14 eta 12 urteko zigor eskaera Osasunako presidente eta kargudun ohientzat

2017-03-21  //  Osasuna  //  Iruzkinik ez

Osasunako presidente ohi Miguel Archancorentzat 12 urteko zigorra eskatu du fiskaltzak / MARCA

Fiskaltzak 14 urteko kartzela-zigorra eskatu du Angel Vizcay Osasunako kudeatzaile ohiarentzat, eta 12na urtekoa Miguel Archanco presidente ohiarentzat eta Txuma Peralta zuzendaritzako kide ohiarentzat, klubeko diru-kontuetan aurkitutako irregulartasunak eta 2013-14 denboraldiko hainbat partidatako emaitza adostu izana ikergai dituen “Osasuna auziarekin” lotuta.

Vizcay, Archanco eta Peraltari hainbat delitu egozten dizkiete, tartean bidegabeko diru jabetzea, kontabilitatea faltsutu izana eta kirol ustelkeria.

17 lagunentzako zigor eskaerak

Nabarmendu behar dira, era berean, Juan Pascual, Jose Manuel Purroy eta Sancho Bandres zuzendaritzako kide ohientzako zigor eskaerak, 11 urte eta 11 hilabetekoak; baita partiden emaitza adosteagatik fiskalak eskatu dituen 1.950.000 euroko hamar isunak ere: Pascual, Purroy, Bandres eta Betis futbol taldeko hiru jokalari ohirentzat eskatu ditu isun horiek. Futbolariontzat bi urteko espetxe zigorra ere eskatu du.

Halaber, beste zortzi kargudunentzat zigor eskaerak egin ditu fiskaltzak, besteak beste Osasuna Fundazioko zuzendari ohi Diego Maquirrainentzat, higiezinen enpresari Cristina Valenciarentzat, eta kudeaketa batzordeko kide Luis Ibero eta Juan Angel Larrearentzat. Berria egunkariko kazetari Imanol Magrok zerrenda batean bildu ditu zigor eskaera guztiak.

Informazio gehiago:

Berria

Diario de Noticias

Haurren futbol partida batean, gurasoak kolpeka (a ze artaburu puskak!)

2017-03-20  //  Gizartea  //  Iruzkin bat

Tira, “gurasoak” baino, zuzenagoa da “aitak” erabiltzea. Mallorcan gertatu da,  12-13 urteko haurren futbol partida batean. Jokalarietako batek sarrera itsusia egin, kolpea jaso zuen mutikoa besteari oldartu, elkarri bultza egin, harmailetan giroa berotu, eta azkenean bi taldeetako jokalarien aitak elkar jotzen hasi. “Lotsagarria!” eta “nahikoa da!” egiten dute oihu emakumeek. Mutiko baten negarrak bereziki dira etsigarriak: “Aita, aita!”.

Lamentable y bochornoso que ocurra esto en un partido de infantiles disputado en Alaró. #Mallorca
Menudo ejemplo en el #DíaDelPadre pic.twitter.com/KWPZtBpk9f

— #RCDMLive (@RCDMLive) 2017(e)ko martxoak 19

Horrelakoen aurrean zer esan? Lotsagarria dela, gurasoak eredu tamalgarria ematen ari direla, borrokan parte hartu dutenak estadioetatik kanporatu beharko lituzketela… ohikoak dira erreakzioetako asko. Gauza batek kezkatzen gaitu gu. Bada jendea eskatu duena aita horien semeak klubetik kanporatzeko, gertatu den bezala Zaragozan, arbitroa iraindu zuen aitaren kasuan…

Ez dakigu zer esan, baina zerbaitek huts egiten duela, ez da dudarik. Zer arraio ariko dira pentsatzen, zein ikasgai jasoko ote zuten, futbol zelaian zeuden haurrek? Eta harmailetan zeuden haien anai-arrebek? Eta gurasoak, nola sentituko dira? Nola zurituko dute haien burua? Zuritzeko borondatea baldin badute bederen…

Mallorcan gertatutakoa aztertu eta balizko zigorrak ezartzea justizia arruntari dagokio.

Iturria: Diario de Mallorca

Atletismoa, futbolaren erritmopean

2017-03-15  //  Atletismoa, Futbola  //  Iruzkinik ez

Sinadura-bilketa abiatu dute hainbat atletismo klubek Katalunian, bi hilabetez Cambrils hiriko atletismo-pista erabiltzerik ez baitute izango, haurren mailako (6-12 urte) futbol txapelketa bateko partidak jokatuko direlako bertan. Korrika egiteko eremuan harmailak jarriko dituzte, eta pista barruko belardian futbol 7-ko hiru zelai. Erabakia atzera bota dezatela eskatu diete sinatzaileek arduradun politikoei, 500 atleta entrenatzeko eta lehiatzeko lekurik gabe geratuko direlako, hain justu kilometro gutxira dagoen Tarragonako atletismo-estadioa obratan dagoenean, 2018ko Mediterraneoko Jokoei begira.

Cambrilsen gertatutakoak agerian jarri du –beste behin– gure gizartean futbolak duen indarra eta, bide batez, beste kirol batzuen ahultasunak azaleratu. Eta ez, ez zaitezte gaiztoak izan, albistea ez dut blogera ekarri Anoeta berriaren auziarekin nolabaiteko paralelismoa egiteko 😉

Atleten haserrea testuinguruan kokatu aldera, Fosbury.cat webguneak hainbat datu jaso ditu: Katalunian futbol 11-ko 944 zelai eta futbol 7-ko 44 daude; eta 91 atletismo pista.

Hego Euskal Herriko datuak

2015ean egin zen EAEko kirol instalazioen errolda berria. Zerbitzuaren webgunean bilaketa azkarra eginda, datuok jaso ditugu: “Futbol zelaiak” kategoriaren barruan 260 instalazio daude (“kirol-gune” eta “ohiko-guneak” albo batera utzita), eta “Atletismoa” kategoriaren barruan 51 instalazio.

Nafarroaren kasuan, 2005eko Espainiako Kirol Instalazioen Erroldaren arabera, 26 atletismo-instalazio zeuden duela hamabi urte, eta 621 futbol zelai.

Mediterraneoko Jokoak eta Joko Olinpikoak, puntu beltz bi

2018ko Mediterraneoko Jokoak aipatu ditugu. Bada, berez, 2017an ziren egitekoak, baina urtebete atzeratu dira baliabide ekonomiko faltagatik. Tarragonako Udaleko oposizioak “irrigarritzat” jo zuen erabakiaz erreportajea plazaratu du El Confidencial agerkariak.

Bestetik, 2024ko udako Olinpiar Jokoak hartzeko bi hautagai daude bakarrik: Paris eta Los Angeles (AEB). “Bi hautagai baino ez, azken galbahea pasatu zuten beste hiru hiriek atzera bota dituztelako hautagaitzak hiritarren presioarengatik”, Berriako kazetari Imanol Magrok nabarmendu duen moduan: “Munduko kirol ekitaldi handiena hartzeak distira galdu du, eta hautagai diren hirietako biztanleek ez dute horrelako kosturik nahi euren gain”.

Saskibaloi talde batek txapelketa uztea erabaki du, bere jokalariek aurkaria iraindu dutelako

2017-02-17  //  Saskibaloia  //  Iruzkinik ez

Madrilgo (Espainia) Santa Maria del Pinar (SMP) ikastetxeak erabaki du mutilen saskibaloi taldea “Copa Colegial” txapelketatik ateratzea, zentroko ikasle eta jokalari batzuek sare sozialen bitartez aurkaria (Obispo Perelló taldea) iraindu dutelako, plazaratutako oharrean irakurri daitekeen moduan. SMP ikastetxeak “barkamena” eskatu du, eta adierazi eskola-kirolaren baloreak errespetatzea “oso garrantzitsua” dela.

SMP kolegioak babes eta zorion mezu ugari jaso du sare sozialetan.

Txapelketatik ateratzeaz gain, Obispo Perelló ikastetxearen aurkako partida galdutzat emateko eskatu du SMP kolegioak.

Iturria: Kia en zona

Errepidean hildako ziklistengatik, legea aldatzeko eskaera

2017-02-14  //  Mugikortasuna, Txirrindularitza  //  Iruzkinik ez

2013ko urriaren 21ean bizikletan zihoan Oscar Bautista harrapatu eta bertan hil zuen kamioi batek, Toledoko (Espainia) A-42 autobidean*. Gidariak aurrera jarraitu zuen, baina bospasei ordu geroago atxilotu egin zuen Guardia Zibilak. Epaileak, baina, ez du deliturik ikusi, “falta” hutsa baizik, eta gidariak ez du zigorrik jaso.

Oscar Bautista, zikloturista ugarik igo duen Pirinioetako Aubisque mendatean.

Horren aurrean, Bautistaren emazte Anna Gonzálezek “Por una ley justa” (Lege justu baten alde) ekimena jarri zuen abian, “zuhurtziagabekeriazko hilketari” eta “sorospen-eginbeharra ez betetzeari” dagozkion Kode Penaleko artikuluak aldatzeko helburuarekin. Eskaera bideratzeko 200.000 sinadura bildu behar zituen eta, hiru urte baino gehiago pasa direnean, kopuru horretara heltzea lortu berri du.

Martxoaren 2an aurkeztuko ditu sinadurak Kongresuan, berak dioen bezala, auzia “politikarien esku” uzteko. 11:30ean du hitzordua Gonzálezek, eta bizikletaren munduko hainbat eragilek deituta elkarretaratzea egingo dute 11:00etan Kongresuaren ateetan.

Politikariei zuzendutako txio honetan dioen bezala, haien zorion mezuetatik harago, benetako urratsak ematen dituztenean azalduko die Gonzálezek bere esker-on erabatekoa:

Me felicitáis por mi causa #PorUnaLeyJusta.Mi agradecimiento será completo cuando vuestra voluntad y compromiso, se tangibilicen en hechos. pic.twitter.com/UUF71ieS5k

— ANNA GONZÁLEZ LÓPEZ (@ANNAGONZALEZLO1) 2016(e)ko abenduak 15

* A-42an hildako txirrindularia autobidetik zihoan leku horretan ez dagoelako bigarren mailako errepide alternatiborik. Gauza bera gertatzen da, esaterako, N1 errepideko zati batzuetan, Andoain eta Lasarte arteko bide sigi-sagatsuan kasu. Egiari zor, lanerako joan-etorrian (autoan) txirrindulariak aurreratzen ditudanean, nahiz eta ibilgailu denek uzten duten 1,5 metroko tartea, alerta-mekanismoak piztu eta ziklisten segurtasunaz pentsatzen hasten naiz eta…

Joko Olinpikoak eta gehiegizko diru-xahuketa: Rio 2016ko instalazio erdi-abandonatuak

2017-02-08  //  Joko Olinpikoak  //  Iruzkinik ez

Hainbatetan ikusi dugu jada gauza bera: Kirol ekitaldi ponposo bat jasotzeko eraikitzen dituzten azpiegitura erraldoi eta garestiak apenas erabiltzen diren gero. Rio dugu adibide berria, iazko abuztuan Joko Olinpikoak antolatu zituen hiria.

O Globo aldizkari brasildarrak plazaratutako irudiotan, ikus daitezke Barra da Tijucako ur-esparrua edota Deodoroko olinpiar parkea, desmuntatze-prozesuan lehena, itxia bigarrena. Rioko udal-agintarien hitzetan, “instalazioak hobetzeko lanetan” ari dira batean, eta “kudeaketa-lizentzia” berria eman zain daude bestean.

Barra da Tijucako ur-parkea / Helena Rebello

Barra da Tijucako ur-parkea / Helena Rebello

Egoera “negargarrian” dago, era berean, 2016ko Joko Olinpikoen itxiera-ekitaldia hartu zuen Maracaná estadioa, CNN telebista katearen erreportajean ikus daitekeenez.

Eta gero, harrituko gara, adibidez, 2024ko Joko Olinpikoak jasotzeko hautagaietako bat den Hungarian sinadura-bilketa hasi duelako NOlimpia izeneko mugimenduak, Jokoak antolatu ala ez erabakitzeko erreferenduma egin dadila eskatzeko, antolatzeak kostu handia izango lukeela, ustelkeriari bide emango liokeela eta dirua behar larriagoak asetzera bideratu beharko litzatekeela iritzita. Zortzi egun geratzen zaizkie 138.000 sinadura biltzeko (100.000 inguru bildu dituzte jada).

Xakea: Emakumerik onenak planto egin du, gizonen aurka lehiatu nahi duelako

2017-02-07  //  Kirola  //  5 iruzkin

Sekula ikusi gabeko zerbait gertatu da Tradewise Gibraltar Chess xake torneoko azken errondan. Munduko emakumezko jokalari onenak, Hou Yifan txinatarrak, nahita galdu zuen Lalith Babu indiarraren aurka, bost mugimendu inozo eginda. Protesta egitea zen bere helburua, torneoan egokitu zaizkion hamar aurkarietatik zazpi emakumezkoak izan direlako, parte-hartzaileen artean nesken proportzioa askoz ere txikiagoa zenean.

Antolatzaileak aho bete hortz laga zituen Yifanek, partida apropos galdu zuela ikusita / John Saunders. Tradewise Gibraltar Chess

Antolatzaileek adierazi dute ez dela “nahita” egindako zerbait izan, programa informatikoak “hautatzen” duela nork jokatu behar duen noren aurka, sistema suitzarra baliatuta, Federico Marín Bellón ABC egunkariko blogariak azaldu duen moduan. “Jokalari txinatarrak, baina, pentsatu zuen hainbeste neskaren aurka aritzea ez zela kasualitatea, agian, bere iritziz, antolatzaile edota arbitroak bera zigortzen ari zirelako, Yifanek uko egin baitio emakumezkoen titulua defendatzeari, Gibraltarrekoa bezalako torneo mistoetan zentratzeko”.

Yifanek erabaki hori hartu badu, izan da besteak beste FIDE Nazioarteko Xake Federazioak emakumezkoen munduko txapelketaren formatua (kanporaketa-sistema) aldatu  beharko lukeela aldarrikatzeko, ChessBase webguneak plazaratutako elkarrizketa mamitsuan irakurri daitekeenez.

Iturria: The Telegraph

Zergatik ez dago emakumerik, munduko 100 xake jokalari onenen artean?

Hou Yifanek apropos galdu izanak (kirolean erabat debekatua dagoena, bide batez esanda) berriro hauspotu du emakumezko eta gizonezko xake jokalarien arteko desberdintasunen gaineko eztabaida, abiatuta emakume onena izanagatik, munduko xake jokalari onenen zerrendan 105. lekuan dagoela gaur egun Yifan. Zergatik ez dago emakumerik lehenbiziko 100 jokalarien artean? Zergatik egiten dira generoaren araberako xake torneoak, jokalarien fisikoak zerikusirik ez badu (beste kirol batzuetan ez bezala)?

Magnus Carlsen eta Yifan Hou, munduko xake txapeldunak / L.G.

“Estatistika kontua da”, zioen Francisco R. Villatoro adituak, 2009an plazaratutako artikuluan: “Askoz ere mutiko gehiago ari dira xakean jokatzea ikasten, neskak baino (…) Egunen batean mutil bezainbeste neska ari baldin badira xakea ikasi eta haurrentzako torneotan parte hartzen, helduak izatera heltzean gizon bezainbeste emakume izango dira xake maisu handien artean”.

Neska eta mutikoak haurrak direnetik jaso ohi duten hezkuntza, profesionalki aritzeko dauden zailtasunak, amatasuna, zaintza eta, oro har, beste kirol jarduera batzuetan hainbatetan aipatu ohi diren faktoreek berebiziko garrantzia dute xakean ere. Alegia, hitz egin daitekeela gizon eta emakumeen burmuinen arteko desberdintasunez, baina, Angela Paloma kazetariak El País egunkarian kaleratutako artikuluan dioen moduan: “Pentsa daiteke, musikan edota politikan bezala, emakumeen parte-hartzea xakean ez izatea soilik zientzia kontua, aukera kontua baizik”.

Hausnarketa interesgarriak jarri ditu Palomak mahai gainean, esaterako, ea komeni ote den emakumeak gizonezkoekin batera aritzea xakean: “Leontxo Garcia kazetariak dioenez, Julia Codina 13 urteko xake jokalari espainiarrak kontatu zion emakumezkoen torneoak kentzeak ekarriko lukeela gutxiengo bat itotzea. Esaterako, Luxenburgok sekula izango ez duen bezala Frantziak adina eliteko atleta, emakumezko xake jokalariek aukera oso gutxi dituzte munduko jokalari onenen artean sartzeko. Neskak desmotibatuko lituzke horrek. Ez litzateke soilik desagertuko emakumezkoen xakea, emakume xakelariak baizik”.

Madrilgo Atlético klubeko futbolari bat atxilotu dute bikotekidea jipoitzeagatik

2017-02-03  //  Futbola, Gizartea  //  Iruzkinik ez

Lucas Hernández, 20 urteko futbolaria, atxilotu du poliziak, ustez bere bikotekidea jipoitzeagatik. Antza mozkorturik heldu zen etxera, eta neska-laguna jo. Neskak ospitalera joan behar izan zuen.

Polizia-etxean eman du gaua Hernándezek, El Mundo egunkariak jakinarazi duenez.

Paul Abasolo Urrezko Baloirako hautagai ez izatea eskatu dute

Kasu honen berri jakin dugu, hain justu, Durangoko Udalak eskatu duenean Paul Abasolo ez izatea Urrezko Baloirako hautagaia, ARGIAn jaso dugun bezala. Durangoko Plataforma Feministak aurkeztu zuen mozioa eta EH Bilduren, Herriaren Eskubidearen eta PSE-EEren aldeko botoekin onartu da erabakia. Bizkaiko Cantera Deportiva kirol hedabideak futboleko 3. mailan Urrezko Baloia irabazteko hautagaien artean aurkeztu du Paul Abasolo. Portugaleten jokatzen duen futbolaria 2010ean hiru sexu erasorengatik zigortu zuten eta indultu partziala jaso zuen.

[Tratu txarrak salatzeko telefonoa: 016. Doakoa da eta fakturan ez du arrastorik uzten]

Sei Nazioen errugbi txapelketa: Irlanda bakarraren historia eta emakumezkoen urratsak

2017-02-03  //  Errugbia  //  Iruzkinik ez

Eskozia eta Irlandaren arteko partidak irekiko du gizonezkoen Sei Nazioen txapelketa, larunbatean. Ni bezala, errugbia oso tartean behin jarraitzen duten horietakoa baldin bazara, ziurrenik lagungarri izango zaizu azken egunotan Interneten plazaratzen ari diren gidak irakurtzea, selekzio bakoitzaren inguruko ezagutza eguneratu ahal izateko.

Ingalaterrak irabazi zuen iaz Sei Nazioen txapelketa.

Horietako bat da Fosbury.cat webgunearen Guia de supervivència pel Sis Nacions artikulua, errugbi partidak taberna-zuloan ikusiko dituenarentzat, gainerako parrokianoen aurrean lotsagarri ez geratzeko ezinbesteko jakingaiak jasotzen dituen gida. Eta, aizue, oinarri-oinarrizkoa baldin bada ere, gauza interesgarriak ikasi ditut nik. Esaterako, orain jakin dut errugbikoa dela bi Irlandetako (Errepublikakoak eta Iparraldekoak) batera aritzen diren selekzio bakarra, aitzakia ederra selekzio horren historiaz informazio gehiago bilatzeko. Zentzu horretan, gustura irakurri dut Una Irlanda unida es posible gracias al rugby erreportajea, El Confidencial agerkariak plazaratua, besteak beste mintzo dena selekzioaren ereserkien historiaz, hastapenetatik hasi eta 1995ean onartu zuten Ireland’s Call-era heldu arte:

Fosbury-ko artikulua irakurrita jakin dudan beste gauza bat: Sei Nazioek atzera bota dute igoera eta jaitsiera sistema aplikatzea. Georgia eta Rumania bezalako selekzioek maila oso ona eman dute azken urteotan Sei Nazioak “B” txapelketan, eta haietako batek Italiaren lekua bete zezakeela proposatu zen. Ekimenak azkenean ez du aurrera egin, baina agerian utzi du gainerako bost taldeen azpitik dagoen Italiako selekzioak urtez urte Sei Nazioetan parte hartzeak eragiten duen ika-mika.

Emakumezkoak, beste erritmo batean

Gizonezkoena baino lehenago hasiko da emakumezkoen Sei Nazioen txapelketa. Gaur, ostirala, jokatuko da lehenengo partida, Eskozia eta Irlandaren artean.

1996an egin zen aurreneko edizioa. Frantziak irabazi zuen 2016an / RBS 6 Nations

Gainerako kiroletan bezala, beste erritmo batean ari da garatzen emakumezkoen errugbia. Esaterako, aurten lehenengoz jarraitu ahal izango dira partida guztiak zuzenean, telebistaz edota Internetez. Bestalde, selekzio batek (Ingalaterrak) estreinakoz osatu du talde erabat profesionala, Michael Aylwin kazetariak The Guardian egunkarian nabarmendu duen moduan.

Bestalde, gizonezkoen kasuan bezalaxe, parte-hartze sistema itxiaren aurkako kritikak areagotu egin dira azken urteotan, besteak beste Espainiako selekzioak jokatu egin beharko lukeela uste duten horien artean.

2017ko Sei Nazioen inguruko informazio gehiago:

– The Guardian

Futbolari “naziaren” fitxaketa atzera bota dute Rayoko zaleek

2017-02-02  //  Uncategorized  //  Iruzkinik ez

Ukrainarra da Roman Zozulya futbolaria. Espainiako Ligan ari da, Betis taldean. Bazirudien denboraldia amaitu bitartean Vallecaseko (Madril) Rayo taldean jokatuko zuela, baina azkenean ez dute fitxatu, Rayoko zaleek egindako presioa dela-eta, haien iritziz, Zozulya bezalako “nazi” baten baloreak ez datozelako bat klubak ordezkatzen duenarekin.

Roman Zozulya, bolo-bolo zabaltzen ari diren argazkietan.

Jokalariak ukatu egin du Donbassen borroka egin duten talde paramilitar ukrainarrak babesten dituenik; baina “ultraeskuinaren ikurrak” agertzen dituzten argazkiek, Dnipro klubeko “ultrek” sortu zuten boluntario irregularren unitateari –ejertzitoaren kontroletik at– erakutsitako babesak edota Stepan Bandera “kolaborazionista naziaren” figurari agertutako mirespenak kontrakoa pentsarazten dute, Alvaro Olmedo kazetariak Marca egunkarian nabarmendu duen moduan: “Norbararen ideiak azaleratzea ekintza zintzo eta ausarta da, baina ondorioak ditu. Motibazio horiek bat baldin badatoz zure zale erradikalenek dituztenekin eta gainera golak sartzen badituzu, idoloa izango zara futboletik harago, Zozulyari gertatu zaion moduan Dnipro taldean. Aldiz, zaleek guztiz bestelakoak diren baloreak defendatzen badituzte, nekez maiteko zaituzte, Zozulyari gertatu zaion moduan Rayo taldean”.

Gertatutakoak, noski, futboletik harago egin du salto, Twitterren sortutako kalapita lekuko. Hona adibide batzuk:

ERCko diputatu Gabriel Rufián:

PPy C’s piden la cesión de Zozulya.

— Gabriel Rufián (@gabrielrufian) 2017(e)ko otsailak 1

Unidos-Podemos VK:

Los bukaneros y las peñas del club manifiestan su oposición: “en Vallecas no cabe el fascismo” https://t.co/yDulXkCvRV — Unid❤️s Podemos VK (@unidospodemosvk) 2017(e)ko otsailak 2

@rubenglez:

A los miserables de @DeportesCuatro les parece una aberración que la afición de Vallekas no quiera a un pobre ucraniano en sus filas. pic.twitter.com/7X9F6HVuYA
— Rubén González (@rubenglez) 1 de febrero de 2017

@brutuslife:

El nivel es: “Zozulya no es nazi, es un invento de la prensa”. “Bukaneros ha parado el fichaje porque mandan en el Rayo, lo dice la prensa”. — Sedicioso (@brutuslife) 2017(e)ko otsailak 2

@BetisClass erabiltzaileak irekitako haria, gauzak nondik nora doazen ulertzeko baliagarria:

[HILO] ¿Es Zozulya nazi?

— Betis Class (@BetisClass) 2017(e)ko urtarrilak 31