Pep Guardiola: “Azaroaren 9an han izango naiz”

2013-12-16  //  Futbola, Nazioartea  //  2 iruzkin

“Ez dago ekintza demokratikoagorik”, esan du Municheko Bayer futbol taldeko entrenatzaile Josep Guardiolak, Kataluniako erreferendumaz galdetu diotenean. Independentziaren aurka daudenek ere haien iritzia plazaratu ahal izango dutela dio: “Aukera paregabea da norberak bere iritzia adierazteko”.

Artur Mas presidentearekiko “miresmena” azaldu du Guardiolak, baita ERC, CUP eta ICV alderdietako buruekiko ere.

“Legeak dira legeak egin eta legeak aldatzen dituztenak, eta herriak dira eskaera egiten dutenak”, adierazi du: “2104ko azaroaren 9an han izango naiz”.

Futbola zirku… Ma che cosa fai?

2013-12-12  //  Futbola  //  Iruzkinik ez

Futbola zirkua omen. Italiako 3. mailako partida bateko irudiok ustea berretsi besterik ez dute egiten.

Lurrera ziplo eroritako jokalarietako bat, arbitroaren garrasiei entzungor eginez.

Azaroaren 10ean, Napoli inguruko Salernitana eta Nocerina taldeek derbia jokatu zuten, duela 25 urtetik lehendabizikoz. Partida beroak izan ohi ziren, zaleen artean liskar gogorrak eragiten zituztenak, eta duela hilabete batekoa ere halakoxea izango zela aurreikusten zuten denek. “Palestinarrak eta israeldarrak eszenatoki berean batzea bezalakoa da”, adierazi zuen Salernitanako presidenteak. Istiluen beldur, sarrera debekatu zien Nocerinako zaleei.

Tamainako agrabioaren aurrean, Nocerinako ultrek estrategia apurtzailea prestatu zuten: Haien jokalariak mehatxatuko zituzten, “elkartasun keinu gisa” partida ez jokatzera behartzeko. Baita helburua lortu ere.

Derbi egunean antzeman zitekeen tentsioa ez zen nahikoa izan futbol zelaiko segurtasun indarrak eta federazioko ordezkariak kikiltzeko, eta arbitroak partida hasteko agindua eman zuen.

Absurduaren zirkuak 21 minutu iraun zituen: lehenengo minutua agortzerako Nocerinako hiru jokalari “lesionatu” eta ordezkatu egin behar izan zituzten. Hurrengo 20 minutuetan taldeko beste bost jokalarik hartu zuten min, akziozko pelikula merkeenetako aktoreak bailiran, ukabilkadak metro erdira “jaso” eta lurrera ziplo erortzen diren horietakoak. Soinu banda bezala, “Errespetua Nocerari eta ultrei” pankarta zeraman abionetaren zarata.

Jokalari haiek ordezkatzerik ez zegoenez, eta talde bat sei futbolarirekin geratuz gero legeak partida bertan behera uztea eskatzen duenez, arbitroak amaiera jo zuen.

Ondorengo ikerketa, atxilotze, epaiketa eta abarrek esperpentoa handitu besterik ez zuten egin.

Informazio gehiago:

Panenka.org (gaztelaniaz)

SKY Sport (italieraz)

La Stampa (italieraz)

Real Madrilen prentsaurrekoan Greenpeacek gola

2013-12-10  //  Gizartea  //  Iruzkinik ez

“Salba dezagun Artikoa. Atera txartel gorria Gazprom konpainiari”, zioen Greenpeacek atzo Kopenhagen zabaldutako kartelak, prentsaurrekoa ematen ari ziren Real Madrileko entrenatzailearen –Ancelottiren– eta Pepe jokalari portugaldarraren atzean.

Gas naturala ustiatzen duen Gazprom konpainia errusiarra da UEFAren babesle nagusietakoa. “Artikoa kutsatzeagatik” jarri du jomugan Greenpeacek. Motor txiki baten bitartez zabaldu zuen kartela talde ekologistak, Txapeldunen Ligako partidaren harira Real Madrileko ordezkariak prentsaurrekoa ematen ari zirenean, dozenaka kameraren aurrean.

Informazio gehiago:

Artikoko piratak. Unai Brea lankidearen artikulua, Gazprom enpresak Ozeano Artikoan laster hastekoa duen petrolio ustiaketaren aurka Greenpeacek joan den irailean egindako ekintza.

Zebraren argi-ilunak

2013-12-04  //  Komiki kritikak  //  Iruzkinik ez

New Orleans, 2007. Ilargi betea. Soldatapeko bi hiltzaile beltzen arrastoari segika ari da polizia. Haietako bat atzeman dute. Bigarrenak, ordea, ihes egitea lortu du, gauerdian azala zuri bilakatu baitzaio tupustean…

(gehiago…)

Asterix eta piktoak: Zaharrak berri

2013-11-19  //  Komiki kritikak  //  2 iruzkin

[Ez dut uste komiki kritika honetan spoiler gehiegi idatzi dudanik, baina Asterix eta piktoak irakurtzeko asmotan bazabiltzate, hobe duzue hemendik alde egitea. Ezuste gutxi eskaintzen du istorioak, daudenak aurrez ezagutzeko]

Asterix eta Obelix, galiar kostaldera iritsi den Mac Uluh kaledoniar izoztuarekin.

(gehiago…)

Euskaltel, jotako ahariaren moduan

2013-11-14  //  Txirrindularitza  //  2 iruzkin

Gorka Izagirre, Iñaki Goiburu, Garikoitz Bravo eta Xabier Usabiaga. (Argazki desenfokatua: Jon Torner Zabala)

Txirrindularitzaren oraina eta geroa mahai-ingurua egin zen atzo Urretxun, Goierri kirol elkarteak antolaturik. Hizlariak, lau: Xabier Usabiaga ETBko kazetaria moderatzaile lanetan, Gorka Izagirre eta Garikoitz Bravo Euskalteleko ziklista ohiak, eta Australiako Orica taldeko mekanikari Iñaki Goiburu.

Hizpide izan zituzten kontuen artean, Euskaltel Euskadiren ingurukoek harritu ninduten gehien. Ez hainbeste Alonsoren proiektu frustratuarenak, baizik eta taldearen egituraketa eta plangintzari buruzkoak. (gehiago…)

“Primizia duzue hau”… milaka lagunek ikusia duten arren

2013-10-29  //  Hedabideak, Kirola  //  Iruzkinik ez

“Esklusiban emango dizuegu albistea”. Zenbatetan entzun-irakurri ote ditugu hitz horiek, hedabide guztietan oro har baina kirol prentsan bereziki. “Esklusiban? Nik beste nonbait entzun dut ba!”. Ez duzue sekula halakorik sentitu?

Susmoek funtsik bazutela ikusi dut gaur, La libreta de Van Gaal blogean irakurritako Exclusivas en YouTube (Esklusibak YouTuben) artikuluan. Bi adibide bildu dituzte.

Sport egunkariaren azalean zera irakurri dezakegu: “Esklusiba: Zubik Ter Stegen lotu du”. Bada, haren lehiakide Mundo Deportivok titular hau ekarri du azalera: “Ter Stegen, lotuta”. Are gehiago, Sport Bild egunkariak atzo iluntzean aurreratu zuen albistea.

Intereconomía telebista kateko Punto pelota saioak, Joseph Blatter FIFAko presidentearen adierazpenak jaso zituen atzo “esklusiban”, bideoa YouTuben milaka lagunek ikusia zutenean. Intereconomía izan zen bideoa aurkitu zuen Espainiako lehendabiziko telebista, eta “primizia” goiburupean aurkeztu zuen.

Asterix, gaur; Tintin… 2052an!

2013-10-24  //  Komikiak  //  Iruzkinik ez

Eskoziara bidaiatuko dute oraingoan Asterixek eta Obelixek.

Gaur argitaratu da Asterix eta piktoak, heroi galiarren abenturak biltzen dituen komiki berria. Goscinny gidoilaria 1977an hil zen, eta harrezkero Uderzo marrazkilariak egin zituen bildumako komiki guztiak. Liburu honek, ordea, ez darama haren sinadura, Jean-Yves Ferri gidoilariarena eta Didier Conrad ilustratzailearena baizik. Frantziarrak biak, 1959an jaio ziren, Asterixen lehendabiziko abentura –Asterix galiarra– publikatu zen urtean hain justu.

Asterix eta Obelixek komiki honetan Kaledoniara bidaiatu dute, erromatarren garaiko Eskoziara. Halaxe deitu zieten kaledoniarrei: “Piktoak” edo “gizaki margotuak”.

Euskarazko edizioa Bruño argitaletxeak plazaratu du, Usua Lasak itzulia. 12,90 eurotan du salgai bere webgunean.

(gehiago…)

Euskaltel-Alonso: Desengainua

2013-09-24  //  Txirrindularitza  //  Iruzkinik ez

Agur Euskaltelen eta Alonsoren arteko akordioari.

Akabo. Euskaltel-Euskadiren eta Fernando Alonsoren aurre-akordioa behin betiko hautsi da. Bi aldeak gogotik saiatu omen dira adostasunera heltzen, baina ezin izan dute aurrera egin. Proiektuak hasieratik zituen argi-ilunak, baina inork gutxik espero zuen gauzak horrela amaituko zirenik… (gehiago…)

Euskalteleko langileek ez dute Alonsoren taldean jarraituko

2013-09-16  //  Txirrindularitza  //  Iruzkinik ez

Euskalteleko ziklistak eta staff teknikoa, Espainiako Itzuliko podiumean (@mikelastarloza)

Datorren urterako kontraturik ez duten Euskaltel Euskadiko ziklistek Fernando Alonsoren taldean jarraituko ez zutela bagenekien, baita kontratuak dauzkaten batzuek ere taldea laga dezaketela. Baina pentsatzen ez genuena da –nik behintzat usaindu ere ez nuen egin– Igor Gonzalez de Galdeano managerra eta haren lantaldea kanporatuko egingo dituztela. Hori da behintzat Alonsoren asmoa, El Periódico egunkariak plazaratu duenez. (gehiago…)