Emakumeak futbol estadioetara sartu ahal izango dira Saudi Arabian… senarra alboan baldin badute

2017-10-31  //  Futbola, Generoa  //  Iruzkinik ez

Panenka aldizkariaren txioak jarri gaitu albistearen arrastoan: Saudi Arabiako emakumeak Jeddah, Damman eta Riyadh hirietako futbol estadiotara sartu ahal izango dira 2018an, baldin eta senarrekin baldin badoaz.

A partir de 2018, Arabia Saudí permitirá a las mujeres acudir a estadios de fútbol… Acompañadas de sus maridos. ?? pic.twitter.com/AMu08anWz3

— Panenka (@RevistaPanenka) 2017(e)ko urriak 30

Mohammed bil Salman printzeak iragarritako erreformen baitan kokatzen da albistea. Aipatu hirietako estadioetan leku bereziak egokituko dira familientzako. Eta han, emakumeek gizonekin batera ikusi ahal izango dituzte partidak. Eurek bakarrik, oraindik ez.

“Familientzako gunea” pasa den hilean egokitu zen lehendabizikoz Saudi Arabiako estadio batean, Riyadh hirikoan, herrialdeko egun nazionala ospatu zutela-eta. / Faisal Al Nasser – REUTERS

Urrats esanguratsua ala purtzil xamarra den esatera ez naiz ausartzen, ezta Saudia Arabiako emakumeei bizikletan ibiltzeko baimena (egoki jantzita baldin badoaz eta gizonezkoren batek laguntzen baditu) eman izana ere. Are gutxiago Bartzelonako Udaleko Immigrazio, Kultura Aniztasun eta Dibertsitate zinegotzi Lola Lopezek ARGIAn esan dituenak aintzat hartuta: “Islamari erasotzeko egiten da emakume musulmanen eskubideen aldeko diskurtsoa”. Merezi du Saioa Baleztenak egin dion elkarrizketa irakurtzea.

Anne Frank irain bezala baliatzeagatik, haren testigantza estadioan entzun beharko dute Lazioko ultrek

2017-10-25  //  Futbola, Italia  //  Iruzkinik ez

Kokatze aldera: Lazio eta Erroma futbol taldeko ultrek gorroto dituzte judutarrak… besteak beste. Hiriburuko taldeak dira biak, eta estadio berean jokatzen dute, asteburu batean batak, hurrengoan besteak. Erromatar ultrek hego-harmailan ikusten dituzte partidak, iparraldekoan Laziokoek. Laziok Estadio Olinpikoan jokatutako azken partidan, ordea, hego-harmailan jarri ziren, iparraldekoa itxi egin baitzuten, aurreko partidan Sassuolo taldeko jokalari beltzen aurkako irain arrazistak jaurti zituztelako Lazioko zaleek. Baina, esan bezala, azken partidan (Cagliariren aurkakoan) hego-harmailan eseri ziren, inolako arazorik gabe, Claudio Lotito presidenteari esker: denboraldiko-abonuak baliogabetu eta sarreraren prezioa euro bakarrean jarri zuen. Eta hala, Lazioko ultrak Curva Sud delakoan kokatu ziren, Erromako zaleak eseri ohi diren lekuan.

Gauzak horrela, abagunea baliatuz, Lazioko zaleek mezu bat laga nahi izan zieten arerio dituzten Erromakoei. Erromaren kamiseta daraman Anne Franken irudidun pegatinak itsasi zituzten harmailetan, irain moduan.

Iraina, baina, aurka jausi zaie Lazioko ultrei. Italiako lehen, bigarren eta hirugarren mailako partida guztietan isiltasun-minutua egin da, eta Anne Franken egunkariko pasarteak irakurri. Lazio taldeko zuzendaritzak –ultren jokabidea salatu duen Lotitok barne–, bestalde, Erromako sinagoga bisitatu du, eta klubak jakinarazi du urtean 200 ume bidaliko dituela Auschwitzeko sarraski-esparrua bisitatzera. Bolognaren aurkako partidaren atarian, gainera, Lazioko jokalariek Anne Franken omenezko kamisetekin entrenatu dute.

Inter-Sampdoria ahora mismo. Los niños y niñas de antes de cada partido llevan copias de libros de Anna Frank y Primo Levi. pic.twitter.com/S9fb9Yw5RA

— Nacho (@ipatolorente) 2017(e)ko urriak 24

Danimarkako futbol selekzioko neskak greban, haien baldintzengatik protestan

2017-10-20  //  Futbola, Generoa  //  Iruzkinik ez

Suediaren aurkako partida bertan behera utzita, Danimarkako selekzioa Munduko Txapelketatik kanpora lezakete / AFP

Danimarkako emakumezkoen futbol selekzioak iragarri du ez duela Munduko Txapelketarako sailkapen faseko Suediaren aurkako partida jokatuko, larunbat honetan. Soldata igoera eta partiduen atarikoetan DBU Danimarkako Futbol Federazioren kontratupean aritzea eskatzen dute jokalariek, eta haien eskaerak betetzen ez direla-eta, greba egitea erabaki dute.

Erabaki horrekin, Danimarkako selekzioa 2019ko Munduko Txapelketatik at gera daiteke, Philip O’Connor Independent egunkariko kazetariak nabarmendu duen moduan. Kolpe latza litzateke, baina emakumeek hautu hori egin badute…

Las jugadoras suecas, por cierto, han mostrado su apoyo total a sus compañeras danesas

https://t.co/xDulhkZpl1

— Thelonious (@Thelonious81) 2017(e)ko urriak 19

Informazio gehiago:

Emakumezkoen futbola: Argentinako selekzioa greban; Danimarkako mutilak soldataren parte bat emateko prest (2017-09-25)

Norvegian parekatu egingo dituzte futbol selekzioko gizon eta emakumeen soldatak (2017-10-07)

Dopina borrokatzeko kirolariei mikrotxipak ezartzea proposatu dute

2017-10-16  //  Dopina, Zientzia eta teknologia  //  Iruzkinik ez

Mikrotxipak kirolarien pribatutasunari eraso egingo liokeela uste dute askok.

Mundu osoko kirolari olinpikoak biltzen dituen World Olympians Association erakundeko zuzendari Mike Millerrek egin du proposamena: “Maite ditugun txakurrei txipak ezartzen badizkiegu eta kalterik egiten ez badute, zergatik ez ditugu kirolariekin erabiltzen, dopatzen ote diren jakiteko?. Batzuek diote pribatutasunaren aurka egiten duela, baina kirola klub baten modukoa da: nahi ez baduzu, arauak errespetatzeko gai ez bazara, ez daukazu zertan bertako kide egin. Mahai gainean ideia berria jarri besterik ez dut egin. Erreakzioak aztertzen ari naiz baina, zalantzarik gabe, kirolean garbitasuna babesteko tresna berriak behar dira. Ez naiz Steve Jobs, baina argi dut inbertsioak egin behar ditugula, eta eskura dugun teknologia baliatu”.

Pribatutasunaren auzia ADAMS sistemaren eta pasaporte biologikoaren kasuan ere maiz aipatu da, eta pentsatzekoa da gorputzean mikrotxipa ezarri behar izateak haserre are handiagoa eragingo lukeela kirolarien artean. Dopinaren aurkako britainiar agentziako zuzendari Nicole Sapstead-ek gogorarazi du pribatutasuna dela kirolariei dagokien eskubidea, betebeharra den bezala tranparik egin gabe lehiatzea. Halaber, txipen fidagarritasunaz zalantza agertu du: kirolariek aurkituko balute txipak faltsutzeko modua –ez ginateke harrituko, bai baitakigu dopina zientziaren hura detektatzeko mekanismoen aurretik doala maiz–, dopinaren aurkako borrokak fronte berria izango luke zabalik.

> Iturria: Fosbury

Informazio gehiago:

Mikrotxipak giza-gorputzean (El Mundo)

Mikrotxipak giza-gorputzean (Wikipedia)

ADAMS sistemari buzuz, Carlos Verona ziklistaren bideo-blogean

Katalunia independentean, Barçak espainiar Ligan jarraitu ahal izango luke…

2017-10-10  //  Uncategorized  //  Iruzkinik ez

… baldin eta Kataluniako Futbol Federazioa ez balitz (edo ez balute) Espainiako Federaziotik ateratzen, edo gobernuak Kirolaren Legea aldatuko balu. Horiek dira ere Txapeldunen Liga jokatu ahal izateko baldintzak.

Independentziaren aldeko pankartak Bartzelonaren futbol zelaian / 20minutos

Blogeko aurreko artikuluan hizpide genuen Javier Tebas LFPko presidenteak azaldu du ez duela Kirolaren Legea aldatzeko batere asmorik eta, Kataluniak independentzia lortuz gero, hango klubek ez luketela aukerarik izango Ligan parte hartzeko. Baina, esan bezala, kataluniar federazioa Espainiakoaren barnean mantenduko balitz, Liga, Errege Kopa eta Txapeldunen Ligan jokatzeko arazorik ez lukete izango.

Kataluniar federazioak Espainiakoa utziko balu, Kataluniako Liga eratuko litzateke, eta Bartzelonak galdu egingo lituzke Txapeldunen Ligan automatikoki parte hartzeko aukera ematen dioten puntuak. Bartzelonak, Kataluniako Ligaren balizko irabazle gisa, aurre-kanporaketa jokatu beharko luke. Halaber, selekzioekin jokatzean, futbolari kataluniar bakoitzak hautatu beharko luke bere naziotasuna. Kataluniarekin jokatzea hautatuko luketenak erkidegoz kanpokotzat hartuko lirateke.

Auzia, beraz, kataluniar eta espainiar agintarien borondatearen esku dago bereziki…

Iturriak: El Mundo Deportivo / El País

Javier Tebas, unionismoak deitutako manifestazioan

2017-10-09  //  Uncategorized  //  Iruzkinik ez

Baldin badago esaldirik entzuten dudan bakoitzean ostia txarrean jartzen nauena, hori da: “Aizu, futbola eta politika ez dira nahastu behar!”. Bereziki haserretzen naiz goi-esferetako ordezkariak direnean esaldi hori baliatzen dutenak gustuko ez dituzten aldarrikapen edota egitasmoak zikintzeko. Bestetik, kirol munduan baldin badago pertsonaiarik ezinikusi berezia diodana, hori Javier Tebas da, LFPko presidentea, Osasunaren batzarrak ‘non grato’ izendatu zuena, ultraeskuindarra, Espainian Le Pen modukoak beharko liratekeela pentsatzen duena… eta asteburuan bi manifestaziotan parte hartu duena: larunbatean Madrilen izan zen, besteak beste Hazte Oír plataformak eta Guardia Zibilen Foroak deitutako manifestazioan; eta igandean, unionismoak Bartzelonan egindakoan.

Ba, hori, futbola eta politika mar mar mar…

Hoy estuvimos en la plaza Colón, mañana en Barcelona, plaza Urquinaona a las 12h.
Porque Cataluña es España. pic.twitter.com/fJZucVIrR2

— Javier Tebas Medrano (@Tebasjavier) 2017(e)ko urriak 7

España y Cataluña son patrimonio de la Historia y de la gente, no de la política (por más que algunos os empeñéis) @gabrielrufian

— Javier Tebas Medrano (@Tebasjavier) 2017(e)ko urriak 8

Iturria: PlayGround Magazine

Naziak barregarri uzten dituen bideoa plazaratu du Borussia futbol taldeak

2017-09-26  //  Futbola  //  Iruzkinik ez

Borussia Dortmund klub alemaniarrak “Futbola eta nazismoa ez datoz bat” bideoa sareratu du, eskuin muturra hirugarren geratu denean Alemaniako hauteskunde orokorretan. Futbolean jokatu nahi baina dena aldrebes ateratzen zaion nazi talde bat ageri da bideoan.

pic.twitter.com/oN3t19vwT9

— Borussia Dortmund (@BVB) 2017(e)ko irailak 24

Emakumezkoen futbola: Argentinako selekzioa greban; Danimarkako mutilak soldataren parte bat emateko prest

2017-09-25  //  Futbola  //  Iruzkinik ez

Argentinako selekzioko neskek autobusean lo egin behar izan zuten partida baten atarian.

Argentinako futbol selekzioko emakumeek greba hasi dute, bizi duten egoera kaskarra azaleratu eta AFA Argentinako Futbol Federazioa haien baldintzak hobetzera bultzatzeko. Oinarrian hiru gauza eskatzen dituzte: dietak ordaintzea, bidaiatzen dutenean autobusean lo egin beharrik ez izatea eta azpiegiturak egokitzea, alegia, entrenamenduetarako belar naturaleko zelai bat izatea eta aldagela handiagoak erabili ahal izatea. “Ezin da kirol epopeiarik gauzatu protagonistek partidaren egunean goizeko 4ak eta 9ak bitartean bidaiatu eta mikrobusean lo egin behar badute, abuztuaren 30ean Montevideon jokatu genuen lagun arteko partidan gertatu zen moduan”, diote jokalariek.

Iturria: PlayGround

Danimarkako gizonezkoen futbol selekzioko jokalariek euren soldataren parte bat –urtean 67.000 euro– emakumezkoen selekzioari eskaini diote, bi taldeen arteko desorekak bultzatuta. Euren soldata, aparteko gainsari eta txarteldegietako sarreren batura %46 handitzea eskaini die DBU Danimarkako Federazioak, baina jokalarien sindikatuak %342ko igoera eskatzen du, eta partiduen atarikoetan DBUren kontratupean aritzea. “Ezin dezakete guk baino eskubide gutxiago izan, soilik emakumeak direlako”, diote gizonezko futbolariek: “Bi talde nazionalak gara, elkarrekin gaude eta elkarren ardura daukagu. DBUri dagokio orain erantzukizuna hartzea”.

Iturriak: RTVE, BBC

Emakume txirrindularien topaketak Donostian

2017-09-22  //  Txirrindularitza  //  Iruzkinik ez

Karl von Drais alemaniarrak bizikleta asmatu zuela 200 urte bete direnean, 200 emakume biltzea du xede “200EmakumeBizian” egitasmoak.

Hirian, mendian eta errepidean bizikletan dabiltzan emakumeen papera aldarrikatzea da 200EmakumeBizian ekimenaren helburuetako bat. Irailaren 30ean eta urriaren 1ean egingo da Donostian. Kalapie eta Bizikume elkarteek, Gipuzkoako Foru Aldundiko Mugikortasun eta Lurralde Antolaketa Sailak eta Donostiako Emakumeen Etxeak antolatu dute.

Irailaren 30ean mekanika eta bikepacking tailerrak, Emakumeak eta bizikleta: egungo errealitatea eta etorkizuneko proiektuak izeneko mahai-ingurua eta emakume bidaiarien hitzaldiak izango dira, besteak beste.

Urriaren 1ean, bestalde, errepidera aterako dira emakumeak. Goizeko 8:30ean hiru multzotan banaturik ibiliko dira bizikletan: mendi-bideetan batzuk, errepidean beste hainbat eta bide-gorrietatik gainerakoak. 11:30ean Emakumeen Etxean bilduko dira guztiak, eta Donostiako kaleetatik ibiliko dira gero, 13:30ak bitartean. 200 emakume biltzea da sustatzaileen asmoa.

Herri bazkariak borobilduko du ekimena.

> Egitarau osoa
> Izen-ematea

Messik urtebetean irabazten du zuk 2.500 urtean bezainbeste diru

2017-09-12  //  Futbola  //  Iruzkinik ez

30 segundoan 50 euro baino gehiago irabazten ditu Neymar futbolari brasildarrak; sei minutuan, batez besteko soldata (22.800) daukan espainiar batek astebetean irabazten duena bezainbeste. Urtean 45 milioi baino gehiago irabazten ditu Paris Saint-Germain taldeko aurrelariak, egin kalkuluak… BBCren aplikazio hau baliatuta: Zenbat denbora beharko zenuke goi mailako futbolarien soldata irabazteko?

6 minutu. 22.000 euro inguruko soldata baldin baduzue, Neymarrek denbora hori beharko du zuek astebetean irabazten duzuena jasotzeko.

Urtean jasotzen duzuen soldata idatzi eta hauta ezazue zuen burua zein futbolarirekin alderatu nahi duzuen. Ziurrenik 2.000 urte baino gehiago beharko zenituzke futbolari horiek urtebetean jasotzen dutena irabazteko. Futbolaren burbuila. Ulertzea ere kosta egiten zaigun logika burugabe baten ispilu dira datuok. Futbol modernoa omen, futbolarien artean ere arrakalak eragiten dituena. Esaterako, Marta Vieira da Silvak, Munduko Jokalari Onenaren titulua bost bider irabazi duen futbolari brasildarrak, Neymarrek baino 1.218 bider soldata txikiagoa jasotzen du, La Vanguardia egunkariak nabarmendu duenez.