Protesta artean onartu dituzte Zubietako erraustegiaren lizitaziorako baldintza pleguak

Atalak: Errausketa, Zubieta

Zubietan Erraustegia eraiki eta kudeatzeko lehiaketaren baldintza pleguak onartu ditu Gipuakoako Hondakinen Kontsortzioak (GHK) osteguneko ez-ohiko batzar. EAJ eta PSEren eskuetan dauden Gipuzkoako Aldundiak eta mankomunitateek lizitazioa onartu dute (botoen %89,7) eta EH Bilduko Tolosaldeako eta Urola Erdiko mankomunitateek aurka bozkatu dute (%10,3).

Erabaki honekin GHKk argi berdea eman dio Zubietako erraustegiaren proiektuaren hurrengo faseari. Proiektuan parte hartu nahi duten enpresek 60 egun izango dituzte beren proiektuak aurkezteko, azaroan enpresa aukeratu eta lanak 2017ko urtarrilean hasi nahi dituzte, asteazkenean Markel Olano eta Jose Ignacio Asensiok jakinarazi zutenez.

Kalean protesta

Argazkia: Estitxu Eizagirre.

Errausketaren aurkako mugimenduak deituta, ehunka lagun batu dira Donostiako Gipuzkoa Plazan, Gipuzkoako Hondakinen Kontsortzioak erraustegia egiteko adjudikazio agiriak onartu behar dituen bitartean.

“Zuen negozioa, gure minbizia” dioen pankartaz gain, izara zuriekin lurrean etzan dira protestariak. Sirena-hotsa entzutearekin batera, Foru Aldundi aurreko lur zoru guztia okupatu dute Frederic Chopin-en martxa funebrea entzutzen zen bitartean. Heriotza sinbolizatzen zuen kide bat, sega eta guzti lurrean etzanda zeudenen artean ibili da, performance-a borobilduz.

“Uztailaren 28a, datozen hamarkadetan gogoratuko dugun eguna izan daiteke”, adierazi dute. “Gipuzkoan inoiz egin den diru xahuketa handienetako baten aurrean egon gaitezke”.

Errausketak osasunean eragiten duten kalteak ezagun direla gogorarazi dute, eta horrek nahikoa behar luke beren ustez proiektua ipso facto geratzeko.

“Proiektuak aurrera egiten badu, herritarrok 2051 arte ikaragarrizko dirutza ordaindu beharko diegu enpresa pribatu batzuei”. Errausketaren aurkako mugimendutik uste dute halako kasu batean, zerbitzu publiko ugari eta udalen aurrekontuak ere “erreko” dituela zorrak.

“Egiten ari diren modua ere bidegabea da, premeditazio eta maltzurkeriaz ari dira. Gipuzkoa erdiak merezi oporrak hartu dituenean sinatu nahi dute lizitazioa”, adierazi dute.

Lehiaketan aurkeztuko diren enpresei oharra egin diete: “Pentsatu bi aldiz non ari zareten sartzen. Operazio honen atzean zein enpresa dauden jakinaraziko dugu, eta abisatu nahi dizuegu gipuzkoarrok ez dugula etsiko erraustegia itxi arte. Sekulako negozioa egin beharrean, agian dirua galduko duzue”.

Gipuzkoarrei erraustegiaren aurka aurrera pauso bat emateko eskatu diete, eta datozen hilabeteetan ekimenak bideratzera deitu dute.

“Gure agintariek uste badute eskubidea dutela Gipuzkoako etorkizuna enpresa pribatu batzuei emateko, goazen herritarrok gure bizilagunak eta udalerriak babesteko ardura guk hartzera”.

Erraustegiaren esleipena sinatuko duzuen Foru Aldundiko eta GHKko agintariei mezua bidali diete: “Alternatiba badago, merkeagoa eta osasuntsuagoa. Egin beharrik ez dagoen erraustegia egiteko zor ilegitimo bat egitera zoazte. Gipuzkoako instituzioak eta herritarrak kaltetzera zoazte. Ez gure izenean”.