"Mr Robot": Azken urteetako telesail onena izateko bidean

Atalak: Gomendioak, Telesailak

Azken urteetako telesail onenak nabarmentzeko garaian, “onak, oso onak ala bikainak” etiketa jartzeko ohitura izaten dugu. Baina “ona ala txarra” kontzeptutik haratago, bada aparteko talde txiki bat, telesailen historian eragin berezia izan duena, arrastoa utzi eta estreinatzen diren momentutik, klasiko bihurtzen diren horietakoak. Iraultza kreatibo bat eragin duten ekoizpenak azken finean. Arrazoi bat ala bestea, aztarna ezabaezina utzi duten fikzioak. 1990 urtean: Twin Peaks, 1999: The Soprano´s, 2002: The Wire,  2004: Lost, 2008an: Breaking bad eta 2011 urtean: Game of Thrones adibidez.

2015 urtean gaude -eta momentuz handikeria dirudien arren- izango al da Mr Robot talde esklusibo honen kide berria?



Asteko, salbuespen bat egiteko beharra sentitu dudala esatea litzateke bidezkoena. Normalean telesaila amaitu -ala behintzat denboraldi osoa amaitzear dagoenean- gustatzen zaidalako gomendioak egitea, ikuspuntu global eta bidezkoago bat edukitzeko. Baina Mr Robot-en denboraldi-hasiera hau ikusi dudan unetik,  azken aldian dastatu dudan irabiaturik ausartenaren eta berritzaileenaren aurrean nagoela ohartu naiz segituan. Geruza ugariz osaturiko trama harrapakor eta oso interesgarri batekin. Eta batez ere, begi bistara ikusten dugunaz haratago,  azpian, sakontasun handiko zerbait topatu dudala.
Lehen atala aireratu eta egun batzuk beranduago, bigarren denboraldi batera luzatuko zutela iragarri zuten. Zer ote zuen ba pilotu honek eskaintzeko? Azken urteetan ikusitako lehen-atal zirraragarri, berritzaile, harrigarri eta ausartenetarikoa. Ia ezinezkoa, 50 minutuan gehiago ematea.
 

Elliot Alderson

Istorio erakargarri honen protagonista Elliot Anderson dugu. Pertsonaia sakon honen atzean dagoena aldiz,  jatorri egiptoarra duen Rami Malek aktorea. Lan zoragarri eta ilun bat burutzen duelarik.  Jendearekin erlazionatzeko orduan,  arazo nabarmenak dauzkan tipo bitxia eta drogen menpe bizi dena. Ciber-segurtasunaren arloan lanean dabilen arren, ezaguera harrigarri horiek erabiliz, eguneko/gaueko beste tarteetan, delitugile desberdinei “mozorroa kentzen” aritzen da. Baita hainbat vendetta pertsonal egiteko aprobetxatuz. -Gainazaleko konparaketa bat egitearren Dexter-Hacker antzeko bat-.  Irrika jasanezin hori asetzeko, mendeku-zerrenda horren lehen postuan, bere aita lanean ibili zen multinazional teknologiko bat aurkitzen da: “E-Corp”. -Dirudienez, bere aita hiltzearen erantzule zuzenak.- Mr. Robot-ekin (Christian Slater) topo egiten duen arte, terrorismo informatikoaren arloan aritzen den erakunde bateko liderra.
 
 

“Fsociety”

Aipaturiko terrorismo-informatikoaren arloan aritzen den erakunde hori, Fsociety ezizenarekin ezagutzen da hain zuzen ere. Gaur egungo Anonymous fenomenoarekin konpara genezakeena -mozorro eta guzti noski-
 
 

 E(vil) – corp

Inongo disimulurik gabe, Apple-ekin konparatzen duten enpresa.Lehen aipatu bezala, Elliot-en irrika  hori mendeku moduan asetzeko, lehen postuan aurkitzen den helburua. Bere aita lanean ibili zen multinazional teknologikoa eta dirudienez, bere aita hiltzearen erantzuleak.
Bide batez, bi logo hauek hain antzekoak izatea, kasualitatea hutsa?

 
 
 
 
 
 
 
Bertako burua,  Tyrel Wellick , momentuz antzeman daitekeenarekin behintzat, pertsonaia iluna eta desorekatua. Arrakasta besterik axola ez zaion tipoa eta sekretu ugariz josia.

 
 

Estetika eta gaia:

David Fincher, Fight club eta Kubrick

Lau atal aireratu dituzte bakarrik, baina nahikoa, thriller psikologiko bikain eta desberdin baten aurrean gaudela ohartzeko. Gaurkotasun izugarria duten hainbat gaiei heltzen dion gidoi ziztatzaile bati esker.
Oso deigarria baita ere, estetikaren arloa. Alde batetik –eta berriz ere handikeria dirudien arren- plano motak, hauen tratamendua eta musikarekin batera sortzen duten sinfonia hori, Kubrick-ek erabiltzen zuen antzeko planteamendua dirudi. Baita Clockwork Orange filman Alex-en pertsonaia eta kasu honetan Tyrell Wellick aurkezterako garaian, musika klasiko eta irudi bortitzak nahastean. -Telesailan eskalea jotzen duen momentua vs Kubrick-en filmean Alex eta bere lagunak gauza berbera egiten dutenean adibidez-

Eta bestetik, saihestezina David Fincher burura etortzea eta Fight club filma konkretuki. Itxuraz eta batez ere zabaldu edo kritikatu nahi den mezuari erreparatzen badiogu. Eta ez naiz ari, istorioaren eta pertsonaien espiritu ekintzaile horren antzekotasunez soilik. Baita protagonistak, off ahotsaren bitartez  jaurtitzen dituen sistemaren aurkako speech zoragarri eta suntsitzaileez.  Gizarte moderno honetan, bakoitzaren egunerokoak duen zentzuari, kritika zorrotz eta sakon bat eginaz. Baina batez ere, nola multinazionalek diseinaturiko bizitza-mota honen esklabo bilakatu garen. Kontsumismoari muturrekoa azken finean. Ez al da Fight Club filmaren mezu berbera edo antzekoa?

 
 

Musika

Hainbat momentutan entzungai den musika klasikoaz gain, soinu banda, Fincher-en filmetan –berriro ere- , Trent Reznor-ek erabiltzen duenaren oso antzekoa.

Telesail elkarreragilea

Zalantza izpirik gabe, eta Lost-ekin gertatu zen bezala, ikuslearekin ezinbesteko konexioa eta biraltasuna sortuko duen telesaila. Alde batetik internet bidezko “ahoz-ahoko” hori ezinbesteko bihurtuko delako, foro eta weborrialde desberdinetan sortuko diren teoriekin. Ikusi bestela web ofizialean sortu duten “jokoa”:
 

http://www.whoismrrobot.com/fsociety/

 

Bestetik Elliot-ek Off-ahotsa erabiltzen duen bakoitzean, ikuslearekin ari dela elkar–eragiten, istorioa barne-barnetik sentituz. Laugarren ataleko eszena batean adibidez, zuzenean pantailari begiratu eta: “ah! hor zaude, zutaz ahaztua nengoen” dio.

 
 

 Beraz…

Aurten, telesail bakar bat aukeratu behar baduzue, ahaztu True detective II, Better Call Saul ala Sense 8,  Mr Robot izan dadila zuen hautatua, ez zarete damutuko. Horrela jarraituz gero urteko telesail onena bihurtzeko txartel guztiak dauzkan ekoizpena baita.
Eta nork daki zerrenda honen kide izaten amaituko duen…
– lehen denboraldia amaitzean ikusiko dugu-
1990 #Twinpeaks 1999  #TheSoprano‘s 2002  #TheWire 2004  #Lost   2008 #BreakingBad 2011 #Gameofthrones……….2015…#MrRobot ??? ikusi beharko…