Krimeako futbol taldeak onartzeagatik, Errusia 2018ko Munduko Koparik gabe?

Atalak: Errusia, Futbola

Krimeako taldeak onartzeagatik 2018ko Mundu Kopa ez ote dieten kenduko beldur dira errusiar agintari batzuk. Argazkian, Sevastopoleko zaleak.

Iragan astean hasi zen Errusiako Futbol Kopa. Tartean, bi partida hauek: Sebastopoleko SKChF – Simferopoleko TSK eta Yaltako Zhemtxuzhina – Sotxi. Emaitzen gainetik, zeresana eman du lehendabiziko hiruak Krimeako klubak izateak. Errusiako txapelketa ofizial batean aritu izanak eragina izan dezake errusiar taldeek Europako txapelketetan jasan dezaketen patuarekin (kanporatzearekin), edo 2018ko Munduko Kopa hartu ahal ez izatearekin.

Krimeako penintsulak pasa den martxoan Errusiarekin bat egin zuenean, bi talde nagusiek (Sebastopol Futbol Klubak eta Simferopoleko Tavriak) Ukrainako Ligan jokatzen jarraitu zuten, baina denboraldia amaitzean desegin egin ziren –ustez zorrak ez kitatzeagatik–, eta SKChF eta TSK izenekin birfundatu zituzten. Errusiako Federazioak bere txapelketetan onartu ditu biak, baita Zhemtxuzhina ere.

Aldaketak aldaketa, UEFA eta FIFA Europako eta Nazioarteko futbol federazioentzat talde horiek guztiak ukrainarrak dira oraindik. Horrek esan nahi du, batetik, gaur gaurkoz futboleko goi-estamentuek uko egiten diotela Krimeako klubak errusiar bezala aitortzeari; eta bestetik, konponbiderik topatu ezean, epe motzean Errusiak zigorra jaso dezakeela kirol arloan. Alegia, futbol federazioko ordezkariak beldur dira ez ote dituzten Errusiako taldeak Txapeldunen Ligatik kanporatuko edo, larriagoa dena, ez ote duen galduko 2018ko Munduko Kopa antolatzeko aukera, izan UEFAren araudia urratzeagatik, zein nazioarteko komunitatearen isunengatik.

Jatorrizko artikulua: Crimean cup teams could cost Russia the right to host 2018 World Cup (Jonathan Wilson, The Guardian)