Jokalariaren aitak arbitroa iraindu, eta klubak semea kanporatu. Zerbaitek huts egiten du…

2017-02-01  //  Futbola, Gizartea  //  Iruzkinik ez

[2017-02-02]

Ranillas taldeak atzera egin eta adinez txikiko bi jokalariak ez kanporatzea erabaki du, errurik ez dutela iritzita. Euren aitek, ordea, ezin izango dute partidetara joan (Iturria: El Periódico de Aragón)

[2017-02-01]

Alebin mailako futbol partida Zaragozan (Espainia). Mamadow Sow zen arbitroa, 20 urteko mutil beltza. Partida amaitzean, Ranillas taldeko jokalari baten aitak “negrito” deitu zion, eta muturrean jotzeko imintzioa egin. Gainerako ikusleek gerarazi zuten. Denbora gutxira polizia agertu eta aita hura eta beste bat atxilotu zituen.

Gertaera horren aurrean, Ranillas klubak zer erabakiko eta aita horien semeak taldetik kanporatzea, gurasoak futbol zelaitik urrun mantentzearren.

Mamadou Sow, artxiboko irudian (Twitter)

Bai, galdera bera egin diogu geure buruari: Zergatik zigortu dituzte 11 eta 12 urteko bi mutikoak, euren aitek egindako kirtenkeriagatik? Ez du ez buru ez hankarik. Agian, klubaren asmoa da mutikoak denbora txiki baterako kanporatzea, ez dakit, aste pare baterako edo, gurasoek gaiaz hausnartu eta jarrera alda dezatela bultzatzeko. Baina horrela izanik ere…

Zer ariko dira pentsatzen mutiko horiek?

Iturria: La Vanguardia

“Emakumeak sukaldera, gizonak estadiora”

2017-01-30  //  Futbola, Generoa  //  Iruzkinik ez

Lyongo Olympique futbol taldeko zaleek irudiotan dituzuen pankartak erakutsi dituzte asteburuan, euren estadioan:  Gizonezko baten siluetaren oinetan, “Estadioa” hitza eta harmailetara seinalatzen duen gezia; eta emakumezkoaren siluetaren oinetan, “Sukaldea” hitza eta estadiotik kanpora bidaltzen duen gezia.

Mezua iraingarria da bere horretan, baina are inozo eta mingarriagoa da kontuan hartzen badugu emakumezkoen Lyongo Olympique futbol taldea dela munduko klub onenetakoa. Azken urteotan zazpi liga eta hiru Txapeldunen Liga irabazi ditu, 2015-16 denboraldian tartean.

Zer esan ere ez dakigu. Matxismoa futbolean… beste behin.

Iturria: PlayGround

Emakume pilotariak lehian, aitzindari den txapelketan

2017-01-27  //  Pilota  //  Iruzkinik ez

Asteburuan jokatuko da Laboral Kutxa Emakume Master Cup txapelketako 2. kanporaketa. Euskal Herri mailan egiten den lehendabiziko emakumeen binakako esku-pilota txapelketa da.

Txapelketa bi kategoriatan jokatzen ari da: Elite maila batetik eta Lehen maila bestetik. Elite mailako kanporaketak otsailaren 5ean jokatuko dira Ordizian, eta finala martxoaren 5ean –Emakume Langilearen Nazioarteko Eguna baino apur bat lehenago– Zornotzako udal pilotalekuan, Lehen mailako finala amaitu eta gero (ETB1ek zuzenean emango du). Elite mailan lehiatuko diren bikoteen artean Patri Espinar-Maite Iriarte, Ainhoa Garmendia-Maddi Mendizabal, Olatz Arrizabalaga-Leire Etxaniz, Nagore Arozena-Maider Mendizabal eta Iera Agirre-Leire Garai daude, besteak beste.

Lehen mailako txapelketari dagokionez, pasa den igandean jokatu ziren lehendabiziko kanporaketak Zestoan, eta igande honetan jokatuko dira bigarrenak, Larrabetzun. Sailkapen fasea otsailaren amaiera arte luzatuko da eta finala, esan bezala, martxoaren 5ean egingo da Zornotzan. Norberaren mailaren arabera eliteko kategorian edo lehen mailakoan eman ahal izan dute izena pilotariek. “Federatu gabeko emakume pilotari oso onak daude, eta haiek ere parte hartzea nahi dugu”, zioen Emakume Master Cupeko antolatzaile Iker Amarikak, aurkezpen egunean.

Euskal Herriko eta atzerriko pilotariak

Euskal Herriko pilotariez gain, Andaluzia, Asturias edota Herrialde Katalanetakoek ere parte hartuko dute txapelketan. Lehen mailako bigarren kanporaketetan, esaterako, Erika de Prado, Lucia Fonseca, Miriam Ballesta eta Mariona Salat lehiatuko dira, besteren artean. Izenen artean Amparo Marta valentziarra ere ageri da, baina Elvira Lopezek beteko du haren lekua, Tavernes Blanques pilota klubeko presidenteak, Emakume Master Cup txapelketaz eta pilotak Valentzian bizi duen egoeraz mintzo den elkarrizketan kontatzen duen moduan.

Emakume Pilotarien II. Topaketa

Bihar, larunbata, Emakume Master Cup txapelketako bigarren kanporaketaren atarian, Emakume Pilotarien II. Topaketa egingo da Larrabetzuko pilotalekuan bertan, Txokoan elkarteak antolatuta. Lagun arteko dozena bat partidek osatzen dute egitaraua. Igandean lehiatuko diren pilotarietako askok jokatuko dute larunbatean, beste bikotekide batzuekin.

Indarkeria matxistari gorazarre futbol estadio batean, beste behin

2017-01-23  //  Gizartea  //  Iruzkinik ez

[2017-01-24, 09:40] Pepe Castro, Sevillako presidentea: “Biris zaleen taldeko kideak ez ziren Sadarren izan. Sevillaren koloreak dituen pankarta batean ‘Gordo’ idatzi du norbaitek. Zuek edo zuen senideetako batek ‘kakanarrua’ idaztea bezala da. Ez du deus esan nahi”. (Diario de Noticias)

[2017-01-24, 09:30] Nafarroako Gobernuak Sadarreko pankarta arbuiatu du (La Vanguardia)

[2017-01-24, 09:22] Andaluziako Juntak Sadarreko pankarta arbuiatu du (El Confidencial)

[2017-01-24, 09:13] Iruñeko Udalak pankarta arbuiatu eta Espainiako Gobernuak Nafarroan duen ordezkariaren dimisioa eskatu du (Iruñeko Udala)

[2017-01-24, 08:57] Osasunako Zuzendaritza Batzordeak erabaki duenez, aldez aurretiko baimenik izan gabe kanpoko futbol taldeko  zaleek debekaturik izango dute Sadarren pankartak jartzea, Osasunako zaleen kasuan bezala. (Osasuna)

[2017-01-23, 18:37] Pankartaren aurkako erreakzioak: Nafarroako Parlamentua eta alderdi politikoak (Naiz)

[2017-01-23, 12:25] “El prenda”-ren (“Gordo”) abokatua: “Kartela jarri zuenak bere izenean egin zuen eta nire bezeroari egiten dio erreferentzia. Zein da arazoa?” (Diario de Noticias)

[2017-01-23, 12:15] “Terrorismo matxistaren apologiatzat” jo dute Sevillako zaleen Sadarreko bandera (Berria)

“Gordo”, Sanferminetan neska bat bortxatzeagatik akusatuetako bat, eta igandean Sevillako zaleek Sadarren jarritako pankarta / Navarra.com

[2017-01-23, 11:00] Ziurrenik badakizue zer gertatu den: Sevilla futbol taldeko zaleek “Gordo” dioen pankarta bat jarri zuten atzo Osasunaren estadioan. Pankartak ez luke ezer berezirik, “Gordo” ez balitz José Angel Prendaren ezizena, pasa den Sanferminetan neska bat taldean bortxatzeagatik akusatuetako bat.

Sevillako zale batek Twitterren jarritako mezua:

Esta victoria en el Sadar va por ti.
GORDO LIBERO!!!! pic.twitter.com/ZYGC8bOZvv

— Sevilla Offender (@SevillaOffender) 2017(e)ko urtarrilak 22

Atzo jokatutako partidan jarri zuten pankarta, hain justu, Osasunako zaleek indarkeria matxistaren aurkako kartela erakutsi eta partida hasi baino lehen minutuko isilunea gorde zutenean bikotekideak hil duen Blanca Marquesen alde. Ainhoa Aznarez Nafarroako Legebiltzarreko lehendakariak Twitterren plazaratutako mezua:  

Denunciable que los ‘Biris’ enaltezcan a uno d los violadores d sanfermines@CAOsasuna en contra de las violencias machistas @parlamentoNA pic.twitter.com/dJ3HplYESS — AINHOA AZNAREZIGARZA (@ainhoaaznarEZ) 2017(e)ko urtarrilak 22

@SiempreUltras12 erabiltzailearen mezua:

Ojo al pique entre IG y BN, en el CAO-SFC.
Pancarta de BN “Gordo” y respuesta de IG contra la violencia machista.
Desde hoy enemigos… pic.twitter.com/0skLqPFYzJ

— SiempreUltras12 (@SiempreUltras12) 2017(e)ko urtarrilak 22

  José Angel Prenda jauna Biris zaleen taldeko kidea da. Pankarta jarri izana leporatu zaiela-eta, agiria plazaratu dute. Diotenez ez ziren igandean Sadarren izan. Haien aurkako kanpaina salatu eta taldeko kidearen errugabetasun presuntzioa errespetatzeko eskatu dute. Halaber, indarkeria matxistaren aurka daudela azaldu dute, eta “gaitz horren aurka aktiboki borroka egiten duen” zaleen talde gutxietako bat direla. Joseba Asiron Iruñeko alkateak eta Laura Perez Nafarroako Podemos-Ahal Dugu alderdiko buruak ere gertaera gogor salatu dute:

Mientras Indar Gorri pone pancarta contra agresiones sexistas, hinchas del Sevilla jalean a presunto violador de SF. ¿Sra Carmen Alba…? pic.twitter.com/9BU2TnGOHH — Joseba Asiron Saez (@josebaasiron) 2017(e)ko urtarrilak 22

¿El enaltecimiento de un violador no es apología del terrorismo machista?¿Qué dirá, esta vez, la Audiencia Nacional? https://t.co/8ifTzpONuV — Laura Pérez Ruano (@laperua) 2017(e)ko urtarrilak 22

Eta orain zer?

Auskalo. Espainiako Gobernuak Nafarroan duen Delegaritzak jakinarazi duenez, Espainiako Poliziak gertatutakoari buruzko txostena helaraziko dio Indarkeriaren Aurkako Batzordeari, eta hark proposatuko dio dagokion instituzioari zer zigor ezarri beharko lukeen, baldin eta zigorrik jartzea proposatzen badu.

Bien bitartean, beldur naiz horrelako gehiago ikusiko ote ez ditugun. Ruben Castro tratu txarrengatik auzipetua dagoen jokalaria (ahozko epaiketa hastea agindu berri du epaileak) animatzeko Betis futbol taldeko ultren kantaren ingurukoak dira boteprontoan gogora datozkidanak: 30.000 euroko isuna ezarri zioten Betis taldeari, kasua artxibatu baino lehen.

Golik onena sartu duen emakumeari oparitu diote… xurgagailu bat!

2016-12-21  //  Futbola, Generoa  //  Iruzkinik ez

Hala da. Marie Dølvik Markussen futbolari norvegiarrak xurgagailu bat jaso du opari, herrialde hartako Liga denboraldiko golik ederrena sartzeagatik.

Horren inguruan galdetuta, ironiaz erantzun du jokalariak: “Gabon oparirik politena izan da. Zoragarria. Ohitzen naizen ikusi beharko da. Nola erabili ikasi behar dut”.

@FutFemdelMundo twitter kontuko bizpahiru mezuri Ane Urkirik egindako bertxioek jarri gaituzte albistearen arrastoan:

Marie Markussen ha recibido hoy el premio al mejor gol de la temporada en Noruega.
¿Qué le han regalado? “Sentralstøvsuger” en noruego👇 pic.twitter.com/hWLD9O2XIk

— FutFem Internacional (@FutFemdelMundo) 2016(e)ko abenduak 20

Markussen ha respondido: “Ha sido el mejor regalo de la Navidad. Fantástico. Voy a ver si me acostumbro. Tengo q aprender a usarlo” #Ironía

— FutFem Internacional (@FutFemdelMundo) 2016(e)ko abenduak 20

Este es el gol de Marie Markussen. Creo que se merece algo mejor que un centro de aspiración. pic.twitter.com/1EedqUtZvy

— FutFem Internacional (@FutFemdelMundo) 2016(e)ko abenduak 20

Denboraldiko golik ederrenei eta xurgagailuari buruzko informazio gehiago, Norvegiako futbol Federazioaren (NFF) webgunean: Fotball.no

Federazioak eta xurgagailuak merkaturatzen dituen enpresak akordioa sinatu berri dute, eta horregatik jaso du opari hori Marie Markussenek. Gizonezkoek zein opari jasoko duten ikusteke dago…

Sari-banaketa ekitaldian izaterik ez zuen izan Markussenek. Argazkian ageri dira NFF-ko eta Flexit enpresako ordezkariak, aipatutako sariarekin.

Euskal Herriko emakumeen txirrindularitzan aitzindari izandakoei omenaldia Gabiria Kopan

2016-11-08  //  Txirrindularitza  //  Iruzkinik ez

[Eguneraketa]

Goierriko Hitzak plazaratutako kronika, bideo eta argazkiak: Orbea emakumeen lehen taldea omendu dute II. Gabiria Kopan.

[Jatorrizko testua]

Azaroaren 19an omenduko dituzte Orbeako ziklista ohiak Gabirian / Argazkia: Txitxi Orbegozok utzia

Carolina Sagarmendi, Dina Bilbao, Josune Gorostidi, Txitxi Orbegozo eta Amaia Elosegi ageri dira 1980ko hamarkadaren erdialdean ateratako argazkian. Emakumezkoen txirrindularitzan aitzindari izan ziren Euskal Herrian eta, Pedro Delgado ziklista ohiak dioen moduan, baita Espainiako Estatuan ere.

Bada, azaroaren 19an (larunbata) omenaldia jasoko dute Gabirian, Gipuzkoako Goierrin, Gabiria Kopa ekimenaren bigarren edizioan. Dina Bilbao abenturazale eta triatleta zenaren izenean Josu Iztueta izango da Gabiriako bazkarian. Bazkaria baita Julen Gabiriak sortutako egitasmoaren erdigunea.

Zer da Gabiria Kopa?

Iaz egin zen estreinakoz Gabiria Kopa, Julen Gabiriaren gidaritzapean ziklismo-zale batzuek antolatutako denboraldi amaierako jaia eta bazkaria. Euskal Herriko errepideetan korritzen diren lasterketa profesional guztiak kontuan hartuta, sustatzaileek sortutako puntuazioaren araberako rankinga egiten da, urtean zehar erregularren aritu diren txirrindulariak nortzuk izan diren jakiteko.

Aurtengo irabazleak:

Emakumezkoetan:

Irabazlea: Megan Guarnier (Boels Dolmans)
Gazterik onena: Elisa Longo Borghini (Wiggle High5)
Lehen euskalduna: Ainara Elbusto (Reyno de Navarra)

Gizonezkoetan:

Irabazlea: Sergio Luis Henao (Sky)
Gazterik onena: Nairo Quintana (Movistar)
Lehen euskalduna: Pello Bilbao (Caja Rural)

Lasterketa puntuagarrien zerrenda:

Emakumezkoetan: Durango-Durango klasikoa, Emakumeen Bira, Euskaldun Txapelketako lasterketak, lasterketa solte batzuk, lurraldekako txapelketak.

Gizonezkoetan:Lizarrako Sari Nagusia, Euskal Herriko Itzulia, Udabarri Saria, Ordiziako Klasikoa, Donostiako Klasikoa, Getxoko Zirkuitua, Espainiako Vueltako Bilboko etapa, eta Espainiako Vueltako Urdazubiko etapa.

Hamaika txirrindulari zale orori zabalik dagoen bazkarian

Azaroaren 19an Osinalde elkartean egingo den bazkarian banatuko dituzte sariak. Reyno de Navarra taldeko Ainara Elbusto bertan izango da, Orbeako omenduekin batera, baita hainbat txirrindulari profesional ere (izenak aurki jakinaraziko dituzte antolatzaileek). Iaz, esaterako, Gabirian bildu ziren Txomin Perurena (omendua), Joane Somarriba, Gorka Izagirre eta Murias-Basque Country taldeko ziklista goierritarrak: Garikoitz Bravo, Jon Ander Intsausti, Alex Aranburu eta Pello Olaberria. Txirrindulari ohien artean, bestalde, han ziren Jose Luis Maioz, Joxe Nazabal edo Jokin Mujika, Unai Paredes zuzendari ohiarekin batera.

Txomin Perurena omenduari Joane Somarribak eman zion iaz oroigarria / Aimar Maiz (Goierriko Hitza)

Bazkarirako izena eman nahi duen zale orok hiru bide du horretarako:

– E-postaz: gabiriakopa@gmail.com.
– 655702305 telefonora deituta edo whatsapp-mezua bidalita (Julen)
– Gabiriko ostatuan eta Osinalde elkartean jarritako zerrendetan izena idatzita.

Bazkariak 18 euro balio du (umeentzat 10), kafea eta kopa barne. 14:00etan bilduko dira guztiak, txirrindulari eta zaleak, Gabirian.

Txirrindularitzaren festa

Sari-banaketaz eta omenaldiaz gain, bazkalostean ziklismoaren inguruko tertuliatxo bat egingo da gonbidatuekin, bai lehiaren beraren inguruan, baita bizikletaz bidaiatzearen esperientziaren gainean ere. Halaber, Tropela.eus-eko Gabiria Kopako tropeltxoko lehen sailkatuek saritxo bat jasoko dute; eta iazko bideari jarraituz, txirrindularitzaren munduko eragile batzuek euren produktuak erakutsi eta salduko dituzte. Iaz Tropela.eus webguneko eta Libros de Ruta argitaletxeko kideak izan ziren Gabirian.

Informazio gehiago:

Iazko festaren kronika, argazki-galeria eta bideoa: Goierriko Hitza.

Philip Kerr nobela beltzen idazlea, “Letrak eta futbola” ekimenean

2016-11-07  //  Futbola, Literatura  //  Iruzkinik ez

Gaur, astelehena, abiatuko da Athletic Club Fundazioak zazpigarrenez antolatu duen Letrak eta futbola, literatura eta futbola lotzen dituen jaialdia. Roberto Ferro aktoreak Mr Pichichi malabar eta clown ikuskizuna eskainiko du 18:30ean San Mames estadioaren kanpoaldean, 23 eta 24 ateen artean. Ordubete beranduago, Philip Kerr nobela beltzen idazleak (Edinburgo, 1956) hitzaldia emango du San Mameseko VIP gunean. Kerr-ek argitaratu dituen azken liburuetako hiruk (January Window, Hand of God eta False Nine) Scott Manson dute protagonista, detektibe aritzea egokitu zaion London City taldeko bigarren entrenatzailea.

Philip Kerr idazlea da aurtengo edizioko fitxajeetako bat / Edinburgh Evening News

Egiari zor, nobela beltzaren zale naizen arren, ez nuen liburu horien berri; badut beraz Letrak eta futbola ekimenari zer eskertu 😉 Oraingoz, sail honetako aurreneko bi liburuak publikatu dira gaztelaniaz (Mercado de invierno eta La mano de Dios) eta frantsesez (Le Mercato d’hiver eta La Main de Dieu).

Idazle ugari futbolaz solasean

Asteartean, hilak 8, jarraituko du egitarauak, Unai Elorriaga, Ander Izagirre, Katixa Agirre eta Lutxo Egia bilduko dituen Futbola eta idazleak euskarazko mahai-inguruarekin.

Gaztelaniaz egingo da, bestalde, asteazkeneko mahai-ingurua: Futbola kulturatik gaiaz arituko dira Juan soto, Miguel Angel Hernández, Agustín Fernández eta Pablo Moiño.

Ostegunean Pablo Nacach, Patxi Zubizarreta, Jasone Osoro eta Julen Gabiriaren txanda helduko da: Futbola eta literatura haurrentzat eta gazteentzat gaiaren bueltan hitz egingo dute gaztelaniaz (euskarara aldi bereko itzulpenarekin).

Egitaraua ixteko, ostiralean literaturaz, futbolaz eta bi mundu horiek elkartzen eta aldentzen dituen guztiaz ariko dira Héctor Abad, Jordi Puntí eta Kike Martin, gaztelaniaz.

Hernani eta Ordizia, errugbi barneratzailearen alde

2016-10-28  //  Errugbia, Gizartea  //  Iruzkinik ez

Gaztedi errugbi taldearen jarduna dute gainerako klubek gurean eredu.

Gasteizko Gaztedi errugbi taldeak Spirit of Mixed Ability Rugby Trophy garaikurra jaso zuen iaz Bradford hirian (Erresuma Batua) jokatutako Munduko Errugbi Inklusiboko 1. Txapelketan. Lorpen hori akuilu, Arabako hiriburuan egingo da txapelketaren bigarren edizioa datorren urtean.

Hori horrela, euren bultzada eman aldera, Hernanik eta Ordiziak larunbatean jokatuko duten partidaren sarrera-salmentatik lortutako diruaren erdia, munduko txapelketaren antolaketara bideratuko dute. 12 euro kostako du sarrera bakoitzak, eta horietatik 6 jasoko dituzte gasteiztarrek.

Derbia 16:00etan hasiko da. Lehenago, 12:30ean, Hernaniko talde inklusiboko errugbilariek Gasteizko eta Bilboko Universitarioko jokalariekin batera entrenamendu saioa egingo dute. Gaztedik irekitako bideari helduta, urrats politak ematen ari dira gipuzkoar eta bizkaitarrak integrazioaren alde.

Gaiaz gehiago:

Tour de Trump: Etxe Zurirako hautagaiak txirrindularitza lasterketa bat sortu zuenekoa

2016-10-27  //  AEB, Txirrindularitza  //  Iruzkinik ez

Aho bete hortz laga gaitu BBCren webgunean aurkitu dugun albisteak: Donald Trump AEBetako presidentetzarako hautagai errepublikarrak Tour de Trump lasterketa sortu zuen 1989an. “Uste dut Frantziako Tourra bezain garrantzitsua izatera helduko dela”, esan zuen estreinako edizioan 10 etapa zituen lasterketaz. Eta zentzu batean hala zen, soilik Frantziako Tourrak banatzen baitzituen dirutan Tour de Trump-ek baino sari potoloagoak. Ibilbide laburra izan zuen, ordea.

Raul Alcalá eta Greg LeMond, 1990eko edizioko etapa bat hasi baino lehenago / GETTY IMAGES

Bitxikeria ugari gordetzen du bi bider antolatu zen lasterketak (1991n Tour DuPont izena hartu zuen). Esaterako, lehen edizioan zortzi talde profesionalek hartu zuten parte; bada, horietako askok Espainiako Vuelta albo batera utzi eta AEBetan lehiatzea erabaki zuten, dolarrek erakarrita. Bestetik, bigarren edizioan, Raul Alcalá izan zen irabazle, PDM taldeko ziklista mexikarra. Datu kuriosoa da, kontuan hartuta Trumpek iragarri duela presidente aukeratuz gero harresia eraikiko duela AEB eta Mexikoren arteko mugan.

El País-ek ere plazaratu du albistea aste honetan: Donald Trumpek ziklista mexikar bat saritu zuenekoa.

Tour de Trump lasterketaz gehiago Business Insider-en.

Alkohola kirol instalazioetan: Athletic-en nahiaren aurrean “praka jaitsiera”

2016-10-26  //  Gizartea, Kirola  //  Iruzkinik ez

EAEn Athletic-ek agintzen duela eta Jaurlaritzak prakak jaitsi dituela dioen SER irratiko kazetari Miguel Angel Garrosaren txioak jarri gaitu albistearen arrastoan: Osasun Sailak atzera egin eta jakinarazi du kirol instalazioetan alkohola kontsumitu ahal izango dela, partidak hasi baino 15 minutu lehenagora arte, eta partida amaieratik 15 minutu igarota.

Pues si que manda el Athletic en Euskadi…vaya bajada de pantalones del Gobierno Vasco. https://t.co/cGjiAXw3ot

— Miguel Angel Garrosa (@Garrosa) 26 de octubre de 2016

“Athletic-ek partida irabazi du” dio SER-eko kazetari Isabel Leónek, irratiak eskuratutako informazioa oinarri. “Dokumentuak berresten du Athletic-eko presidentea azken hilabeteotan ohartarazten aritu dena, zeinak justifikatuko lukeen VIP eremuan alkohola saltzen jarraitu izana: araua ‘egokitu’ egingo dela”.

Kazetariaren hitzetan, Athletic-en tesia nagusitu da, alkohol kontsumoa soilik debekatuz partida jokatzen ari den bitartean. “Federazioek, bestalde, arnasa hartu dute, instalazioen alboko tabernentzako ekarriko lukeen kalte ekonomikoak kezka eragin du-eta”. Legearen interpretazioa bera da guztientzat, beraz, adibidez, haren aplikazioa bera izango litzateke frontoietan”.

Gaiaz gehiago:

Hara, frontoietan alkohola saltzen dute-eta! (2016-03-31)

Euskadik tabako eta alkohol kontsumoa debekatu du kirol ekitaldietan (Eldiario.es, 2016-04-07)