Eva Rivera: “Donostia 2016n dirua kudeatu den moduarekin ez nago ados”

Atalak: DSS2016EU, Kultur eragileen iritzia

Eva Rivera kultur kudeatzailea (argazkia: Kulturaldia).

Eva Rivera pertsona ezaguna da Donostiako kultur saltsetan, besteak beste Dock of The Bay dokumental musikalen jaialdia antolatzeko egiten duen lanarengatik, baita Expediciones Polares argitaletxean aritzeagatik ere.

Kulturaldia webgunean elkarrizketa mamitsua egin dio Jon Pagola kazetariak. Hiriko kultura egituratuta dagoen moduaz hitz egin du besteak beste, egitasmo publikoek hartzen duten leku –bere ustez– handiegia kritikatuz.

Donostia 2016rentzat ere izan du hitzik. Adierazpenen pasarte esanguratsuenak euskaratu ditugu:

Arduradunengana iristeko arazoak

“Alde batetik, gaitasun falta handia sumatzen dut eurengana [Donostia 2016ko arduradunak] iristeko. Niri urtebete kosta zait. (…) Hiriko kultur sarea ez dela ebaluatzen antzematen dut. Eta ez nago ados dirua kudeatu den moduarekin. Zergatik eman zaie batzuei hainbeste eta besteei hain gutxi? Lizitazioak ikusi ditut eta, benetan, ezinezkoa zen baldintzak betetzea”.

Dock of The Bay “ez zaie interesatzen”

“Guri (Dock of The Bay) 5.000 euro eman zizkiguten Ikusle Berriak sailerako bakarrik, zeren, hitzez hitz, festibala ‘ez zitzaien interesatzen’. (…) Dirua hartu behar dut beste erremediorik ez daukadalako, baina nire barruan zerbaitek esaten du diru hori ez zaiola interesatzen. Ez didazu entzun. Ez zaizu interesatu esan dizudana. Hori da min handiena ematen duena”.

2016aren programa ulergaitza

“Ni, egiazki, ez naiz iritsi ulertzera zein den hiriburutzaren programa. Prentsaren bidez enteratu gara 2016 Irakurketa proiektuaz eta hor Expediciones Polaresek lekua izan dezake. Ez digute deitu behar, baina txokatzen dit hirian gertatzen ari denari eskaintzen dioten arreta eskasak eta ez da gertatzen den lehen aldia. Laburpen gisa, uste dut oportunismo asko egongo dela, su artifizial asko eta 2017ak jendea bere lekuan jarriko duela. Balantzea egingo du. Lehendik geundenak mantenduko gara eta, asko sentitzen dudan arren, 2016ko proiektutik geratuko dena ez da gauza handirik izango”.