzu horretan, Tabakismoa Prebenitzeko Espainiako Batzordeko buru Rodrigo Córdobak azaldu zuen 1 Formulak “eragin handia” duela ume eta gazteengan, eta tabako marken logoak autoetan-eta txertatzeak eragin handiagoa zuela telebistan 50 iragarki emateak baino.

Gazteak dira, hain justu, kirol apustuek saldoan harrapatu dituztenak, eta adituak bat datoz esatean arreta berezia jarri behar dela eurengan. Zer egin? Hori beste kontu bat da… Internet bidez egiten diren apustuak, Estatuko apustu eta loteriak, apustu-sare klandestinoak, joko-areto funtzioa eta taberna uztartzen dituzten establezimenduak… bada auziari nondik heldu.

> @Hugo_Saez erabiltzailearen hari mamitsua Twitterren, apustu-etxe eta online-jokoari buruz:

1) Las casas de apuestas y el juego online están en todas partes últimamente. Durante el mundial han protagonizado la mayoría de los anuncios en internet, radio y televisión.

¿A qué se debe su éxito? ¿Cuánto dinero ganan? ¿Cómo consiguen atraer a tanta gente?

👇 Hilo 👇 pic.twitter.com/6xqePoBEqY

— Hugo Sáez (@Hugo_saez) July 16, 2018

> Gaiari buruz gehiago:

Espainiako Ligako futbol talde guztiek dute babesleen artean apustu etxe bat, Realak salbu (oraingoz) (2018-08-21)

Apustu etxeak Britainia Handian: datuak (R. Bayón, 2018-07-30)

Kirol apustuak: Azpijokoa arbitro (ARGIA, 2016-3-20)

Joko-aretoak biderkatu egin dira Gasteizen (Gasteiz Hoy, 2018-05-01)

Kirol apustuak: irabaztea ezinezkoa den jokoak harrapatuta (CTXT, 2018-01-31)

Apustu-etxeak: gure auzoekin ez jokatu (CGT Madrid-Barajas, 2018-06-07)

Jokoaren patronalak ukatu egin du Madrilen %140 areto gehiago dagoenik (Infoplay, 2018-03-15)

Mediterranear Jokoak: Zer desastre da hau?!

2018-06-27  //  Uncategorized  //  Iruzkinik ez

Mireia Belmonte igerilari espainiarrak jarri dio brontzezko domina Diana Margarida Duares portugaldarrari, antolatzaile eta politikarien zain egoteaz aspertuta / EFE

Irudiak ederki islatzen du Tarragonan egiten ari diren Mediterranear Jokoetako nahaspila. 400 metro libreko proba amaituta, lehenbiziko hiru igerilariak podiumera igo ziren, merezitako dominak jasotzera. Inor ere ez zitzaien hurbiltzen, ordea, ez antolatzaileak, ezta agintariak ere. Itxaroteaz aspertuta, Mireia Belmontek erabaki zuen berak jartzea brontzezko domina Diana Margarida Duares portugaldarrari [hemen bideoa]. Hura ikusi eta segundu gutxira azaldu ziren domina banatzaile “ofizialak”, eta eurek bukatu zuten zeremonia. Gertatutakoa anekdota hutsa litzateke, ez balitz zentzugabekeria pilo baten adibide tragikomikoa. Nekez zerrendatu daitezke guztiak, hasi baino lehenago mamitu baitzen desastrea, 2017an egitekoak ziren Jokoak urtebete atzeratzea erabaki zutenean, baliabide ekonomiko faltagatik.

Inaugurazio ekitaldiak ere eman du zeresanik, ez soilik harmailak erdi hutsik zeudelako edota bere estetika “zaharkituagatik”, Ara.cat agerkariak definitu duen bezala, erreferentzia eginez besteak beste espainiar ejertzitoaren parte hartzeari; baizik eta Tarragonako Udalean (PSCk du alkatetza) oposizioan diren taldeek salatu dutenez, ekitaldi horretarako sarrerak selektiboki banatu zirelako kolektibo unionista eta ultraeskuindarren artean.

Hori gutxi ez eta harmailek itxura negargarria erakutsi dute proba gehienetan, borroka libreko epaileek planto egin dute dagokien soldata ordaintzen ez dietelako, badminton jokalari frantziarrek a capella abestu dute euren ereserkia bozgorailuak izorratu egin zirelako, bola-jokoetako zorua ez dago behar bezala… eta, gogorrena, auto ofizial bat gidatzen zuen pertsona batek bost urteko ume bat harrapatu zuen gauerdian Saloun (umea larri dago, baina salbu).

Horrek guztiak, neurri handi batean, itzalean laga ditu kirol markak. Eta azaleratu du kirol ekitaldi ponposo askoren atzean ezkutatzen den errealitatea, finantzaketa publikoaren ingurukoa bereziki. Agintariak epe luzerako ondareaz mintzo ziren, baina…

Informazio gehiago:

75 millones de euros tirados en los Juegos del Mediterráneo de Tarragona (Ciclismo2005)

Kopenhageizatu zeure hiria: bizikletaren ahalmena hiriak eraldatzeko

2018-06-22  //  Uncategorized  //  Iruzkinik ez

Mikael Colville-Andersen hiri-diseinaitzaileak dozena bat grafikoren bidez azaldu du bizikletak zer indar duen hiriak eraldatzeko, oinarri hartuta Kopenhageko (Danimarka) kasua.

[Iturria: Copenhagenize your city: the case for urban cycling in 12 graphs / The Guardian]
[Grafikoak: Copenhagenize Design Company/ Mikael Colville-Andersen]

Biziletak vs autoak: 2016an, bizikleta kopuruak gainditu zuen autoena.

Kopenhage autoan: 37 minutu. Denbora hori behar izan zuen Colville-Andersenek erdigunean bidaia bat egiteko.

Kopenhage bizikletan: 13 minutu. Bidaia bera bizikletaz egiteko behar izan zuen denbora.

Bizikleta trafikoa. 20 urtean bizikletaren hazkundea nabarmen handiagoa izan da Kopenhage erdigunean, Danimarkako beste hiri batzuekin eta herrialdearekin berarekin alderatuta.

Espazioaren arrogantzia. Hans Christian Andersen hiribideko zati bat erakusten duen planoan, gorriz marraztu da motordun ibilgailuei emandako espazioa, alderatuta biziklekin (urdinez), oinezkoekin (horiz) eta autobusekin (berdez). Egunerokoan, lantokira edo ikastetxera joateko hirian egiten diren bidaien artean, bizikletaz egiten da %62; halere, espazioaren %7 hartzen dute. Aldiz, autoen erabilera %9koa da, baina eurentzako espazioak %54 hartzen du.

Zergatik erabiltzen dute hiritarrek bizikleta? Gehiengo handiak (%56) dio joan-etorriak arinago egiten dituelako erabiltzen duela. Beste muturrean daude ingurumenagatik egiten dutenak (%1). Horrek erakusten du akatsa dela bizikleta sustatzeko kanpainak diseinatzea ingurumena ardatz hartuta.

Pertsonak mugitu, ez autoak. Azpialdeko ereduak, XXI. mendekoak, demostratzen du kale baten ahalmena izan daitekeela 10 bider handiagoa XX. mendeko ereduan baino.

#MeToo kanpaina: San Antonio Spurs, animatzaile taldea kendu duen NBAko lehenbizikoa

2018-05-24  //  Generoa  //  Iruzkinik ez

‘Silver Dancers’ animatzaileak, Spurs-en partidu batean / Argazkia: NBA.com

San Antonio Spurs saskibaloi frankiziak erabaki du Silver Dancers emakumezkoen animatzaile taldea kentzea, eta sortzea familia osoari zuzendutako ikuskizunak eskainiko dituen talde mistoa. Erabakia, NBA ligako klub batek lehenbizikoz hartua, kokatzen da #MeToo kanpainaren testuinguruan, zeina sortu zen AEBetako zinemaren sektoreko hainbat emakumek salatu zutenean sexu abusuak sufritu dituztela. Spurseko ordezkarien hitzetan, zaleen artean nahikoa interes pizten ez zuelako kendu dute animatzaile taldea.

Beste kasu batzuetan gertatu den bezala, auto lasterketetako azafaten auzian esaterako, erabakiak eztabaida piztu du, ez soilik interes falta dagoela zalantzan jarri duelako hainbatek; baita erabaki horrek “emakumeen aurka” egiten  omen duelako, lanpostua kentzen zaien heinean. Erabaki horren atzean “purga”-ren presioa dagoela ere adierazi dute batzuek, Orlando Sentinel egunkariko David Whitley kazetariak adibidez.

Beste aldean leudeke, animatzaileen rola baino, rol hori betetzeko modua/janzkera auzitan jarri dituztenak eta, neurri batean bat egiten dutenak F1eko azafaten inguruko artikuluan nabarmentzen genuen proposamenarekin: soluzioa ez da azafata/animatzaileak errotik kentzea, haien lan moldea berplanteatzea baizik; eta, kasu honetan, haien profila anitzagoa bilakatzea.

NFLko animatzaileen salaketak

Hilaren hasieran, NFLko Washington Redskins taldeko animatzaile batzuek salatu zuten Costa Ricara egindako bidaia batean “behartu” zituztela argazki batzuetarako erdi-biluzik posatzea (babesleetako ordezkarien –denak gizonak– begiradapean), eta gaueko  “txangoetan” gizon horiek laguntzea.

Beste jite bateko salaketa jarri zuen New Orleans Saints taldeko animatzaile batek, klubak zigortu zuenean sare sozialetan bere argazki bat plazaratzeagatik (lentzeria pieza bat soinean, zeina taldeko politikaren aurka dagoen), baita, taldeko jokalariak zeuden festa batean parte hartzeagatik. “Diskriminazioa” salatu zuen, besteren artean, NFLko jokalariek ez dutelako araurik animatzaileei dagokienez, eta, aldiz, animatzaileek jokalariak agurtu ditzaketelako soilik “kaixo” edota “jokaldi ona” moduko hitzekin. Halaber, animatzaile bat jatetxe batean baldin badago eta jokalari bat sartzen bada, jatetxetik alde egin beharra dauka.

Atharratzeko eskubaloi taldea, Frantziako txapeldun

2018-05-15  //  Kirola  //  2 iruzkin

Atharratzeko jokalariak, Parisen jokatutako finala irabazita.

Zibero Sports taldeko emakumeek Frantziako Erregioetako Kopa irabazi dute, finalean Kremlin-Bicêtre taldeari 29 eta 24 irabazita.

Partida ia osoa markagailuan aurretik eman dute Atharratzekoek, eta momenturen batean “beldurra” sentitu arren, egoerari aurre egin eta kolektiboki sendo eutsi ziotela nabarmendu du Denise Challa entrenatzaileak. Talde gaztea da Zibero Sports (jokalariek 19 eta 26 urte artean dituzte), Aurore Jargoyhen kapitainak nabarmendu duenez, eta heldu diren lekuraino heltzea pentsatzen ez zuten arren, dio “zuten guztia” eman dutela txapelketa irabazteko.

Biek ala biek adierazi dute “handia” dela kopa Zuberoara ekartzea, eta gauza bera diote taldeko ordezkari Mathieu Tauzin eta Francis Bürgübürük, Xiberoko Botza irratiak jasotako adierazpenetan. Zaleen eta babesleen sustengua azpimarratu dute guztiek.

> Zibero Sports klubari buruz Tardets.com webgunean.

Italiako Giroa hasiko da Israelen, baina ez nahastu kirola politikarekin

2018-05-03  //  Nazioartea, Txirrindularitza  //  Iruzkinik ez

Italiako txirrindulari itzulia Israelen hasiko bada, hasiko da dirua jarri duelako. 10 milioi euro gutxi gora-behera. Netanyahuk, bideoa grabatu duenak non ikus daitekeen nola “entrenatzen” duen Israel CA taldeko ziklistekin, 10 milioi euro jarri ditu, besterik gabe, txirrindularitzaz gozatu eta gozarazi nahi zuelako (ejem). Baina tira, kirola eta politika ez direla nahasi behar, eta hau ez dela une egokia Palestinarren sufrimendua salatzeko eta hori guztia. Ezta, bide batez, ustezko (ejem) dopin auzi batean nahasirik dagoen Chris Froome britainiarraren parte-hartzeaz hitz egiteko ere, zeinak miloi t’erdi euro jaso dituen Giroa lehiatzeagatik. Bihar abiatuko da Italiako Giroa, Jerusalemen egingo den erlojuaren kontrakoarekin. Helikopteroak eskainiko dituen irudiek Israelen aurpegirik atseginena erakutsiko dute. Arrosaz jantziko den lehenbizikoa Froome bada, guztia izango da hain… hain… ez zait termino egokirik bururatzen.

Giani Bartali ohorezko hiritar izendatu eta lehen etapa berari eskainiko diote. Badakizue, II. Mundu Gerran juduak laguntzeko sare batean aritu zen ziklista italiarra. Izendapena merezi duela zalantzan jarri gabe, hain justu orain gertatzea…

Italiako Giroko lehenbiziko hiru etapak Israelen egingo dira. Eskuinean, lasterketa herrialde horretara eraman izana salatzen duen afixa.

Errugbia | Sexu erasoak: egunkariko iragarki-orrietara egin du salto eztabaidak

2018-04-12  //  Errugbia, Gizartea  //  Iruzkinik ez

Stuart Olding eta Paddy Jackson errugbi jokalariak.

2016ko ekainean emakume bat bortxatu izanaz akusatu (eta absolbitu) dituzten Ulster Rugby taldeko bi jokalarien auziak hautsak harrotu ditu Irlandan. Egunkariek tarte handia eskaini diote kasuari, ez soilik kronika edota iritzi sailetan, baita iragarkientzat gordetako orrialdeetan ere. Horrek eman digu atentzioa bereziki.

Martxoaren 28an absolbitu zituzten bi jokalariak (selekziotik eta euren taldetik behin-behinean kanporatuak izan zirenak). Epaiak haserrea eragin zuen Irlandan. Emakumeek manifestazio eta protestak deitu zituzten, eta zientoka izan ziren #IBelieveHer (Emakumeari sinesten diot) traolarekin plazaratutako txio eta Facebook-eko mezuak. Ingurumari horretan, apirilaren 6an, Belfast Telegraph egunkariak orrialde osoa hartzen zuen ordainpeko ohar/iragarki bat plazaratu zuen, Crowdfunding kanpaina baten bidez finantzatua. “Eskatzen dugu bi jokalariok ez ditzatela gehiago ordezkatu ez Irlandako selekzioa, ezta Ulster Rubgy taldea ere”. Kezkatutako zale gisa sinatu zuten oharra. Reprehensible (kondenagarri) terminoak egiten die erreferentzia bi jokalariek trukatu zituzten WhatsApp mezuei.

Bost egun geroago (hilaren 11n), baina, errugbi jokalarien errugabetasuna defendatzen duten ehundik gora herritarrek modu berean erantzun dute, milaka sinadura bildu duen crowdfunding kanpaina batetik abiatuta. Irlandako Errugbi Federazioari eta Ulster taldeari zuzendurik dago gutun hori ere bai. “Gehiengo isilari” men egiteko eskatzen dute sinatzaileek (Benetako zaleek), eta jokalariok berriro onartzeko.  “Kondenagarria dena da sare sozialetako erreakzioa, leporatutako krimena edozein izanik, aho batez absolbitu dituzten gizonak errudun jotzea”, diote. “Nazkaturik gaude ziber-jazarpenaz”.

Irlandako Errugbi Federazioak jakinarazi du kasuaz eztabaidatzen ari direla, eta erabakia hartu bitartean ez duela adierazpenik egingo. Bien bitartean, emakume taldeek protestak deitu dituzte ostiral honetarako, Ulster klubak jokatzen duen zelaiaren kanpoaldean.

Bartzelonatik espainiar kartzeletara: Askatasunaren alde korrika

2018-04-05  //  Herrialde Katalanak  //  Iruzkinik ez

700 kilometroko ibilbidea beteko dute korrikalariek

“Correm per la Democràcia” kolektiboak antolatuta, KMS per la Llibertat errelebo-korrikaldia egingo da apirilaren 27tik 30era bitartean, Bartzelonan hasi eta Alcalá Meco, Soto del Real eta Estremerako espetxeen ateetan bukatu, preso politikoei babesa adierazteko. 300 korrikalarietako bakoitzak 10-13 kilometro egingo ditu, lauko taldeetan, ibilbideak dituen 700 kilometroak osatu arte. Azken zatia oinez egingo dute lasterka arituko diren herritarrek bezala beste hainbat jendek ere, tartean ekimena babestu duten Kataluniako Kirol-Selekzioen Aldeko Plataformako, Òmnium Culturaleko edota ANCko ordezkariek.

“Elkartasuna, justizia, esfortzua, lankidetza, irmotasuna eta iraunkortasuna, horiek dira ‘KMS Askatasunaren alde’ sostengatzen duten zutabeak”, irakurri daiteke, euskaraz, ekimenaren webgunean. “Proiektu honen helburua da baldintzarik gabeko babesa agertzea beren ideiak modu baketsuan defendatzeko askatasuna bidegabe kendu zaien pertsona guztiei. Honakoa kirol-desafio garrantzitsua da, solidarioa, parekidea eta erreibindikatzailea”. Egitasmoan parte hartu edo hura lagundu nahi duen orok, aipatu webgunean eman dezake izena.

Informazio gehiago: Forbury.cat

Sufritzen ari diren matxismoa salatu dute Brasilgo emakumezko kirol kazetariek

2018-03-27  //  Uncategorized  //  Iruzkinik ez

“Emakumeak gara, profesionalak, eta bakean lan egin nahi dugu; errespetua eskatzen dugu”, diote bideoan ageri diren kirol kazetari brasildarrak. Euren jardunean sufritzen duten sexu jazarpena salatzea du xede bideoak, #DeixaElaTrabalhar kanpainaren barruan zabaldua. Euren aldarriak tartekatu dituzte zuzenekoetan jasaten dituzten erasoen irudiekin.

Iturriak: UOL Esporte vê TV, Cheek Magazine

María, kirol-azafata: “Feminismoa da ulertzea emakume guztiok libre garela erabakitzeko zer izan nahi dugun eta zer ez”

2018-03-23  //  Uncategorized  //  Iruzkinik ez

[Oharra: Artikulu laburra beharko lukeena majo luzatu zait. Asteriskoa duten esaldiak dira protagonisten hitzak irakurri ahala sortu zaizkidan zalantzak]

[Idatzitakoen artean, ideia hau nabarmenduko nuke: Soluzioa ez da azafatak errotik kentzea, haien lan moldea berplanteatzea baizik].

(gehiago…)