Antzua baserriko idiek Mary elefantea garaitu zutenekoa

Atalak: Herri kirolak

Zortzi minutu erritmo onean egin zituen elefanteak, baina gero… (Argazkia: Eduardourzelai.com)

1963ko ekainaren 2a. Berrizko probalekuan apustua. 1.900 kiloko harriarekin ordu erdian zein animaliak luze gehiago egin:  Antzua Baserriko idi parea batetik eta… Mary elefantea bestetik!

Eduardo Urzelaik antolatu zuen dema. 1.200 kiloko pisua zuten bi idien artean, ia 5.000 kilo Milango zirkuko elefanteak. Antzua baserrikoek eta ikusle ugarik ordea argi zeukaten: “Elefanteak indar handia izango du, baina ikusiko dugu gai ote den idien abiaduran mugitzeko”.

Zuzen zebiltzan. 52 iltze egin zituzten idiek. 10 besterik ez elefanteak.

Halaxe jaso zuen NO-DO albistegiak [milesker erreferentziagatik, Ersolegi]:

Eta halaxe errematatu zuen bere kronika La Gaceta del Norte egunkariko berriemaileak (jatorrizkoa gaztelaniaz):

“Berehala ikusi zen elefanteak ezin zuela deus egin, oso geldoa zen. Kolpea gaizki ematen zuen eta gainera ez zegoen ohituta. Dena den, zortzi iltze egin zituen –bere balantzekin jendeari etengabe sustoak emanez– zortzi minututan. Baina orduan erabaki zuen bat-batean tronpa erorien greba egitea. Eta ez zuenez tira egin nahi, ez zuen tira egin. Kolpe eta oihuek bultzatuta hamar iltze eta laurden egin zituen, baina ez zen hortik pasa”.

“Jendeak, apur bat dezepzionatuta, txistu (askok) eta txalo (gutxik) jo zuen ikuskizunaren amaieran. Tira, sekula ikusi gabeko esperientzia ospatu da Berrizen, emaitza ekonomiko onarekin, hori guztia Urzelai handiari esker. Ea hurrengoan. Ea bufalo bat ekartzen digun”.