Eolikoak: Sei kilometro hormigoi, balizko txirrindulari lasterketak… herritarrak limurtzeko modu xelebrea dute batzuek

Atalak: Sailkatu gabea

Flipatzen ari naiz proiektu eolikoei buruz Azkoitiko Maxixatzen aldizkarian topatzen ari naizen datuekin. Azkoitiaz gain, Azpeitia, Antzuola, Ezkio-Itsaso, Zumarraga eta Urretxuko lurrak ere hartuko lituzketen bi proiektu eolikoez hainbat gauza irakurri dugu, haien tamainaz edota herritarrengan eragiten duten ezinegonaz ere aritu gara zenbaitetan ARGIAn, baina horrelakorik inon ez dut irakurri orain arte. Agintariek ez digute deus kontatu.

Badira bi proiektu eoliko aurreikusiak inguruotan. Irimo aldean bata (Trekutz), eta Oleta-Izazpi artean bigarrena (Buruzai). Egunotan irakurri dugu: Cilda Energy enpresak Trekutzeko zentral eolikoa egiteko beharrezkoak diren baimen administratiboa eta ingurumen baimena eskatu ditu (Otamotz, 2023-12-16). Buruzai zentral eolikoaren administrazio baimena eta ingurumen inpaktuaren adierazpena eskatu ditu Green Capitalek (Maxixatzen, 2023-12-15). Bost zentral eolikori buruzko iragarkiak egun bakarrean, Jaurlaritzaren aldizkarian (ARGIA, 2023-12-15)

Harritu nauten datuak, halere, topatu ditut Zazpi Kurutze mendi martxa ez antolatzeko erabakiari buruzko artikuluan (Ihintza Elustondo, Maxixatzen, 2023-12-20). Azkoitiko Anaitasuna mendi taldeak eskuragarri jarri duen lotura honetan, kontsulta daitezke proiektuaren nondik norakoak, ibilbidea, aerosorgailuen kokapena, dimentsioak eta abar. Tartean (“Datu interesgarriak” karpetako 12. dokumentua), gauza hau dago.

“Afluencia de visitantes” (?!), “turismo que acude a los mismos” (!?), “mejora al tránsito”(!?), “Vuelta ciclista a España” (!?)… Zein planetatan bizi dira Green Capital-eko enpresariak? Are, ze planetatan bizi dira horrelakoak onartzen dituzten lekuko agintariak? Zer uste dute, parajeotan zikilismoa gustuko dugulako eta argazkian Euskalteleko kamisetak jantzita dauzkaten bi pertsona erakusteagatik jendea limurtuko dutela? Egia esan, agian hobe erantzuna ez jakitea.

Aurreko batean jada idatzi nuen, Zumarraga eta Urretxuri buruzko artikuluan, itomen sentipena geroz eta handiagoa zela herriotan. Tartean, zera nioen:

Deskribatu ditzadan apur bat Zumarraga eta Urretxu, aldartea kamustu didan ozpinkeriatik: Gipuzkoa erdialdean, etxeak etxeen gainean, begirada “urrunera” eramateko zabalgunerik apenas dagoen, ez berdegune handirik. Ez daukagu itsasorik, ez Aralar, ez Urbia-Aizkorri, ez Izarraitzik, hurbileko batzuk aipatzearren. Dauzkagu Antio eta Santa Barbara. Irimo, Samiño, Izazpi. Mendi umilak, 1.000 metrotik beherakoak, eta aukera gutxi ematen dutenak “goi-lautadetan” ibilbide “luze antzekoak” egiteko, naturarekin bat.

Irimoko Zazpi Puntak aipa ditzakegu, eta Oleta-Samiño arteko zelaia (bertakook “kresterioa” edo “kordala” deitzen duguna). Ez dira tarte luzeak, baina hodeietatik hurbilen, orduan. Eta hain justu, Capital Energy enpresak zentral eoliko bana egin nahi du Irimo inguruan eta Oleta mendian.

Bada, Ihintza Elustondok Maxixatzen aldizkarian plazaratutako informazioak itomen are handiagoa eragin dit: “Izazpiko gurutzearen alboan 4.340 metro koadroko plataforma laua eraikiko dute, 23.000 metro kubiko lur mugituko dituzte, eta Oleta eta Izazpi sei kilometroko hormigoizko pista batek elkartuko ditu. Horrez gain, aipatzekoa da proiektu honek Iruarrietako estazio megalitikoan izango duen eragina”.

Erdian, Izazpi.

Horrelakoak onartzen dituztenek edo ez dute herria ezagutzen, edo ezagutzen dute baina ez dute maite, edo maite dute baina gehiago maite dute beste zerbait, edo ezagutzen dute eta maite dute eta konbentziturik daude are maitagarriagoa izango dela beste hormigoi dosi batekin eta erroten hegalak dantzan direla, edo maite dute baina bihotza apurtzear proiektuok onartzea beste irtenbiderik ez dute ikusten energia krisia gainditzeko, edo nik ez dakit zer.

“Anaitasuna mendi bazkunako kideek adierazi dute beraiek ez dutela mendia ‘horrela’ ulertzen”, idatzi du kazetariak Maxixatzen-en. “‘Inguruan dugun mendia ingurune preziatuena dela uste dugu’. Etor daitekeenarekin ‘oso arduratuta’ daude, eta gauzak egiteko ‘beste modu asko’ daudela uste dute: ‘Udaletik ez dugu nahiko informazio jaso, eta are gehiago, informazioa ezkutatu egin zaie herritarrei’. Beraz, gertakari horiek medio erabaki dute Zazpi Kurutze mendi martxa ez antolatzea egun haren antolakuntza taldean dauden kideek”.

Abila izan behar du gero pertsonak, tamainako dorretzar eta karreterak ezkutuan mantentzeko.