Euskal selekzioa: Noraino eraman nahi du bakoitzak?

2022-04-04  //  Sailkatu gabea  //  Iruzkinik ez

“Zein aterabide ikusten diozu euskal selekzioaren auziari?”, galdetu zion Euskal Herria Kirolak duela bi hilabete Athletic-eko futbolari Mikel Balentziagari. Eta hark erantzun: “Hasteko,  guk geuk, jokalariek, klubak, federazioak gauza gehiago egin ditzakegu. Uste dut bilera garrantzitsu bat egin beharko litzatekeela, gutxienez bakoitzak euskal selekzioa noraino eraman nahi dugun jakiteko”.

(gehiago…)

Gerra(k) eta kirola: Ukraina ez dadila aitzakia izan demagogia egiteko

2022-03-04  //  Sailkatu gabea  //  Iruzkinik ez

Kirola eta politika ez nahasteko esaten digute behin eta berriro. Baina…

Bartzelona eta Napoliren arteko partida / Getty Images

Astezkenean, Espainiako Estatuko –eta pentsatzen dut beste herrialde batzuetako– hainbat telebista katetako kirol-albistegiek, Chelsea futbol taldeko entrenatzale Thomas Tuchel alemaniarrak emandako prentsaurrekoaren irudiak emititu zituzten. Chelsea klub ingelesaren jabea Roman Abramovich da –nahiz eta kluba salgai jarri duen–, Vladimir Putinen hurbilekoa, eta horregatik eskatu zioten kazetariek entrenatzaileari Ukrainakoaz bere iritzia emateko. Haserre erantzun zuen Tuchelek: “Ni ez naiz politikaria. Berriro errepikatuko dut, eta berriro errepikatzen gaizki sentitzen naiz nik ez dudalako gerrarik sekula bizi: Gaiari buruz hitz egite hutsak gaizki sentiarazten nau, pribilegiatua naizelako. Hemen nago eserita, bakean. ahal dudan ondoen egiten dut, baina utzi egin behar diozu gisa honetako galderak egiteari, ez baitaukat erantzunik zuentzat”.

Albistegi batzuetan, Cuatro katekoan esaterako, prentsaurrekoaren berri eman zuten Tuchelen jarrera “bihozgabea” eta “mespretxuzkoa” balitz bezala, Mónica Planas kazetariak nabarmendu bezala El Mundo Deportivo egunkarian. “Kirolak mundua astintzen duten gertaerekiko sentsibilitatea azaldu behar du (…) baina ezin ditugu mikrofonoaren aurrean jartzen diren guztiak geopolitikan aditu edo ‘Putinologo’ bilakatu”, idatzi du Planasek. “Galderak nori egin eta nori ez, zer eta nola galdetu, gatazkarekiko errespetuaren eta zorroztasun profesionalaren parte da. Gainerakoa demagogia da, eta gerra garaian tamalgarria da hura erabiltzea”.

Errusiar bonbardaketak hasi zirenean, telebistaz emandako partiden markagailuaren alboan, “Gerrari ez” dioen mezua paratu zuen Futbol Liga Profesionalak. Aste honetan, baina, “Inbasioari ez” irakurri zitekeen. Planasen hitzetan, mezuak dioena “gezurra ez den arren, prosozionamendu horrek aurrekari eta egoera delikatuak ekar ditzake etorkizuneko gatazketan”.

Etorkizunari baino, izan badiren beste gatazka batzuei heldu diete batzuek, Ukrainako gatazkaren gainean kirol erakundeek hartu duten bidea hizpide. Mohamed Aboutrika futbolari ohi egipziarrak, esaterako, FIFAren alde biko aurpegia kritikatu du, errusiar klubak txapelketetatik kanporatu dituen bitartean, Israeli jokatzen uzten diolako, Palestinaren aurkako “krimenak” aintzat hartu gabe.

“Stop the war”. Mezu bera erakutsi zuten, hain justu, Israelgo Macabbi Tel Aviv eta Baskonia saskibaloi taldeetako jokalariek, Euroligako partida hasi baino lehen. Gasteizen bezala beste pabilioi batzuetan Palestinari elkartasuna adierazteko ekimenak bultzatu izan direnean, isilarazi egin dituzte sarri.

“Stop War” pankarta erakutsi zuten Bartzelona eta Athletic taldeek pasa den asteko partidaren atarian. Sare sozialetan-eta txaloak jaso ditu keinuak, baina ez dira gutxi izan gogorarazi dutenak bi taldeok Espainiako Superkopa jokatu dutela non eta Saudi Arabian, aipatuz besteak beste herrialde horren esku-hartze militarrak Yemengo lurretan.

FIFAk Errusia kanporatu du 2022ko Munduko Txapelketatik, zeina jokatuko den Qatarren, giza eskubideen errespetuari dagokionez zeresana ematen ari dena, irakurri daitekeen moduan Iñaut Gonzalez de Mataukok ARGIAn idatzitako Has dadila diktaduraren ikuskizuna erreportajean.

Gerrari ez, baina ez soilik gerra honi.

Kirola eta klima larrialdia: naturak berak sortzen ez duenean…

2022-02-10  //  Sailkatu gabea  //  Iruzkinik ez

Pekingo Joko Olinpikoetako eski proba batzuk egiten ari diren eremuetako bat, erabat egina elur atifizialez.

1980az geroztik baliatu da elur artifiziala Neguko Joko Olinpikoetan, baina Pekinen aurrenekoz, eski pista guztiak egin dituzte hamaika kanoiek ponpatu duten hauts zuriarekin. Izan, Txinako zonalderik lehorrenetakoan baitaude Yanqing eta Zhangjiakou mendikateak. Ez du elur askorik egiten, ez behintzat eskian aritzeko adina, baina Txinaren hautagaitza hobetsi du COI Nazioarteko Olinpiar Batzordeak, proiektuak “ingurumen estandar guztiak errespetatzen dituelako”.

Duela zenbait hilabete, antolatzaileek jakinarazi zuten 186.000 metro kubo ur beharko zirela eski pistak egiteko. Aldiz, hainbat adituk –Carmen de Jong Estrasburgoko Unibertsitateko Hidrologia irakasleak tartean– ohartarazi du litro kopurua bost bider handiagoa ere izan daitekeela, besteak beste, aipatu mendietan Alpeetan baino bi edo hiru bider ur gehiago behar delako, baldintza klimatikoak direla-eta. Halaber, elur artifiziala fabrikatzeko ur hori guztia kilometro ugarira dauden ur-biltegietatik eraman behar da. Hiriburuan, baliabide hidrikoak txikiagoak direnez Txinako beste zonalde batzuetan baino, Hegoaldetik ponpatzen den uraren menpekoa da geroz eta gehiago.

Aipatu bi mendikateak Songshan natura-erreserban daude. Carmen de Jong hidrologoak azaldu duenez, Joko Olinpikoen aitzakian 1.100 hektarea deuseztatu dira (eremu osoaren %25 inguru), eski pistak, errepideak, heliportuak edota aparkalekuak egiteko. Kirol-eremuraino doazen bide batzuk ere elur artifizialarekin estali dituzte, makinak-eta pasa daitezen.

Txinako kasuak agerian utzi du klima aldaketak eragina (izango) duen moduan kirol diziplina batzuengan, kirolak eragina (izango) duela ingurumenean. Hamaika dira bi norabidetan doazen adierazleak, Joko Olinpikoak hartzen baditugu adibide gisa: elur artifiziala labainkorragoa da naturala baino (eskiatzaile batzuek adierazi dute abiadura handiagoa hartzen dutela), zirkuitoak laburragoak dira (elur gutxiago baliatzearren) eta hortaz bihurgune gehiagorekin (kirolariek elkar jotzeko arrisku handiagoa dago), ur kopuru erraldoia behar da pistak egiteko, estazioek kontsumitutako energiaren erdia baino gehiago elur artifiziala sortzera bideratzen da…

Elur artifiziala, belar artifiziala, olatu artifizialak… Kirola praktikatu nahi dutenentzat, edo praktika horri etekina atera nahi diotenentzat, gisa horretako azpiegiturek abantaila handiak eskaintzen dituzte. Ez dute zertan kalterako izan, ezta gutxiago ere, baina ikusten dituzu Txinako paraje idorretako eski pista horiek eta…

Fabrika zahar bateko hozte-dorreak lekuko

Irudi ikusgarriak heldu zaizkigu Txinatik. Honakoa lekuko. Big Air freeski modalitateko probak egiten ari dira Shougang-en, Pekin mendebaldean, fabrika zahar bateko hozte-dorreen alboan, fabrika, tximinia eta orube grisek hartutako eremuan. Eski pista zuriak beste dimentsio/errealitate bateko azpiegitura dirudi, hor erdian.

FIFAren misioa: Afrikarrek motibo gutxiago izatea itsasoa zeharkatzeko (!)

2022-01-27  //  Sailkatu gabea  //  Iruzkinik ez

Gianni Infantino / FIFA.COM

Gianni Infantino FIFAko presidenteak nahi du Munduko Futbol Txapelketa bi urtean behin jokatzea. UEFAk ordea gaur arte bezala jarraitu nahi du (lau urtean behin antolatzen da txapelketa). Ohituak gara FIFAren ahotik justifikazio xelebreak entzutera, erakundea lokaztu duten ustelkeria kasuen aurrean adibidez, baina ederra bota du Infantinok oraingoan.

(gehiago…)

Zaintza kamerak, haize-errotak, erraustegia… Itomen sentipena geroz eta handiagoa da herriotan

2022-01-26  //  Sailkatu gabea  //  Iruzkinik ez

Zumarraga eta Urretxu. Atzealdean, Irimo (896 m) / Euskaldunaa. Wikipedia

Ozpinduta. Halaxe nabil azkenaldian. Zuetako batzuen moduan, pentsatzen dut, edozer gauzaren aurrean zaunka. Bizi dugun egoera berez ere nahikoa etsigarria ez bazen, zenbaitzuk are etsigarriagoa bilakatu nahi dutela sinesten hasia naiz. Sinesten hasia norbaitek gure herriak deshumanizatu nahi dituela, bizigarria lapurtu. Urretxu eta Zumarragari buruz ari naiz zehazki, baina ziur beste leku batzuetan ere bizi dituztela hemen kontatuko ditudan batzuk: Porlana porlanarekin ordezkatzen duten obrak, anbulatorioko larrialdi-zerbitzuak akabatzea, geroz eta bideo-kamera gehiago kaleetan, hondakinak tratatzeko fabrikaren (“erraustegiaren”) proiektua, arnasgune diren mendietan haize-errotak jartzeko egitasmoa, Beasain-Bergara errepidea ordainpeko bihurtzea… Itomen sentipena geroz eta handiagoa da, aintzat hartu gabe pandemiak hainbat frontetan –hurbileko harremanetan adibidez– eragin dituen pitzadurak.

(gehiago…)

Beasain eta Bergara arteko bidesariak, noren mesedetan?

2022-01-18  //  Sailkatu gabea  //  Iruzkinik ez

“Eskuratu ezazu ‘Abiatu’, beherapen handiak lortuko dituzu, eta oso erosoa da!”. Aurpegia behar da gero…

Goizean jarri dut Abiatu sistemaren tramankulua autoaren aurrealdeko kristalean, konpainia egingo diena IAT pegatinari eta herriko zonalde batzuetan aparkatu ahal izateko “bertakoa” dioen berriago bati. Ordainpekoa bilakatu baita Beasain eta Bergara arteko A-636 errepidea. Arkuak pasatzeko makurtu egin behar, Goiberri aldizkarian irakurri dugun moduan. Bizitza neurririk gabe ari da garestitzen, eta hala ere denon ongizatea dutela helburu esaten digute agintariek. “Langileak eta ikasleak dira errepide hori gehien erabiltzen dutenak, eta bidesaria bezalako gastu bat gehiago izateak edo hori saihesteko hartu ditzaketen alternatibek, ez dut uste haien bizitzetan positiboki eragingo duenik”, dio Ezkio-Itsasoko alkate Joseba Telleriak.

(gehiago…)

Manspreading zer den, irudi bakarrean

2022-01-13  //  Sailkatu gabea  //  2 iruzkin

Hankak zabalik dituztela batzuk, itxita besteak. Naturala?

Egiari zor, Alfredo Pascualen txioa ikusi ez banu (“Movistarren omenaldia manspreading-ari”), argazkia oharkabean pasako litzaidake, ez nintzateke konturatuko gizonezko ziklistek hankak zabalik dituztela, eta emakumezkoek itxita. Baina behin hura irakurrita, ezin ukatu irudia deigarria gutxienez ez denik. Hauxe diot zeren eta txioari erantzun dioten askok, gizonezko askok esan nahi dut, argazkia ikusita ere ezer bitxirik ez dagoela diote, normal normala dela, “natural naturala”.

(gehiago…)

Saudi Arabian jokatuko den Espainiako Superkopa bakearen Nobel sarirako izenda dezakete, behin hasita…

2022-01-11  //  Futbola  //  Iruzkinik ez

Espainiako Futbol Federazioko presidente Luis Rubiales (eskuinean), hainbat futbol taldetako ordezkariekin eta Saudi Arabiako Abdulaziz bin Turki Al-Faisal printzearekin, 2020ko argazkian. / RFEF

Gizonezkoen lau futbol taldek lehiatuko dute bihar hasita Espainiako Superkopa: Athletic, Bartzelona, Real Madril eta Madrilgo Atléticok. Txapelketa ez da Espainiako Estatuko estadio batean jokatuko, baizik eta Saudi Arabian, Riyadh hiriko Fahd Erregea estadioan, duela bi urteko bideari jarraituz. 2020an Jidda hirian ospatu zen, Espainiako Futbol Federazioaren obligazioa baita gizon eta emakumeen arteko berdintasunaren aldeko borrokan bere aletxoa jartzea, Federazioko presidente Luis Rubialesek lotsagorritu gabe azaldu zuenez: “Berdintasunaren Superkopa da. Federazioaren misioa honakoa da. Badira desberdintasunak dituzten herrialdeak. Egoera horren aurrean, bizkarra eman diezaiekegu ala ez. Herrialde horietan lortzen ditugun irabaziak beste leku batzuetan eskura genitzake, baina bertan bizi diren gizon eta emakumeak laguntzen saia gaitezke. Bizkarra emango al diegu? Herrialdeak gizon eta emakumeen arteko berdintasuna sustatzeko programa abiarazi du, eta guk hura lagunduko dugu. Herrialdea transformatzen laguntzeko eskatu digute, eta hala egingo dugu. Gauzak aldatzeko aukera daukagu”.

(gehiago…)

“Galiza, un Pobo, unha selección” dokumentala

2021-12-29  //  Sailkatu gabea  //  Iruzkinik ez

Vía Galegak, “Galizia, herri bat, selekzio bat” kanpainaren baitan, dokumentala egin du. Kirol arloko hamahiru lagun galiziar selekzioak nazioartean ofizialki jokatzeko duen eskubideaz mintzo dira hamaika minutu pasako bideoan. Hango kirolarientzat aukera ederra litzatekeela diote, eta hunkigarria podiumean euren ereserkia entzutea. Halaber, genero berdintasunaren alde kiroletik egin daitekeen lana azpimarratu dute.

(gehiago…)

Euskal selekzioa: Ezkortasuna hauspotuz

2021-12-16  //  Sailkatu gabea  //  Iruzkinik ez

Gizonezkoen futbol selekzioko jokalariak, artxiboko irudian (EITB)

Aitortzen dut euskal selekzioen ofizialtasunari dagokionez ezkortasun ia kroniko batean murgilduta nagoela, eta batzuek esperantzarako tokirik ikusten dutenean, komentario ez konstruktibo batekin erantzuten dudala gehienetan, baina inplikatutako sektore batzuetan eta erabaki ahalmena duten bulegoetan ez dut uste benetako borondatea dagoenik urrats sendorik emateko. Beti esaten dut nire hitzak gustura irentsiko nituzkeela, baina…

Baina hori esan eta denbora gutxira, beste zartako bat. Oraingoan, Gabonetan jokatu ohi den gizonezkoen futbol partidaren harira, berriro. Euskal Selekzioak ez du partidarik jokatuko Gabonetan, kalitate gorena bermatuko duen norgehiagoka ixtea ezinezkoa izan delako. Javier Landeta Euskadiko Futbol Federazioko presidentearen hitzetan, “bukaerara arte saiatu gara, baina ezinezkoa izan zaigu horrelako norgehiagoka garrantzitsu bat jokatu ahal izateko osagai guztiak batzea; oso atsekabetuta gaude”. Martxoan jokatzea da Federazioaren nahia.