Emakumeen artean kirola sustatzeko egutegia: marrazki lehiaketa

2016-09-26  //  Generoa, Kirola  //  Iruzkinik ez

2016ko egutegian aurki daitekeen marrazkietako bat.

EmaK emakume kirolarien taldea 2012an sortu zuen Donostiako Udalak, kirol arloan berdintasuna sustatzeko helburuarekin. 2015ean eta 2016an bezalaxe, nesken artean kirola sustatzeko egutegia plazaratuko du datorren urtean, haur eta nerabeek egindako marrazkiekin oraingoan.

EmaK-ek proposamena luzatu die LH eta DBH-ko irakasleei: ikasgelan “Berdintasuna kirolean” gaia jorratzea, eta hausnarketaren hasiera edo emaitza ikasle bakoitzak egindako marrazki bat izatea, emakume kirolarien bisibilizazioa oinarri izango duena. Jasotako marrazki guztien artean 13 hautatuko dituzte –hilabete bakoitzeko bana eta azalekoa–. Marrazkiak aurkezteko epea 2016ko urriaren 21ean amaituko da.

Jasotako marrazki guztiekin erakusketa bat egiteko asmoa du EmaK taldeak.

> Lehiaketaren oinarriak (pdf)

‘Tirabirak’: Euskal Herriaren iragan gatazkatsua jorratu duten binetak

2016-07-22  //  Komikiak  //  Iruzkinik ez

Abuztuaren 20ra bitartean Tirabirak erakusketa izango duzue ikusgai Donostiako Okendo kultur etxean. Merezi du bisita egitea edota, bertaratzerik ez baduzue, proiektuaren webgunean sartu eta artxiboa kontsultatzea. Altxor ederrak topatuko dituzue.

1977tik 2016ra bitartean euskal gatazkaz egunkarietan plazaratu diren binetak topatuko dituzue, 150 gertakariri buruzko 450 bineta orotara. Besteak beste, Deia, Egin, El Diario Vasco, El Correo, ABC, El País, Diario de Navarra, Enbata, Euskaldunon Egunkaria, Le Journal du Pays Basque, Gara eta Berria egunkarietan argitaratutako binetak daude. Eta egileen artean, Zaldieroa, Máximo, Zulet, Peridis, Tasio, Forges, Máximo, Oroz, Olariaga, Ripa, Mattin, Idígoras & Pachi, Mingote, Michel Iturria, Adur, Axpi, Gallego & Rey, López & Pérez, El Perich eta abar. Haien binetekin batera, komiki politikoaz eta umore grafikoaz marrazkilari batzuei egindako elkarrizketak ikusgai daude pantaila batzuetan.

Irailaren 3an Iruñera eramango dute erakusketa, urriaren 2ra arte izango da Civivox Condestable aretoan.

Komunikabideak, gatazka eta bizikidetza

Donostiako erakusketaren harira hainbat ekimen egin da, EHUko Udako Ikastaroen baitan antolatutako jardunaldiak tartean. Ekainaren 30ean, esaterako, hitzaldia eskaini zuten Ainara Azpiazu “Axpi”, Javier Etayo “Tasio”, Dani Fano, Jesus Zulet eta Patxi Huarte “Zaldieroa” ilustratzaileek, eta bakoitzak bineta bat marraztu zuen bertan. Dani Blancoren argazkietan dituzue bostak:

Ainara Azpiazu “Axpi”

Ainara Azpiazu “Axpi”

Javier Etayo “Tasio”

Javier Etayo “Tasio”

Dani Fano.

Dani Fano.

Jesus Zulet.

Jesus Zulet

Patxi Huarte “Zaldieroa”.

Patxi Huarte “Zaldieroa”.

Armen erabilerari buruzko eztabaidaren erdian, kirolariek pistolak opari

2016-07-18  //  AEB, Gizartea, Kirola  //  Iruzkinik ez

CrossFit Games txapelketako irabazleek Glock enpresa babeslearen suzko pistola bat jasoko dute opari, antolatzaileek Facebook bidez jakinarazi dutenez.

Iragarpenak zalaparta eragin du AEBetan, ez soilik herritarren artean, baita parte-hartzaileen eta Reebok bezalako gainerako babesleen artean ere. “Nahiz eta CrossFit-aren oinarriak jarduera militarrari eta lehen laguntzari loturik dauden, ez gatoz pistolak oparitzearekin bat, bereziki kontuan hartuta azkenaldian AEBetan gertatutakoak”, diote Reebook-etik.

Suzko armen erabilerari buruzko eztabaida bizi-bizi dago herrialde horretan: poliziek herritar beltzen aurka erabilitako indarkeria, duela astebete frankotiratzaileek Dallasen hildako bost poliziak edota ekainaren 12an Orlandoko diskoteka batean 50 lagun hil zituen erasotzailearen kasua, adibide bakanak besterik ez dira. Hain justu, Orlandoko erasotzaileak Glock pistolarekin egin zuen tiro, eta horrek are oihartzun handiagoa eman dio Crossfit Games torneoko ugazaben hautuari.

Parte-hartzaileen haserrea

CrossFit entrenamendu teknika ardatz duen txapelketa asteartean hasi da Kalifornian. Gizonezko eta emakumezko atletarik onenek 275.000 dolar jasoko dituzte, eta talde irabazleetako kideek 70.000 dolar buruko. Gehi pistola bat.

Daniel Bartels kirolari australiarrak kanpaina abiatu du Change.org webgunean, sari bezala pistola eman ez dezaten; 20.000 sinadura baino gehiago lortu ditu jada.

“Desesperatzeko modukoa da”, azaldu du jokoetan hainbatetan parte hartu duen Peter Jacksonek. “Doluan gaude Orlandoko anai-arrebengatik, Dallaseko poliziengatik […] Ez baduzu konponbidearen parte izan nahi, ondo, baina ez zaitez arazoaren parte izan. Armak ez lirateke sari bat izan behar, azken baliabidea baizik”.

Seattle hiriko Rocket CrossFit gimnasioen jabe Allysa Royse harago doa: “Marketin hutsa da, ez du fitness jarduerarekin zerikusirik”, adierazi du ThinkProgress webgunean. “Izenagatik hala dirudien arren, CrossFit Games hiper-maskulinizatu eta korporatiboa ez da azken urteotan AEBetan arrakasta handia lortu duen CrossFit jarrera eta entrenamendu metodologiaren sinonimo”. Kexu da horrelako ekitaldiek jendea nahasmendura eraman dezaketelako. “Pertsona oro eroso sentituko den espazioak sortu nahi ditugu. Berez, CrossFit-a edonork egin dezake. Rocket-en ikurrak aniztasuna, segurtasuna eta autonomia dira”.

CrossFit Games txapelketaren zuzendari Dave Castrok ordea argi du: “AEBetan suzko armak dituzten milioika pertsonetako bat naiz […] Pistolak legezkoak dira AEBetako 50 estatuetan. Eskubide osoa dugu sari bezala pistola bat emateko”. Promozio-bideoak Glock pistola aurkezten du arma “seguru” eta “fidagarri” gisa, eta armak, oro har, “gure ondare eta izanaren” parte bezala.

Gaiaz gehiago Think Progress webgunean:

‘Enough Is Enough’: NBA Stars Take Major Stand Against Gun Violence. NBA saskibaloi ligako izarrak, arraza arteko harremanez eta suzko armen erabileraz.

Police Officers Working WNBA Game Walk Out After Players Wear ‘Black Lives Matter’ T-Shirts. WNBA saskibaloi ligako partida batean, segurtasunaz arduratzen ziren lau poliziak pabiloitik alde egin zuten, jokalariek erakutsi ostean “Aldaketa gurekin hasten da. Justizia eta erantzukizuna. Beltzen bizitzak axola du” zioten kamisetak.

Claudia Chamorro (Gehitu), Hegosport LGTB futbol txapelketaz: “Aldarrikapena eta lehia, biak bat”

2016-07-15  //  Feminismoa, Futbola, Generoa  //  Iruzkinik ez

Hegoak LGTB elkarteak antolatuta, Hegosport zazpiko futboleko IX. txapelketa egingo da larunbatean Bilboko San Inazio kiroldegian. Euskal Herriko, Kataluniako edota Madrileko 100 jokalarik baino gehiagok parte hartuko du torneoan, Gehitu elkarteko emakumeek tartean. Taldeko kide Claudia Chamorrok eman dizkigu txapelketari eta oro har LGTB kolektiboak kirolean bizi duen errealitateari buruzko azalpen eta iritzia.

Aurreko ediziooetan 10-12 taldek parte hartu dute txapelketan.

Esan digu Hegosport torneoak bi osagai uztartzen dituela: aldarrikapena eta lehia: “Bietatik dauka. Aldarrikapena batetik, LGTB kolektiboaren errealitatea azaleratu eta kirolaren esparruan homofobia borrokatzea. Eta konpetitiboa bestetik. Urtean zehar hainbat partida jokatutakoak gara Hegosport txapelketan izango garenok. Ongi pasa eta normaltasun espazioak sortzea positiboa da, baina dugun onena ematera goaz Bilbora”. Azaldu digu emakumezko eta gizonezkoen taldeek hartuko dutela parte. Taldeak ez dira mistoak, baina denak denen aurka aritzen dira; esan daiteke beraz txapelketa mistoa dela zentzu horretan. Dioenez sasoi puntu onean helduko da Gehitu, denbora daramatelako entrenatzen, astero izan baitute partida. ” Talde oso onak datoz, ordea…”

Errealitatea bistaratzea, funtsezkoa

Horrelako egitasmoen zioez galdetuta, “naturaltasuna”, “normaltasuna”, “gizarteratzea” eta “ikusgaitasuna” aipatu dizkigu behin eta berriro Chamorrok: “Garrantzitsua da gure errealitatea bistaratzea. Ortzadar Liga ekimenak adibidez oihartzun zabala izan du, Eibar eta Reala bezalako klubek kanpainarekin bat egin dutelako”.

Azken hilabeteotan hainbat jokalari eta arbitrok salatu dituzte eraso homofoboak. Gehituko jokalariaren hitzetan beti izan dira halakoak, futbolean bezala gainerako kiroletan ere bai, nahiz eta normalizazioaren alde eman diren urratsek-eta ahalbidetu duten arazoa gehiago gizarteratu eta hedabideen arreta lortzea. “Garrantzitsua da eraso homofoboez informazioa plazaratzea, garaitu behar den errealitatea erakutsi eta kontzientziak astintzeko balio duelako. Geroz eta jende gehiago ari da agertzen horrelako erasoen aurka”.

“Belaunaldi berriek jasoko duten heziketak  balintzatuko du etorkizuna”

Dena den, komunikabideen jardunari dagokioneez, Chamorrok uste du lan handia dagoela oraindik egiteke. “Hedabideak merkatu kuota batzuetan oinarritzen dira, eta jendearen interesekoak diren albisteak plazaratu behar dituzte. Aurrerapausoak eman dira, baina luzera begirako estrategiak behar dira, egunetik egunera garatuko direnak, tarteka pintzelkadak ematera mugatu beharrean. Horretan guztian paper garrantzitsuagoa dute hedabide publikoek. Denek egin behar dute ahalegin berezia, gai soziala delako, baina moralki komunikabide publikoak beharturik daude norabide aldaketa gidatzea, eta oro har ez dute hala egiten”.

Eta instituzio publikoek? “Euskal Herrian bide zuzenetik goaz”, dio Chamorrok. “Kontzientziazio-lan handia egiten ari dira; homofobia salatu, Gehitu bezalako elkarteak babestu eta arazoa bistaratzen saiatzen dira. Beste leku batzuetan ez da hala gertatzen”. Azaldu digu  inportantea dela nor bere esparruan (administrazioan, hedabideetan…) erreferenteak diren pertsonen lana azaleratzea, jende gehiago eramango luketelako atzetik.

Hezkuntza eta justizia

Normaltasunerantz aurrera egiteko zutabeetako bat hezkuntza dela esan digu Chamorrok: “Belaunaldi berriek jasoko duten heziketak –eskolakoak zein etxekoak– balintzatuko du etorkizuna”. Zentzu horretan, kezka azaldu digu gazteen artean homofobia kasu asko ematen direlako. “Aurrerantz goazela dirudi, baina gauza batzuek pentsarazten naute atzerantz gaozela. Ezin dugu lo hartu”.

Beste oinarrietako bat justizia da. “Justiziak bermatu behar du aldarrikatzen ari garen askatasun hori. Ez badu halakorik egiten, bortxaketen aurrean-eta inpunitate egoera sortzen bada… Dugun legediarekin bat joan behar du justiziak. EAEko legediak gauza positibo asko du, urrats sendoak eman dira, baina mantsoegi goaz nire ustez. Azkar joanez gero arriskua dago gauzak ongi ez egiteko, baina halere…”.

Natural agertzea erabakitzen duten ausartak

San Ferminetan izan diren sexu erasoak hizpide, LGTB kolektiboko kide bezala festak nola bizi dituen galdetu diogu Claudia Chamorrori: “Adimen emozional bat sortzen da. Nik sekula ez dut jazarpenik pairatu, baina nire lagun batzuek bai. Gaizki dago nik halakorik esatea, baina azkenean ikasi egiten duzu modu natural batean non joka dezakezun eta non ez. Izaera kontua da. Batzuetan ingurura begiratu eta ohartzen zara zu zeu izaterik ez daukazula, agerian jarriko zinatekeelako. Badira pertsona ausart batzuk natural agertzea erabakitzen dutenak, baina… Ni ez naiz babesgabe sekula sentitu. Gerta liteke bikotekidearekin nagoela ingurunea aproposa ez dela sentitu eta modu naturalean ez jokatzea, baina hortik aurrera… Jende oso ausarta dago, esaten duena ‘errealitatea bistaratu nahi dut, hauexek direlako nire sentimenduak’; ni kontu gehiagorekin mugitzen naiz. Edozein esparrutan modu naturalean agertzen diren horiek ispilu dira ainerakoentzat”.

#TotsSomLeoMessi, gure idoloek gure babesa behar dutelako… edozer eginda ere

2016-07-14  //  Kirola  //  Iruzkinik ez

Leo Messi futbolari argentinarrari 21 hilabeteko espetxe zigorra ezarri dio Bartzelonako Auzitegiak, iruzur fiskala leporatuta. 2007 eta 2009 urteen artean 4,1 milioi euroko iruzurra egin izana egotzi diote Bartzelonako jokalariari.

Bartzelona klubak #TotsSomLeoMessi (Guztiok gara Leo Messi) kanpaina abiatu du Twitter bidez, gura duen orok futbolariari babesa erakutsi diezaion. “Leo, zure kontra egiten duenak, Barçari eta haren historiari ere egiten die eraso. Bukaera arte defendatuko zaitugu. Elkarrekin beti!”, txiokatu du klubeko presidente Josep Maria Bertomeuk.

Kanpainak polemika handia eragin du, eta bada #NoTotsSomLeoMessi traolarekin kontra-erasotu duenik ere. Halaber, Espainiako Ogasun Ministerioa ere oso kritiko agertu da, Bartzelonaren ekimenak Messiren jokabidea justifikatu besterik egiten ez duelakoan.

És el moment de fer costat a Leo Messi. Suma’t a la campanya #TotsSomLeoMessi 👐 https://t.co/6f1j4B0UnQ pic.twitter.com/C8mleqpKDx

— FC Barcelona (@FCBarcelona_cat) 2016(e)ko uztailak 9

Tamalez, honakoa ez da zaleek haien idolo eta talde kuttunen hanka-sartze, gehiegikeria, delitu edo nola izendatu ziur ez dakizkidan gertaerak babesten dituzten lehenbiziko aldia. Eta ez da azkena izango, ziur. Alderaketak arriskutsuak gerta daitezke, baina aipatu daitezke ere bai –gertaera bakoitzaren izaera arras desberdina izanik ere– tratu txarrengatik auzipetua dagoen Ruben Castro futbolariari Betiseko zale batzuek eskainitako animo-kanta; sexu-erasoengatik zigortua (eta indultatua) izan den Paul Abasolo jokalariaren fitxaketa zuritzeko Portugaleteko presidenteak baliatutako aitzakia (azpian dituzue haren adierazpenek sortutako erreakzio batzuk); edota Realak paradisu fiskalen bidez egin zituen ordainketak justifikatzeko hainbatek baliatu duten “denek gauza iguala egiten zuten-eta!” argudioa.

Bortxatzailearen fitxaketaren justifikazioan zer pintatzen du ETAk? Lotsa, auzolotsa, nazka, nazka handia… pic.twitter.com/dDgZ4qfI0r

— Onintza Enbeita Maguregi (@onintzaenbeita) July 13, 2016

Bortxatzaile indultatuaren fitxaketa zuritzeko aitzakia zein izango eta… bingo! https://t.co/q2uaCEREuk

— Xabier Mendiguren (@xme64) July 13, 2016

Kirolean bezala beste esparruetan ere, GURE jendeak egiten duen edozer gauza babestera jotzen dugu sarri (nik ere bai, aitortzen dut), pasioaren beroak bultzatuta-edo, haiek bizi/sufritutakoa gure eginez. Enpatia hori beste hainbatekin azalduko bagenu…

#EqualPlayEqualPay, gizonezko futbolarien baldintza eta soldata bera aldarri

2016-07-12  //  AEB, Futbola, Generoa  //  Iruzkinik ez

2015ean, Munduko futbol txapelketa irabazi zuen AEBetako emakumezkoen selekzioak. Jokalari bakoitzak 2 milioi dolarreko gainsaria jaso zuen. 2014an, Munduko futbol txapelketako lehen fasea ere ez zuen gainditu AEBetako gizonezkoen selekzioak. Jokalari bakoitzak 8 milioi dolarreko gainsaria jaso zuen. Hamar partidatik zortzi belar artifizialeko zelaietan jokatu zituzten neskek. Badira hiru urte mutilek belar artifizialeko zelaietan jokatzen ez dutela.

Mutilek jasotzen duten tratu bera eskatzen dute AEBetako selekzioko neskek.

Think Progress webgunean plazaratu ditu datuok Lindsay Gibbs kazetariak, AEBetako selekzioko neskek iaz abiatu eta blog honetan inoiz hizpide izan dugun #EqualPlayEqualPay kanpainari buruzko erreportajean. Gizonezkoen baldintza berean bidaiatzea eskatzen dute, baldintza berean jokatzea eta soldata bera irabaztea. AEBetako futbolaren goi-organoek haien aldarrikapenei entzungor egin dietenez, kanpainari bultzada berria ematea erabaki dute, Twitterreko traola hori oinarri hartuta, baliatuz Hegoafrikaren aurkako partida jokatu dutela asteburuan.

“Ez gatoz dirua lapurtzera”, idatzi du Carli Lloyd futbolariak New York Times egunkarian. “Pertsonak merezi bezala tratatu behar dira, generoari begiratu gabe”.

Futbol zelai nanoa

Gizonezko eta emakumezko futbolarien arteko desberdintasunak agerian uzten dituzten datu gehiago bildu ditu Gibbsek artikuluan, baita adibide kurioso zenbait ere, esaterako: AEBetako Liga profesionalean ari diren Western New York Flash eta Seattle Reign taldeek zelai txikiago batean jokatu behar izan dute asteburuan, beisbol zelai baten atzealdean pintatutako laukizuzenean, Flash-en estadioan kontzertua zegoela-eta. Selekzioko jokalari Ali Kriegerren txioan ikus daitekeenez, normalak baino nabarmen estuagoa zen futbol zelai hori. Zaleek, gainera, joko-eremutik urrun eseri behar izan zuten. Kontuak haserrea eragin du, noski.

This is shocking, disrespectful & such a shame that we as professional players, are expected to play on this surface pic.twitter.com/5uLx36WHm6

— Ali Krieger (@alikrieger) 10 de julio de 2016

Futbol partida pantailaren alde batean, poliziarekin liskarrak bestean

2016-07-11  //  Frantzia, Futbola  //  Iruzkinik ez

Irudi deigarriak utzi dituzte igandean Parisen izandako liskarrek. Portugal eta Frantziako futbol selekzioak Europako txapelketaren finala jokatzen ari ziren bitartean, jada lepo zegoen Eiffel dorrearen alboko fan zone delakora sartzen ahalegindu ziren dozenaka zale. Poliziak bidea itxi zien, lagun gehiagorentzako lekurik ez zegoela-eta; orduan hasi ziren liskarrak.

Gure arreta gehien deitu duen argazkia @ideiazabaldu erabiltzaileak txiokatu duena da. Zale mordoa pantaila erraldoiari so, eta atzealdean polizien eta manifestarien arteko enfrentamenduak.

La foto esta lo único que demuestra es que el futbol agilipolla a la gente. 😉 pic.twitter.com/eaHfv3l3hD

— Malcolm iXa (@ideiazabaldu) 10 de julio de 2016

Liskarren irudi gehiago:

AFP

Reuters

Reuters

Reuters

Reuters

Iturriak:

Infobae

Mendoza Post

Deportivo taldearen armarrian “A Coruña” agertzeko kanpaina

2016-07-11  //  Futbola, Galizia  //  Iruzkinik ez

Deportivo futbol klubeko Peñen Federazioak eta Riazor Blues eta Old Faces taldeetako zaleek kanpaina jarri dute abian, klubaren izenean eta haren armarrian ez dadin gehiago “La Coruña” agertu, “A Coruña” toponimo ofiziala baizik.

Deportivo futbol taldea “A Coruña” hirikoa izatea nahi dute kanpainaren sustatzaileek.

Helburua da ahalik eta sinadura gehien biltzea, proposamena akziodunen batzarrean aurkeztu ahal izateko. Akziodunek haha erabakiz gero izena aldatuko litzateke. Beto aukerarik ez legokeela adierazi du Peñen Federazioko ordezkari Tania Gómezek.

1998az geroztik hiriaren izen ofizial bakarra galegozkoa da.

Iturria: Sermos Galiza

Islandiako futbolaren arrakasta: inbertsioak eta formazioa gako

2016-07-04  //  Futbola, Islandia  //  Iruzkinik ez

Islandiako selekzioak eman du Eurokopako ezusterik handiena, Ingalaterra kanporatu eta final-laurdenetarako sailkatuta.

321.000 biztanle ditu Islandiak, 20.000 futbolari federatu, eta talde profesional bakarra ere ez. Eurokopatik kanporatu duen Frantziak 66 milioi biztanle ditu, 2 milioi futbolari federatu baino gehiago eta 40 klub profesional.

Final laurdenetan egin dute topo bi selekzioek, Ingalaterra garaitu ostean islandiarrek. Inor gutxik espero zuen balentria azaltzeko, hainbat faktore aipatu dituzte adituek, abiapuntu bezala hartuta 2011n 21 urtez azpiko Europako txapelketa jokatu zuten futbolarien lorpena, talde hura osatzen zuten gazteak –1988 eta 1991 artean jaiotakoak– baitira egunotan Frantzian lehiatu direnak.

Oinarri sendoa

Arrakastaren gakoetako bat azken 10-15 urteetan azpiegitura publikoetan egindako inbertsioak dira, belar artifizialeko futbol zelai estaliak eraiki izana bereziki, tenperatura baxuak eta iluntasuna entrenatu eta jokatzeko oztopo baitziren. Hortik “indoor kids belaunaldia” terminoa.

Beste faktore bat piramide itxura duen egituraketa da. Haren oinarrian 90 “grassroot” daude, boluntarioek osatutako kultur elkarteak, futbola ulertzen dutenak hazi, hezi eta formaziorako tresna bezala. Formazio-lan horren erakusgarri: 639 islandiarrek dute “UEFA B” entrenatzaile lizentzia. Beste datu bat: Ikastetxe bakoitzaren alboan belar artifizialeko zelai bat dago, Jonathan Liew kazetariak The Telegraph egunkarian plazaratutako erreportajean dioenez. Gazteak futbolean aritzeko aukera izugarri handitu du horrek.

Islandian, bestalde, futbolean aritzen den seme-alaba bakoitzeko 300-500 euroko gastua egiten du haren familiak urtean. Kopuru horretatik, 200 euro gazteak kirola egitera bideratutako laguntza ofizialetatik datoz.

Batuketari talde izaera, indar fisikoa edota kemena gehitzen badizkiogu, “mirariaren” formula lortuko dugu. Ikusteke dago aurrera begira zer emango duen, baina gaur gaurkoz ez dago gehiago eskatzerik. Ez dirudi, gainera, gizonezko futbolari dagokion zerbait dela. Nesken selekzioak ere bere lorpenik handiena oraintsu lortu du, 2013ko Eurokopan, final-laurdenetara heltzearekin. Halaber, gizonezkoen saskibaloi selekzioak iaz lortu zuen aurrenekoz Europako txapelketarako sailkatzea.

Datu bitxiak

Biztanle kopuruari dagokionez, azken aurreko postuan ageri den Ipar Irlandak 2 milioi ditu. Islandiaz gain, 400.000 biztanleren bueltan dagoen herrialde bakarrak lortu du Eurokopa bateko final-laurdenetara heltzea: Luxenburgok 1964an.

Egia da, Islandian ardi gehiago dago pertsonak baino, bikoitza gutxi gorabehera.

Eurokopa honetako partidetan, islandiarren %10 estadioan zegoen bere selekzioa bertatik bertara animatzen.

Hannes Halldorsson atezaina zinema zuzendaria izan zen. Eta Heimir Hallgrimsson prestatzailea, dentista.

‘Marca’ egunkariak egindako grafikoa

Entrenatzailea mahai-tenis partidatik kanporatua, jokalariak katalanez animatzeagatik

2016-07-01  //  Herrialde Katalanak, Kirola  //  Iruzkinik ez

“Vinga, va, som-hi Andreu!” (“Benga Andres, goazen!”) egin zion oihu 11 urteko jokalariari Carles Fontek, Tenis Taula Cassá mahai-tenis klubeko entrenatzaileak, asteburuan Blanesen (Herrialde Katalanak) jokatutako Espainiako txapelketako partida batean. Hitzok entzutean epaileak partida geratu eta entrenatzaileari eskatu zion gaztelaniaz egiteko, berak ez duelako katalana ulertzen. Kontua da entrenatzaileak ezin dezakeela agindu teknikorik eman eta, bereak animo oihuak soilik baziren ere, jarrera aldatzen ez zuela ikusita epaileak kanporatu egin zuen. Alferrikakoak izan ziren beste taldeko kideen azalpenak; haiei ere entzungor egin zien arbitroak.

“Arazoa da katalanak garela eta ez dutela nahi gure hizkuntzan mintzatzerik. Entrenatzaile txinatar, ingeles edo errusiar bati inork ez dio deus esaten, eta beste herrialdeetako txapelketetan desio duen hizkuntzan hitz egin dezake mundu guztiak”, dio Fontek, Kataluniako Selekzioen Aldeko Plataformak plazaratutako elkarrizketan. Entrenatzaileak dioen moduan, okerrena da 11 urteko jokalariak kontzentrazioa galdu eta “partidatik atera” zela.

Iturria: La Vanguardia