Tolosaldea 2015ean: gaika %60 bildu eta 116 kilo errefus pertsonako

Atalak: Errefusa, Estatistika, Mankomunitateak

Gaikako bilketa tasak Tolosaldeko herri bakoitzean. (Irudia: Tolosaldeko Mankomunitatea)

[Pello Zubiria Kamino] Tolosaldeko Mankomunitateak ezagutarazi ditu eskualdean 2015ean lortutako emaitzak. Hondakinen %60,44 bildu zen iaz Tolosaldean eta errefus kopuruari dagokionez pertsonako 116 kilo. Josu Amilibia Adunako alkate eta mankomunitateko lehendakariak azpimarratu zuen azken bost urteetan egindako hobekuntza: 2011an gaikako bilketa %25ean zegoen eta eskualdeko biztanle bakoitzak 268 kilo errefus bota zituen.

Emaitzak konparatzeko neurgailu onena pertsonako/urteko errefus kilo kopurua baita, hona zer eman duen Tolosaldeak herrika:

Alegia                      50
Ikaztegieta              41
Anoeta                     68
Irura                         58
Zizurkil                    98
Amasa-Villabona   59
Ibarra                       56
Tolosa                      95
Andoain                232
Landa Eremua       80
(19 herri biltzen ditu Landa Eremua atalak: Abaltzisketa, Aduna, Asteasu, Amezketa, Altzo, Alkiza, Albiztur, Baliarrain, Berastegi, Berrobi, Lizartza, Leaburu, Hernialde, Belauntza, Larraul, Elduaien, Orendain, Gaztelu eta Orexa. Horien media da 80 kilokoa, baina jakina da tartean batzuek errefus gutxiago sortzen dutela, hasita Zero Zabor herri txikien aitzindaria den Orendainek).

Tolosaldeko bilketaren bilakaera 2011tik 2015ra. (Irudia: Tolosaldeko Mankomunitatea)o

Tolosaldeko Atariak informatu duenez, mankomunitateko arduradunek nabarmendu zituzten eskualdeko biztanleen laurdena biltzen duen Andoainen emaitza txarrak, 2011an Tolosaldeak zeuzkan kopuruetatik hobera egin gabe. Amilibiak adierazi zuen Andoaien aurrerantzean nola jokatu aztertzen ari direla.

Gainerakoan, EHBilduko hautetsia den lehendakariak azaldu zuen mankomunitatean ordezkari guztiek aho batez onartuta daukatela dekalogo bat etorkizunari begira: “Herri asko %70 edo %80ko tasetan egon arren, eta ikusita bataz bestekoa %60ean dagoela, adostu zen mankomunitate bezala %60 horretatik jaistea ezingo zela onartu. Tasa handiagoa duten herrietan, saiatu beharko lirateke portzentaje hori mantentzen”

Lehendakariorde den Patxi Amantegik (EAJ, Tolosa) adierazi zuen %60a gaindituko dela “esfortzu gehiegirik gabe. Kolaborazio pixka batekin, ez dugu zertan jatsi behar. Margena dago eta horren gainetik ibili gaitezke”.