Maiatzak 17

Atalak: Sailkatu gabea

Maiatzak 17. Letra galiziarren eguna. Euskaraldia bete-betean. Nire herriko jaiak. Hausnarketa arin batzuk.

Letra galiziarren eguna, urtero legez, maiatzaren 17a da eta, azken urteotan, ohikoa denez, galizieraren aldeko manifestazio handia izango da Santiagoko karriketan (seguruenik, Europa mailako hizkuntza gutxitu baten aldeko manifestaziorik jendetsuenak dira Galiziakoak, Korrika eta abarrak manifestazio moduan hartzen ez badira). Lingua vital xa!

Baina, aurton, nire ustez, letra galiziarren eguna berezia da. Berezia aurtengo omenduak ahozko tradizioaren eramaile eta sortzaile diren emakumeak direlako. Kantariak eta ahozko poesia herrikoia, literatur transmisioaren garrantzia eta ahozko lirika, anonimotasuna, komunitatea eta andrazkoak. Gurean ere beharko litzateke mota honetako omenaldirik inoiz …

Letra galiziarren eguna da Galizian hizkuntzaren alde egiten den ariketarik erraldoiena, non gaztelaniaz aritzen diren egunkariak egun batez galizieraz argitaratzen diren, non galiziera goratzen den leku guztietan, non galizieraren berbarik politena zein den aukeratzen den, non … Gurean, baina, Euskaraldi bete-betean gaude, aurten lehendabiziko aldiz maiatzean, udaberri aldean. Horren harira, hikaldia eta pantailaldia (a ze tresna den Zernonikusi webgune eta aplikazioa) ere antolatu dira (bide batez, oso esanguratsua iruditu zitzaidan Onintza Iruretak Goiatz Urkijori egindako elkarrizketa). 

Eta, bitartean, zer eta Derioko jaiak. Gaur egun handia: paella txapelketa, herri bazkaria, bakarrizketa, kuadrilla txapelketa, DJak herrian zehar eta gauean kontzertuak. 

Dena maiatzaren 17an, komunitatea(k), hizkuntza(k) eta herri ekimena(k). Bejondeigula!